Upa J.T. Kima (J. Thatkima) hi Pu J. Bualduna leh Hnumthluaii te inkarah October 1, 1935 khan Tarpho-ah Unau paruk (6) zinga pangana ni turin a lo piang a, an unaute hi hmeichhia pathum leh mipa pathum an ni.

Kum 1962 January 22 ah  Pi R. Rozawni nen Tarpho-ah an innei a, Fanu pali leh Fapa pakhat an nei a  ni.

Naupangte a nih lai atangin piantharna a nei tawh a, daia tawngtai leh lamte pawh nuam ti em em a ni a, tleirawl nih lai atangin Pathian thlarauin a lo sawi zawi tawh a ni. Pathian thu Johana 3:16, Sam 73:28,  hi a duh em em a,  KHB No. 54, 455 hla te hi a  hla duh zual em em ani bawk.

Kum 1959-ah Kohhranah Clerk hna a ruah thu leh lak an tum thu hriain a dil ve a, hetah hian lak a ni a, June 1, 1959ah he hna hi a zawm a ni. 1986-1995 thleng Head Assistant a awmin, 1995-ah Super annuation pension in a chhuak ta a ni.

Upa J.T. Kima hi Sap ho kutchhuakte zinga mi niin, Rev. Dr. C.L. Hminga, Rev. Dr. H.S. Luaia leh Rev. K.L. Vanngaía te ho nena rawngbawl ho thin, pa taima leh thil chik mi, mi invawng fel tak leh rawngbawlna ngaipawimawh e mem a ni a, BCM Committee peng hrang hrangah Committee member a ni tawh a, Bazar Bial a awm laiin Bial Treasurer, Tualchhungah Chairman, Sunday School Superintendent te a ni tawh a. Heng bakah hian MTKP Asst. Secretary leh Executive Committee member hun eng emaw chen a ni tawh bawk a. MBKHP Senior Adviser te, Tualchhungah TKP President leh Secretary te, BMP leh KNP ah Senior Adviser te, a nih bakah TLM-ah Treasurer kum 15 lai a ni tawh bawk a, Carey English School dinin, Treasure kum eng emaw zat a ni bawk. JH. Lorrain Memorial Certificate, Sunday School Chawimawina Gold Medal, Board of Theological Education in Lay Leadership Certificate te a dawng bawk. Heng bakah hian N.G.Olamah pawh nihna sang tak take ng emaw zat a lo chelh tawh bawk a ni

Upa J.T. Kima hi tawngtai mi a ni a, zing leh tlai, chhunah tawngtaina a hmang ziah a ni a, Bible chhiar a peih e mem a, hna a thawh theih loh hnu pawhin a chhiar reng a, a beh thleng hian Sam 70-na a chhiar leh mek a ni. Thil chik mi leh ziak peih tak a ni a, Diary bu thlenga vawng thlap chi a ni. Thil ti mai mai lo, mi taima leh hlawhtlin tum tlat, mahni mawhphurhna hlenchhuah tum tlat mi a ni.

Hmangaihna a ngahin, chhung leh khat huikhawmtu a ni a, mikhual leh awmpui an nei deuh reng a, Pastor Challiana phei kha chuan, a hlawh a tlem si a, buaithlak a tihpui thu a sawi fo thin a ni. Hmangaihna a ngah avang hian a tu leh fate, chhungkhat ho hian kan ngaiin an thlahlel hle a ni.

A NAT DAN:

Pa  hrisel leh taima tak nimahsela, kum 2022 April thla khan stroke a vangin Christian Hospital Serkawn (CHS)-ah admit a ni a, heta tang hian a chak lo chho ta zel a, kal pawh a kal tha thei ta lo a, therapy te lain kal a zir leh ta hial a ni. Kum 2023 March thla-ah zunthlum avangin Christian Hospital Serkawn (CHS) ah a lut leh a, hemi kum vek hian semi heart attack-in a awm leh a, hma a sawnin zia awm lam a pan chho zel dawn emaw tih laiin, March 15, 2026 ah CHS-ah a admit leh a ni a, kar hnih vel a awm hnuah chhuakin, May 15, 2026 ah CHS ah bawk dah lut leh  a ni a,  May 25, 2026 (Thawhtanni) Dar 11:15 am khan a damlaia rawng a bawl nuamti leh rawngbawlna ngaina em em thin chu a rawng abawl sak thin Lalpa hnenah a chawl ta.