May 4 leh ni 5 hmang khan Baptist Centre, Falkland, Aizawl-ah Aizawl Area Pastors Meet 2024 neih a ni a. General Secretary Rev. R. Lalbiakliana chuan Thupui sawihawnna neiin, Resource Person pahnih – Rev. R. Lalrintluanga, Executive Secretary, Aizawl leh Rev. Vanlalmuankima, Director, pastoral Department ten Papper buatsaihin zirtirna an pe bawk. Tun tumah hian Aizawl Area huam chhunga Bialtu pastor te leh Bial nei lo active pastor te nen an vaiin mi 44 an tel thei a ni.

Pastor Meet hi Inrinni chawhnu dar 1:30-ah tannin Pathian biak inkhawm-ah General Secretary-in Key Note Address pe-in, fuihna thuchah a sawi nghal a. Bialtu pastor ten an bial chhunga leh Kohhran te dinhmun tlangpui tarlangin sawi zauna an nei theuh a, zawhna leh chhanna te hmangin sawihona te neih zui a ni. Zan lamah Rev. R. Lalrintluanga, Executive Secretary, Aizawl Area-in ‘Beram pu Tha’ tih thupui hmangin zirtirna a nei a, sawihona neih zui a ni bawk.

Pathianni zing Inkhawmah Aizawl khawpui chhunga Kohhran hrang hrangah in sem darhin hun an hmang a, chawhnu lamah Rev. Vanlalmuankima, Director, Pastoral Deparmtent Resource person-a hmangin BCM pumpui thlirna leh Bial leh Tualchhung Kohhran te dinhmun thlirna neih a ni a, sawihona neih zui a ni bawk. Zan lamah Central Church, Aizawl-ah a huhovin Inkhawmna neih a ni a, General Secretary-in thuchah a sawiin, Inkhawm banah Pastor Meet chu an tiak ta a ni.