- Rev. Dr. K. Lalrinthanga

 1. Edinburgh 1910: Kum 1910-ah khan Edinburgh khawpuiah World Missionary Conference neih a ni a. He inkhawmpuiah hian missionary zawng zawng an ko khawm chuang lova, kohhran leh mission pawl hruaitute an ni deuh ber zawk. He tih hun lai hi Khawthlang rama Protestant kohhran ten khawvel pumpuia Chanchin Tha hril tura uar taka ke an pen lai kha a ni a. "Keiniho hi chak taka kan inzawmkhawm loh chuan kan mission rawngbawl hna hi a sawt thei lovang" tih lam hi an boruak chu a ni. Hun lo kal zel turah ruahmanna mumal zawk nen, thawh hona boruak tha nen, inpumkhatna tha tak nen mission-ah hian hmalak a ngai a ni, an ti a ni ber. He conference hian pawl lian tak tak pathum hrin chhuah a nei a, chungte chu:-

a)    International Missionary Council (IMC) (1921): IMC thupui ber chu khawvel pumpui huapa Chanchin Tha hril (World Evangelization) a ni.

b)   Faith and Order Movement (1925): Khawvela pumpuia kohhran hote hian kan thurin leh thil tih dana danglamnate inhriatthiampui chunga inpumkhatna lam a tuipui ber.

c.)  Life and Work Movement (1927): Pathianin mihring a siam chhan ang taka an dinhmun an luah theuh theihna turte, mahni sakhua chauh atchilh lova sakhaw hrang hrang betute nen inkawmngeiha inrem taka kan khawsak tlan theihna tura kawng dap lam a tuipui thung.

2. WCC din chhan leh din dân: WCC din chhan ber chu khawvel pumpui huapa kohhran inzawmkhawm pawl langsar tak din a ni. Kum 1948 khan khawvel ram hrang hrang atanga palai 147 kal khawmte chuan khawvel pumpui kohhran inzawmkhawm pawl World Council of Churches (WCC) chu Amsterdam (Netherlands)-ah an lo din ta a. Hemi tum hian a chunga pawl pahnih kan han tarlan tak Faith and Order Movement leh Life and Work Movement-te chu WCC-ah an inchhunglut nghal a. International Missionary Council erawh chuan a zawm ve nghal mai lo.

3. WCC innghahna bulpui ber (basis): Pathian thuin a sawi ang taka  "Isua Krista hi  Pathian leh chhandamtu (God and Saviour) a ni" tih pawma puang chhuaktute, Pathian pakhat Pa leh Fapa leh Thlarau Thianghlim pawmtute inpawlhona a ni.

4. Tuna a dinhmun: Kum2013 tawp lam thleng khan khawvel ram 110 atangin kohhran 345 chuangin an zawm tawh a, heng kohhrante hi member maktaduai 500 aiin an tam mah a ni.

5. Member nih theih dan: Dilna chu General Secretary hnenah thehluh phawt tur a ni. WCC Central Committee-in a lo endik ang. Diltu chuan WCC basis a pawm tur a ni. Diltu chu mahni-a ro in relna fel tak nei kohhran (organised church) a ni tur a ni. An awmna rama kohhran dang WCC member-te nen inlaichina tha an nei tur a ni. Diltu chuan kohhran member 50,000 aia tlem lo a nei tur a ni. Kohhran member 10,000 aia tlem lo, 50,000 hnuai lam ni si-te chu Assembly-ah tel lovin member an ni thei ang. Tuna kohhran member nilaite chu Protestant, Anglican, Eastern Orthodox-te an ni. Roman Catholic an tel lo, khapna erawh a awm chuang lo.

6. Membership fee: Membership fee hi kohhran len dan leh ram economic dinhmun ena kohhran hrang hrang tan inang lo thluaha siam a ni. WCC hian kumkhat chhung sum leh paia inenkawl nan hian (2013 khan)  CHF 3.8 million an budget a ni. (Switzerland ram pawisa hi Swiss franc an ti a, CHF tiin an ziak thin). CHF 1 hi Indian rupees 67 vel a ni.

7. WCC inrelbawl dan: Rorelna sang ber Assembly hi kum riat danah neih thin a ni. A hnuhnung ber chu Busan, Republic of Korea-ah 30 October to 8 November 2013 khan neih a ni. An thupui chu "God of life, lead us to Justice and peace" tih a ni. Assembly leh Assembly inkarah hian Seminar leh Conference chi hrang hrang neih deuh reng a ni.

