Tunkar Pathianni, November 25 hi Mizoram Baptist Kohhran Ni Pawimawh (Special Sunday) – “Rualbanlote Ni” a ni a. Hemi ni pual hian Mizoram Baptist Kohhran tinah Pathianni zing inkhawmah hun hman a ni ang. Kumin Rualbanlote Ni thupui-chu  “A ni chuan mi zawng zawng chhandama awmah leh thutak hriaah a duh a ni” (1Tim 2:4)  tih a ni ang.

Thuchah sawitu-in thupui thlansa hmang hian thuchah sawi theuh tura beisei an ni a, Tin, Headquarters atanga hemi ni pual thuchah chhiar chhuah tura buatsaih "BCM Nipawimawh Bu" a hemi Ni tobul leh thuchah chu Kohhran tinah chhiar a ni ang.

..........

Rualbanlote Ni hman a nih dan:

BCM Assembly 2008 chuan, “Rualbanlote hi an khawngaihthlakin kan Kohhran hian a ngai pawimawh a ni tih kan lantir nan an pualin Pathian ni hmang ve ila,” tih a ngaihtuah a. Rualbanlote pual hian Pathian ni hun hman nise. Administrative Working Committee-in ruahmanna lo siam se, tih a ni. Administrative Working Committee-in a ruahman angin 2008 atang chuan November thla Pathian ni hnuhnung ber hi Rualbanlote pual atan kan lo hmang ta a ni (World Disability Day hi December 3 a ni a, hemi ni hnaih ber Pathianni November thla Pathianni hnuhnung ber hi ruat a ni). Lal Isua khan khawvela rawng a bawl lai khan rualbanlote a khawngaihin a ti dam thin a. Mathaia 10:27, 9:32-34, 15:29-31 te, Marka 7:31-35 te kan en chuan Lal Isuan, mitdel, kebai, piangsual tinreng te, zeng te, ramhuai man (rilrubuai) a tihdam thute kan hmu a ni. Keini pawhin kan zinga awm rualbanlote hi kan enkawl that a pawimawh a. Kan Lalpa thupek pawh a ni tih i hre thar leh ang u.

Rualbanlohna chi hrang hrangte:

Mithiamte chhut dan chuan khawvel mihring za zela panga hi rualbanlo an ni a, rualbanlohna hi rilru lam chauh te, taksa leh pianphung chauhva rualbanlohna te, a pahniha rilru lam leh pianphung a rualbanlohna te a awm thei.

Rualbanlohna chhan hrang hrang a awm a. Nuin nau a pai lai atanga fel lo awm thei atang te, pian tirh lai thil awm dan leh naupan laia natna vei atang te, ei tha tlakchhamna avang tein a awm thei a. Tin, Mizovin, “Piansualin tlai luat a nei lo,” an lo tih angin, tawhsual tawh palh (accident) chi hrang hrang avangin rualbanlohna a awm thei a ni.

Mizoten rualbanlote kan hmuh dan. Mizoten rualbanlote kan hmuh dan leh kan ngaihdan hi a tha vak lo va, kan inzir a tul hle. Hnam changkang apiangin rualbanlote enkawl an thiam a, rualbanlote hi rilru lama ban lo an nih chuan finna zirtir theih an ni a, mi pangngai angin an zir chak lo a nih pawhin anmahni rau rauvah hma an sawn thei a, thiamna an zir theih ang ang kha anmahni inenkawl nan leh thil tangkai thawh chhuah ve nan an zirin an hmang thei a ni. Mizo hian mi ang mang lote kan bawl khawlo fo va, mi pangngaia chhuah theihte pawh chhungkua leh khawtlangin kan en dan leh kan enkawl dan avangin mi ang lovah kan chhuah fo niin a lang.

Mi pangngai chen zan lote pawh enkawl thiam chuan mi pangngai ang maia chhuah theih leh mi an chen lohna laite  pawh sawi tham loh leh pawi tham lovin a chhuah theih a, chu chu anmahni tan leh chhungkaw tan, hnam pumpui tan a tha em em a ni, tih hria ila.

Pianphunga rualbanlo pawh a tul ang zela zirtir leh hmanrua nena thuamin an rualbanlohna lang lo hialin tanpui theih an ni. Khawvelah hian  rualbanlo ni si mi ropui tak tak an lo chhuak fo tawh a, mitdel, zaithiam leh hla phuah thiam, vawiin thlenga hla ropui ber ber phuahtute, mitdel, khawvel khawmualpui zawng zawnga tlangsang berte lawn chhuak vek thei khawpa chak te,  bengngawng, scientist ropui tak te, fuke kim lo, mi pangngaiin an tih theih loh thil tithei tam tak sawi tur an awm a ni.

Khawvel ram changkang zawkah chuan rualbanlote tan inzirna School hranpa leh infiamna, anmahni pual bik siamin zin veivahna lamah pawh a thlawna chuan theihna te, an tana remchanna chi hrang hrang an siamsak thin a, kan ram pawhin hetiang lamah hian hma kan sawn ve hret hret a, chak zawk a hma kan lak zel pawh a tul hle a ni.

Kan Hospital, Christian Hospital Serkawn pawh Sorkarin rualbanlote enkawlna, District Disability Rehabilitation Centre (DDRC) atan min ruat a, Falkawn-a centenary building hnuaiah hmunhma te pawh neiin hma lak a ni a, rualbanlote tanpui theih tur dap khawmin, an tana thil tul ngaihtuahsakin bul kan tan a, Sorkar nena thawhhona a nih avangin mahni duh ang anga kal bawrh bawrh theih a ni lo va, thil thui tak la ti thei rih lo mah ila hma sawn ve zel kan tum a ni.