Vawiin, October 7, 2026 (Nilaini) chawhnu dar 1:00 khan School of Nursing, Christian Hospital Serkawn-chuan GNM Graduation & Lamp Lighting Ceremony an hmang, Chief Guest atan Rev. Dr. H. Lalthlamuana General Secretary, BCM chu hman a ni.
Inkhawm hi Upa Dr. B. Laldinliana, Director, Medical & Health Department BCM-in a kaihruai a, Rev. Zonunvula Ralte, Chaplain CHS-in hunserh hmangin, Nursing Students, School of Nursing, CHS ten Pathian fakna hla an sa bawk.
Pi, Vanlalthlengliani, Principal, School of Nursing chuan Graduate tharte inhmel hriattirna leh School report tawi a pe a. Pi R. Vanlalruati Tutor, School of Nursing, CHS in zirlai tharte lakluhna leh lukhum khumtirna na a nei.
Chief Guest-in zirlai ti thate hnenah lawmman leh Award a sem a, Institution-in a buatsaih, Best Graduate Award Lalrinhlui Pautu hnenah hlan a ni a, Biaklianzuali Award leh BCM-in zirlai ti tha te hnenah lawmpuina a hlan thin chu Lalruatsangi hnenah hlan a ni bawk.
Khuallian Rev. Dr. H. Lalthlamuana General Secretary, BCM chuan, graduate tharte a lawmpui thu a sawi a. Tun dinhmun an thlen theih nana rilru leh tha tam tak sengtu an zirtirtu leh an nu leh pa te hre reng tura a duh thu leh Zoram chhung leh pawn, India ram pawn thleng pawha hna an thawh hunah, an thutiam sawi rual te chu zawm tlat tura a duh thu a sawi . Nurse hna chu hna zahawm a ni tiin, graduate tharte chu ruihtheih thil leh zuk leh hmuam laka inthiar fihlim turin a chah nghal a ni.
Chief Guest chuan School of Nursing, Christian Hospital-in a din tirh atanga vawiin thlenga hlawhtlinna ropui tak a lo neih thin dan leh kohhran huang chhunga zirna kan neihte zingah a sulsutu a nih thu sawiin, zirlai te hlawhtlinna leh School hmasawnna te avangin thawktute leh zirtirlaite chungah lawmthu a sawi a, hun lo kal zel turah pawh hlawhtlinna chang zel thei turin duhsakna a hlan bawk.
Rev. Lalhmunsanga Director, Communications & LP Department chuan Pathian hnenah lawmthusawi tawngtaina a nei a, Graduate tharte aiawhin Lalrinhlui Pautu in thu a sawi bawk.
Rev. Lalzarliana Khiangte Administrative officer, BCM-in malsawmna-in inkhawm hi a khar a ni.