8. Administrative Centre of WCC: Geneva, Switzerland ramah Administrative Centre an nei a, tuna General Secretary nilai chu Rev. Dr. Olav Fykse Tveit a ni. A member nihna kohhran chu Church of Norway a ni. Central Committee-a Moderator nilai chu Dr Agnes Abuom a ni. Thawktu 143 an awm a, chung zinga  131-te chu Geneva-ah hian an awm.

9. WCC Assemblies:

9.1.  Inkhawmpui hmasa ber Amsterdam-ah 1948-ah neih a ni. Thupui atan  Man's Disorder and God's Design tih thlan a ni. Faith and Order leh Life and work te chu inchhunglut nghalin WCC kut leh ke berah an tang nghal a ni. Thupui hi kawng li-in then a ni, hetiangin:-

i. The universal church in God's design ii. The church witness to God's design iii. The church and the disorder of society iv. The church and the international disorder

9.2.  Inkhawmpui vawihnihna chu Evanston, Illinois-ah 1954 khan neih a ni leh a. Thupui chu Christ the Hope of the World tih a ni. Thupui hi kawng ruka then a ni hetiangin:-

i. Our oneess in Christ and our disunity in as churches ii. The mission of the church to those outside her life iii. The responsible society in a world perspective iv. Christians in the struggle for world community v. The churches amid racial and ethnic tension vi. The laity: the Christian in his vocation

9.3.  Assembly vawithumna chu  New Delhi-ah 1961-ah neih a ni a. Hemi tum hian IMC chu WCC-a inchhunglut turin nasa takin an thlem a, kan inzawm khawmna chhan Mission and Unity hi WCC thinlungah nghet takin a awm dawn a lawm an ti a. Rei tak inhnialna a awm hnuah IMC chu an pawt lut ta nge nge a ni.  Thupui atan Jesus Christ, the Light of the World tih thlana ni. Thupui hi kawng thuma then a ni, hetiangin:-

i. Witness, ii. Service and  iii. Unity.

9.4.  Assembly vawi lina chu Sweden rama Uppsala khawpuiah  1968 khan neih leh a ni. Thupui - Behold I make all things New. Thupui chu hetianga then a ni:-

i. The Holy Spirit and the catholicity of the church ii. Renewal in Mission iii. World Economic and social development iv. Towards Justice and peace in international affairs v. Worship vi. Towards new styles of living Evangelical Theologian ho an thinrim hle - McGavran-a phei chuan "Will Uppsala Betray the two billion … who have never heard of Jesus … tiin a au chhuak a ni.

9.5.  Assembly vawi ngana chu Kenya ram khawpui Nairobi-ah 1975 khan neih leh a ni a. An thupui chu" Jesus Christ Frees and Unites" tih a ni. Thupui then hrang hrangte chu:

i. Confessing Christ today ii. What unity requires iii. Seeking community iv. Education for liberation and community v. Structures of injustice, and struggles for liberation vi. Human development

9.6. Assembly vawi rukna chu Vancouver, British Columbia, Canada-ah 1983 khan neih leh a ni a. Thupui chu, "Jsus Christ the Life of the world" tih a ni. Thupui then dan:-

i. Witnessing in a divided world ii. Taking steps towards unity iii. Moving towards participation iv. Healing and sharing life in community v. Confronting threats to peace and survival vi. Struggling for justice and human dignity vii. Learning in community viii. Communicating credibly

9.7.  Assembly vawi sarihna chu Canbera, Australia-ah 1991-ah ngah a ni a. Thupui chu "Come, Holy Spirit - Renew the Whole Creation" tih a ni. Thupui then dan chu hetiang a ni:-

i. Giver of life - Sustain your creation ii. Spirit of truth - set us free iii. Spirit of unity - reconcile your people iv. Holy Spirit - transform and sanctify us

9.8.  Assembly vawi riatna chu Harare Zimbabwe-ah 1998 khan neih leh a ni a. Thupui chu "Turn to God - Rejoice in Hope" tih a ni. He inkhawmpuiah hian Orthodox kohhrante WCC-a an tel ve theihna tur kawng ngaihtuah tur commission din a ni.

