Tunkar Pathianni December 6, 2020 hi Sunday School kum tawp exam hun atan a ruat a ni a. Kum dangah chuan Pathianni zing Inkhawm banah Department hrang hrang ten a remchan dan angin Exam hi neih thin a ni a ni. Kuminah erawh chuan hrileng avangin Christian Education Department Committee chuan exam leh exam loh chungchang hi Pastor bial tin te rorelna ah dah in, Exam zawhna erawh buatsaiha thawnchhuah vek a ni.
Bial thenkhat ah Sunday School Exam hi hrileng avanga neih loh mai nise ti a thutlukna siam a nih lain, Kohhran engemawzat chuan Headquarters atanga zawhna siam sa te inlamah semin exam hi mahni inah neih tura ruahman a ni a, Thingtlang Kohhran thenkhat ah phei chuan dan pangngaia exam hi kalpui an tum thu kan dawng bawk.
Mizoram Baptis Kohhran, Christian Education Department chuan Sunday school neih leh neih loh thu-ah Pastor Bial kutah dahin, Bialin ruahmanna a siam angin Tualchhung Kohhran te pawh kal mai turin a lo hriattir tawh a ni.
Kohhran Calendar ang chuan kum thar, January ni 10, 2021 (Pathianni Vawihnihna) ah Sunday School hi tan lehin, hemi ni hian Pawlsiamremna neia tan tur a ni. Kan tarlan tawh ang khan kum 2021 Sunday School zirlaibu (Nursery atanga Senior ‘B’) a buatsaih pawh peih fel tawhin, Baptist Bookroom hrang hrang ah lei theihin sem chhuah a ni tawh bawk.
