November Thawhtanni hmasa ber hi khawvel pum huapa Baptist Kohhran inzawmkhawm (Baptist World Alliance) -a, Womens’ Day of Prayer Day (BWA- Hmeichhia te Tawngtai Ni) a ni a. He ni hi kum tin neih thin a ni. Kuminah pawh November 7 hian khawvel pumah thupui pakhat “Hnehtu nun” (II Korinth 2: 14) tih hmangin tawngtai programme hman a ni a. Mizoram Baptist Kohhran Hmeichhe Pawl (MBKHP) pawhin he ni hi zawm ve-in chawhma dar 10:00 atangin BKHP member ten mahni Unit theuhah Tawngtai programme hi an hmang a ni.
BWA Hmeichhe Tawngtai Ni-ah hian Tawngtai tum 8 neiin, Tawngtai Subject hi khawmualpui hrang hranga ram hrang hrang te tan neih a ni a, chung ram hrang hrang te harsatna an tawh mek leh an ram hmachhawn leh dinhmun anga zelin tawngtai thupui siam a ni. Hei bakah hian, Khawvel pumpuiin a hmachhawn – Indona leh inngirnghona a lo tlem theih nan te, sik leh sa lo danglam zel avanga khuarel chhiatna tuartute tan te, BWA hruaitute leh Ram hrang hranga Baptist Hmeichhe Pawl hruaitute tan te-a neih a ni.
BWA Hmeichhe tawngtai ni ah hian, hemi ni puala J.Meritt Johnston, BWA Women Executive Director in Hnehtu Nun tih thupui hmanga thuchah a siam chu chhiar chhuah a ni a. Karen Wilson BWA Women President pawhin Hnehtu Nun Rimtui tih thupui hmanga Bible Study a buatsaih pawh zirho nghal a ni bawk.
