- Rev.C.Lalbiakzâma
Text: Philippi 3:10 -
Mari, Magdalini Mari leh Joani ten Isua an dahna thlân vâr\iana an va thlen khan, a chhinna lung lum sawn leh thlân ruakah mi pakhatin, “Engatinge mitthi zîngah mi nung in zawn?....” (Luka 24:5) tia Isua thawhleh tawh thu a lo hrilh ta mai kha, khawvêl mi thiam leh fing intite barakhaihtu a ni. Khawvêl hian Isua thihna leh phûm a nih thleng hi chuan a pawm thiam khawp mai. Khawvêl sakhaw tin leh a zuitute pawh hian Isua thih hi an pawm thiam vek a ni. An hriatthiam loh leh pawm harsa an tih chu “Mitthi zînga mi nung zawn” lai tak hi a ni.
Thlân ruak pawh an la pawm, mahse A nung leh a ni tih lai tak hi khawvêl mite harsatna lai a ni. Khawvêlin a awih lo mai a ni lo, zirtîrte zîngah Isua hnaih bertu Petera pawh khân hmeichhe sawi maia innghah duh lovin, inti pa takin a thova, thlân lam a pan ve nghal; mahse hmeichheho sawi kha a dik, a tuamna puan zai sîn chiah a va hmu ta a ni. Patling leh nutling sawi pawh pawm duh lo khawpa pa fimkhur zirtîr Thoma chu Isuan a kuta kilhna leh a nâka an vihna kha khawih tîrin a fiahtîr ngat a ni. Messia nia an lo pawm, Lalram (Messianic Kingdom) din ngei tura an beisei, mahse thihna hmingchhiatthlâk ber nên an vui liam tâk si-ah chuan, a zirtirte beidawng chuan an hna ngai an pansan leh ta a, chûngho hnênah pawh chuan mi nung a ni tih a inhriattîr zêl a ni.
Hêng, thawhlehna boruaka thil thleng zawng zawng leh inhriattîrna hrang hrang piah lamah hian thurûk inphûm tlat a awm a ni; chu chu ‘Thil a tithei a ni’ tih hi a ni. Thawhlehnain thil a tihtheihna chhan chu Tholeha kha a nung tlat a ni.
Isua Kraws kan tuipui leh hriatthiam tlukin a Thawhlehna Ropui hi kan ni tin nunah hmuh thiam a har fo \hîn. Ringtu nunaah a nghawng dân leh thil a tihtheih dân pawh hi chhût tum lova a tuarna lai zâwna thâmral ta ringtu kan awm thluah awm e. Paula hian a dah pawimawh khawp mai, “Krista kha kaihthawhin a awm loh chuan kan thuhril hi engmah lo a ni ang a, in rin pawh engmah lo a ni bawk ang” ti hialin Korinth Kohhran mite chu a hrilh a ni. Chutiang khawpa Ringtute innghahna lungphûm pawimawh ber a nihna chhan chu thil a tihtheih vâng a ni. Mihring nun a khawih danglam dân hi tlêm i lo thlîr tlâng teh ang:
1. Thawhlehna chuan Sual ngaihdamna a nem nghet: Mihring nuna thil har berte zinga mi chu mahni chunga tisualtute ngaihdam hi a ni. Paula vêkin ‘Krista kaihthawhin a awm loh chuan.....in sualnaah chuan in la awm fo a ni ang’ ( 1Kor.15:17) a ti hial a ni. Krista Thawhlehna hian mihringa sual bet tlat chu ngaidamin, sual lak ata chu zalênna a pe ta a ni. Krista thawhlehna kha pawm ni lo sela chuan Krawsa thihna kha pawm a ni lo tihna a ni a, chutiang a nih chuan sualah kan la awm reng tihna a ni dâwn a ni. Sual ngaihdamna hi ngaihdamna lâwng lâwngah a tâwp mai lova, sualna leh âtna te hriatreng a nih tawh loh nân thlânah a hnutchhiah a, nun tharin a nun san ta zâwk a ni.
2. Thawhlehna chuan mihring thar a pe: Krista thawhlehna thiltihtheinain a khawih danglam pawimawh êm êm mai chu, mihring hlui kha mihring tharah a siam chhuak a ni. Chu nun hlui leh a thar chuan khawvêl mite hriatthiam loh khawp danglamna a nei thîn a ni. Chu mihring thar, tholeh nun chu Krista ruala kaihthawh leh a thawhlehna anpuia zawm a nih tlat tawh avângin a danglam a ni (Rom 7:5).
3. Thlan piah lam kawng min siam sak: Khawvêl mite leh sakhaw dangin an zirtîr ve phâk rêng rêng loh chanchin \ha rîl ber chu thlân piah nun thu hi a ni. Khawvêl mite leh sakhaw dang betute hi dam chhûng nun kawngah chuan a fing ber ber leh a hre ber an ni fo \hîn. Nimahsela, thlân piah lam an ngaihtuah chiah hian an buai a, an bei a dawng thîn a, chu mi avâng chuan thihna hi mihring tâwp hlennaah an ngai \hîn. Thawhlehna thiltihtheihna hmangtute chuan thihna hi an tâwp hlenna tur a ni lo tih an chiang a, thlân piah lamah nun nuam zâwk leh thlâkhlelhawm zâwk Chatuan nunna min thlen dâwn a ni tih hriain thlamuang takin he leiah hian an nun an hmang zâwk \hîn a ni. Paulan “Beiseina kan neih hi tûn damchhûng atân chauh ni ta se, mi zawng zawnga khawngaihthlâk ber ka lo ni ang” (1 Kor 15:19) a lo ti hial a ni.
4. Ringtute ni tin nun a tichak: Mizo kristian-te rilruah hian thiltihtheihna tih a nih hi chuan thilmak tih nên kan zâr zawm deuh tlat \hîn. Chuvângin tihdam theihnate, thilmak danglam tak thlentîrnate hi thawhlehna thiltihtheihna lanchhuahna dân turah kan beisei tlat \hîn. Hei hian dikna chin a nei teh meuh mai, he mi ruala kan kan kal pelh fo chu kan ni tin nuna kan hman tur, a thawhlehna hi chang kan ni tih hi kan inchian a \ûl ta hle mai. Thlêm thlûk theihna hmuna kan \hut reng laia ka tih duh loh tlatna te, Zu zawrhna bulah leh zu hmuna ka \hut laia ka in tur a ni ve tawh lo tih theihnate, nulat tlangvâlna hman theihna free time-ah te Krista ruala kaithawh tawh tholeh fa ka ni tih hriat tlatna avânga ka tih duh lohna te hi a ni, thawhlehna thiltihtheihna chu.
Hêng hi kan tlân pêl ta lutuk em ni âw tih theih a ni ta. Thawhlehna thiltihtheihna hi Chatuan nun min petu chauh atâna duhtâwk mai a awm theih, kan ni tin nun min tichaktu atâna hman tum lêm lova thu \ha ding ve pakhata ngaih mai a awl hle a ni. Kan ni tin nunah he thilthiltihtheihna hi hmanga, chakna thar min siamtu, kan tih theih loh min tihtîr theitu leh kan tih loh tur min tihtîr lo theituah hmang ila, tirhkoh Paula angin, Krista thawhlehna thiltihtheihna hi chang ve hrâm tûrin a ngenin i ngên ang u (Phil.3:11).