9.9.  Assembly vawi kuana chu Porto Alegre, Brazil-ah 2006-ah neih a ni. Thupui chu "God in your grace, transform the world," tih a ni. Hemi tuma an thil sawiho langsar deuhte chu:-

i. Called to be the One Church, ii. Economic Justice, iii. Christian Identity, iv. Religious plurality, leh v. Youth overcoming Violence tihte an ni.

9.10. Assembly vawi sawmna chu Busan, Republic of Korea khawpui pakhatah-ah 2013 khan neih a ni a. Thupui chu God of Life, lead us to justice and peace tih a ni. Korea rama inthenna (North leh South), leh innghirnghonate, tamna leh kut inthlaknate hausaknate hlimna leh lawmnate chungah hian kan maimichhing thei mai lo. Korea ram mipui leh kohhrante nen inlungrual takin khawvelah hian dikna leh inremna a awm theihna turin kan ding nghet tlat a ni, tih an puang chhuak.

WCC leh SAKAWLH

Kohhran thenkhatin WCC leh sakawlh hi inzawm tlata hriatna an nei a. Chuvangin WCC zawm chu thil hlauhawm leh rapthlak takah an ngai a ni. A chunga WCC chanchin kan han tarlan atang khian Sakawlh nena inzawmna an neih loh zia chu a lang chiang tawh hle mai awm e. Mi thenkhatin WCC leh Sakawlh inzawma tlata an hriatna lo tarlang ila:-

1.     Khawvel pumpui huapa kohhran pawl lian tak inzawmkhawm  a nih avangin. 2.   An Pathian thu uar zawng an duh loh avangin. Entir nan:-

2.1. Sakhaw dang betute chungchanga an ngaih dan - sakhaw dangte zirtirnaah hian thil tha tak tak a awm ve tho a, an danglamnate hriatthiam puia,  inrem taka khawsak tlan hi a pawimawh a ni. Hidu chu Hindu tha zawk, Muslim pawh Muslim tha zawk an nih theih nan tanpui ila, Kristiana inleh tir kher hi a tul ber lo ve tihngaihdan chak taka kal puite an awm bawk a. Chuvangin sakhaw dang betute nena tha zaia inkawm (Dialogue) hi an sawi uar tae m em mai a ni.

2.2.   Mission leh Evangelism hnapui ber chu Humanization (mirethei chawi kan, ) khawtlng siam that (transformation of society) a ni ber mai. Kan sum leh pai leh keimahni ngei kan inpe ang a, a chang chuan Bible dah thain silai kan lek chhuak ang.

2.3. Mission Field chu khawvel pumpui hi a ni. Kohhran rawngbawlna zawng zawng hi mission a ni mai. Sakhaw pakhat atanga sakhaw danga mite inleh tir hi a tul ber lo.

3. An subject tuipui berte 3.1. Justice, Peace and integrity of creation 3.2. Liberation theology: Liberating from all kinds of oppressions 3.3. Combating Racism, Sexism, iequality between rich and poor 3.4. Equal distribution of wealth 3.5. Development (Social responsibility) 3.6. Preservation of Global warming 3.7. Ecology: preservation of natural forest and its inhabitants.

Evangelical ho chuan Mission & Evangelism hna pui ber chu ringlotute hnena Chanchin Tha hril leh Kohhran din a ni an ti ve thung.

4. Mission Hospital-te, Mission School-te, Skill training Center-te, Language study Center-te, Social Work-te, Film Ministry-te leh thil dang dang hmangin Mission Field-ah rawngbawl thin mahse a tawpa an hlawhtlin leh hlawhtlin loh an tehna ber chu Ring thar eng zat nge kan neih, Preaching Station thar kan hawng em, Fellowship thar eng zat nge kan neih, Kohhran thar eng zat nge kan din tih hi a ni fo thin.

5. Evangelical-ho chuan kristian tha an tehna chu: Kohhran miin a ngaihpawimawh leh ngaihpawimawh lovah a ni. Kohhran hi he kawvela Pathian agent tha ber a ni, an ti tawp mai, piangthar, inkhawm peih, thilpek, tawngtai peih, zu in lo, mei zu lo, ruih theih thil ti lo, etc etc te hi kristian tha an ni.

6. Evangelical-ho chuan Sorkar tha a awm theihna tura Politics-a thuk taka inrawlhte, Khawtlang sualna tireh tura a hring a hrana va do ur ur-te, man to tak taka Rescue centre dinte, Rehabilitation Centre-te din ai chuan mihring leh khawtlang siam that nan Camping leh Crusade-te Councelling Centre neihte an uar zawk thin.

