November 11, 2025 (Thawhlehni) khan Baptist Kohhran Hmeichhe Pawl (BKHP) Lawngtlai Vengpui Unit te chuan an unit dinchampha phak kum 60-na Diamond Jubilee ropui takin an lawm.
Jubilee lawmna programme hi November 10, 2025 (Thawhṭanni) zanah ṭanin, Biak In kawtah Pi. T. Ngunhnemin’n Jubilee mei detna hun a hmanga, Pathian Biak Inkhawmin hun hman chhunzawm a ni.
November 11, 2025 (Thawhlehni) Chhun dar 12:00 khan Diamond Jubilee Lungphun Rev. Dr. Lalzarliana, Executive Secretary Lawngtlai Area-in hawngin, Jubilee Dar vawi 60 vuak chhunzawm a ni. Jubilee dar vuak zawh hian Pathian Biak Inkhawma hun hman chhunzawm leh a ni.
Inkhawm hi Pi R. Lalhmangaihsangi, President Unit BKHP-in akaihruaia, Pi HK. Lallianzauvi, President MBKHP hnen aṭangin "Min hruaitu Lalpa - Rintlak Pathian" tih thupui hmangin Pathian thuchah ngaihthlak a ni.
Zaipawl - BKHP Lawngtlai Vengpui Unit, Lawngtlai East Pastor Bial Zaipawl leh Lawngtlai Area Baptist Choir te hnen aṭangin zaia rawngbawlna ngaihthlak a ni a, Mizoram Baptist Kohhran Hmeichhe Pawl, Lawngtlai Area Baptist Kohhran Hmeichhe Pawl leh Lawngtlai East Pastor Bial BKHP aṭangin chibai bukna ngaihthlak a ni bawk.
Diamond Jubilee pual hian Souviner Magazine buatsaih niin, Upa T. Van Laldika, Secretary BCM Lawngtlai Vengpui-in tlangzarhna hun a hmang a, magazine-a message leh Article ziaktute hnenah thilpek hlan a ni a, BKHP Lawngtlai Vengpui Unit hruaitu lo ni tawhte hnenah thilpek hlan a ni bawk.
Inkhawm banah Jubilee lawmna ruai buatsaih kilho niin, zan lamah Pathian Biak Inkhawmin Jubilee lawmna hi khar a ni.
