Baptist Church of Mizoram

Baptist Church of Mizoram, Assembly hnuaia Rorelna sang ber, Assembly Executive Committee Meeting ni hnih awh tura ruahman chu January 18, 2023 (Nilaini) khan BCM Hall, Headdquarters Office, Serkawn-ah neiin zawh fel nghal a ni. Meeting hi BCM President, Rev. Dr. R. Zolawma’n a kaihruai a, Upa C. Hrangdula, Statistician-in Meeting Pathian hnenah hlanin a tawngtai a, General Secretary Rev. R. Lalbiakliana’n Department hrang hrang report khaikhawmin a pe.

General Secretary report chuan - Zokhawtharah raltlante puala Baptist Kohhran din a nih thu te, Chin Baptist Association of North America (CBANA) chuan Zokhawthar Biak In sak tanpui nan Rs. 3,95,823/- (USD 5000) an an rawn thawn thu te, BCM leh Champhai Grape Growers’ Society-te MoU pawhsei a nih thu te, E-Service software buatsaih mek chu zawh thawhkhat a nih tawh thu te a tarlang a. BCM Thurin Chhuizauna Commentary revision buatsaih turin Commirttee din a nih thu leh thui tak kalpui a nih tawh thu te, Council of Churches in Mizoram dinna tur chungchang bawhzui zel a nih thu leh January 24, 2023 hian BCM, Presbyterian, ECM, Salvation Army leh LIKBK atanga aiawh 6 theuh inhmuhkhawmna neih tum a nih thu te report-ah tarlangin, Myanmar leh Bangaladesh raltlante tlawhin, an pualin tanpuina pek an nih thu te, BCM Charity Fund atangin Christmas pualin Home hrang hrang leh Hospital-ah te tanpuina cheng nuai 3, sing 9 semchhuak-in, Missionary thawklai boraltate, thlatin pension (monthly pension) lak tur nei lote chhungkua 3 hnenah tanpuina cheng nuai 4 leh sing 5 a pek chhuah a nih thu a tarlang bawk. Hetihlai hian BCM Charity Fund puala Krismas Programme Headquarters, Aizawl Area leh Lawngtlai Area-ah te neih a nih thu leh heng atanga Charity Fund atana sum hmuh tling khawm chu cheng nuai 14, sing 2, sang 4 leh 515 hmuh a nih thu a tarlang.

Meeting thurel langzar zingah –

Sikkim Mission Field hawn tura ruahmanna chu pawmin, Assembly-ah thlen chhoh remtih a ni a, Mission Pawl hrang hrang pathum – Niyashi Baptist Church Council (NBCC) te, Friends Missionary Prayer Band (FMFB) leh Upper Subansiri Baptist Assossiation (USBA) te nen thawhhona thuthlung pawhsei leh Borneo Evangelical Mission, Malaysia te, Good News Society leh Wancho Baptist Churches Association, Arunachal Pradesh ten BCM thawhho puia an sawmna te, Missionary mi 5 te serh leh sang khawih theihna pek dilna te, Jharkhand Field ah Hostel din dilna te pawmin, Assembly-ah thlen chhoh turin remtih a ni.

Pastoral Department atanga Pastor atana lak thar mi 9 te pawmpuiin, Pro.Pastor 5, Probation Period hmang zo te Assembly 2023 a Ordain turin thlan tlin an ni a, March 12, 2023 BCM Assembly-ah nemngheh an ni ang. Department hrang hrang tan Post thar hawn dilna te, Hnaruak hnawhkhah dilna te, Contract-a thawk mek, mi 53 te tih ngheh tura thlen te chu pawmin Assembly-ah thlen chhoh remtih a ni a. Aizawl East ABC atanga Champhai ABC siam belh rawtna chu Assembly-a thlen chhoh remtih a ni bawk.

Finance & Pension Committee-in Kum 2023-2024 BCM Budget a ruahmanna chu pharh a ni a. Budget pumpui-ah cheng nuai 12612.87 chu a ni a, kum hmasa 2022-2023 budget aia budget sanna chu za zelah 6.95 a ni. Kohhran thawhlawm atanga hmuh tura ruahman chu cheng nuai 8254.04 niin, Department thawh chhuah tura beisei zat chu cheng Nuai 4358.83 a ni ang.

Assembly Executive Committee-ah hian Pastor Bial aiawh, ABC aiawh leh Department hrang hrang aiawh te, BCM Puipate niin, Committee member 280 an tel thei a ni.

Assembly Executive Committee Meeting neih a ni.

𝐒𝐮𝐛 𝐃𝐩𝐨𝐩 𝐈𝐧 𝐜𝐞𝐧𝐭𝐫𝐞 (𝐃𝐈𝐂) 𝐙𝐨𝐡𝐧𝐮𝐚𝐢 𝐡𝐚𝐰𝐧𝐧𝐧𝐚 𝐥𝐞𝐡 𝐏𝐚𝐭𝐡𝐢𝐚𝐧 𝐡𝐧𝐞𝐧𝐚 𝐡𝐥𝐚𝐧𝐧𝐚 𝐧𝐞𝐢𝐡 𝐚 𝐧𝐢.

𝐔𝐩𝐚 𝐉.𝐓. 𝐊𝐢𝐦𝐚 (𝐉. 𝐓𝐡𝐚𝐭𝐤𝐢𝐦𝐚) 𝐏𝐞𝐧𝐬𝐢𝐨𝐧𝐞𝐫 𝐤𝐚𝐧 𝐭𝐡𝐞𝐧 𝐭𝐚.

Welcome

Downloads

Materials