7. Evangelical-ho chuan Development (Hmasawnna) lama tan lak leh retheihna umbo tura kawng hrang hranga beih ai chuan Pathian thu atanga mihring rilru develop-te, Pathian thu atanga kan retheih loh nana taima tura inzirtit-te an ngaipawimawh fo thin.

8. Evangelical-ho chuan thlarau pian tharna atanga mihring dik tak, tisa leh thlaraua mipuitling chher chhuah hi an tum fo thin.

BCM leh WCC

Mi thenkhatin BCM pawh hian WCC hi zawm angin an sawi thin a, hei hi sawifiah deuh hlek ila a tha ang nge.

1.    BCM hian WCC a zawm lo tih hi hre ta phawt ila.

2.   BCM hian WCC hi zawm anga mi thenkhatin an sawi dan chu, National Christian Council (NCCI) of India hi WCC member a ni a, North East India Christian Council (NEICC) hi NCCI member a ni bawk a. chuvangin BCM hi hemi pawl pahnih NCCI leh NEICC-ah hian member a ni ve ve a, chuvangin BCM hi WCC member a ni ve a ni, an ti a ni.

3.    WCC hi a hma lama kan sawi tawh ang khan Kohhran chauh lo chuan a zawm thei lo. WCC-a member nih theihna danin a phal lo a ni. Pawl (Organization), entir nan NCCI/NEICC angte hian full member ni turin an zawm thei lo hrim hrim a ni. An zawm ve theih dan awm chhun chu observer angin rorelnaah voice/vote nei thei loin an awm ve thei.

4.   BCM hian duh ni se, kohhran mumal taka inrelbawl a nih avangin member tam lamaahte member fee pek chungchangahte harsatna pakhat mah awm loin a zawm thei a. Mahse BCM hian zawm tul a la ti lem lo ani nag tun thlengin WCC member a la ni lo tih hriat tur a ni.

5.    BCM hi Evangelical kohhran kan nih avangin WCC (Ecumenical) Kohhran Inzawmkhawm Pawl lam hian min hip na vak lo bawk a ni. Hetihrual hian Kohhran Inzawmkhawm Pawl hi kan hmu sakawlh ve lo, kan hmusit chuang bawk lo.

Thu tlangkawmna: Kohhran inzawmkhawm pawl (WCC/Ecumenical) leh Pathian thu dik taka kalpui inti ho (Evangelical) ho-te zingah hian ringtu tha tak tak leh tha lo tak tak pawh an awm ve ve a. Ecumenical lam hian The Great Commandment, Lal Isua thupek ropui "Nangmah i inhmangaih angin i vengte i hmangaih tur a ni" (Mk 12:30-31, Matt 22:31) tih hi an tuipui ber a.

Evangelical ho chuan The Great Commission (Matt. 28:18-20, Mk. 16:15), Chanchin Tha hril tura Lal Isua tirhchhuahna ropui hi an tuipui em em thung a ni. Ti dik zawk leh ti tha zawka an ingaih ve ve avangin kum 50 deuhthaw kal ta chhung kha nasa taka inhnial nan an lo hmang tawh thin.

Tunah chuan Holistic Ministry/Mission ngaih dan hmangin an lo inrem ta hle a ni. Holistic Ministry/Mission chu The Great Commandment leh The Great Commission a pawimawh dan intluk chiaha pawm hi a ni.

Mi thenkhat thil hre zau tawk lo deuh ten WCC hi zirtirna dik lo tidarha zuitu angin an puh a, an hmu sakawlh em em mai a ni. UPC-ho pawh hian Pathiana minung pathum Trinity pawmtu nilo kohhran tan WCC hi zawm phal anih loh avangin an hmu sakawlh ve mai mai pawh a ni mai thei. Hlauh tur a awm love.

Sakawlh kan hlauh viau nachhan hi Piantharna leh Chhandamnaah kan chian tawk loh vang anipalh ang tih a hlauhawm khawp mai. Sakawlh aia hlauhawm zawk leh thiltithei zawk ringtu leh neitu kan nih chuan thlamuang takin kan awm mai dawn lawm ni!!!

Read More Article/Sermon : Click on this link : Articles/Sermon

ATTACHMENTS