December 2, 2012-Pathinni hi Mizoram Baptist Kohhran ni pawimawh  - "Bible Sunday" a ni a. Zing leh zan inkhawmah thupui neiin thuchah sawi tur ruahman a ni a. Zing inkhawmah ‘Pathian thu chu a nung’ tih leh zan inkhawmah ‘Pathian thu chuan thil a tithei’ tih thupui hman a ni. Zing lam inkhawm thawhlawm hi Bible Society-ah thehluh tur a ni.

..............

BIBLE SUNDAY leh BCM (December Pathianni hmasa ber )

A hming chawi chhan ang tak hian Bible Sunday hi Bible lehlin, chhut leh thehdarh pawimawhna inzirtina ni atan Kohhran pawl hrang hrangin hun thuhmun kan hman a ni. Mizoram Baptist Kohhran hian a tir te atangin Bible chhutu pawl pawimawhna hi hriain a ngai pawimawh em em thin a. Kan Missionary hmasa Pu Buanga leh Kohhran hruaitu hmasa  thenkhatte chuan Bible lehlin hi hnapui pakhatah an neih thin a. Bible khawla chhut pawimawhna hi an hrechiang hle a ni.

 

India ramin Independent a neih hma chuan British & Foreign Bible Society hian engkim a ngaihtuah a. India ram a lo Independent hnuah India ram Bible Society din a lo tul ta a. North East India Christian Council, tunhma lama Assam Christian Council kan tih huapa Bible Society Auxiliary din a lo tul ta a. Chu mi dinna a tel tur chuan Rev.Dr.C.L.Hminga chu Shillong-ah a zuk kal a. India ram tawng hrang hranga Bible chhut chu India mite mawhphurhna a lo ni ta deuh deuh a, tan lak a tul avangin hetiang hian Auxiliary an din ta a ni.

 

Rev.Dr.C.L.Hminga lo haw hnu hian Lungleiah Bible Society Branch din a lo ni ta a. Bible Society pawimawhna hi kan Kohhran chanchinah uar taka chhuah a ni thin. Bible chhutu pawl hi an lo chak theihna tur leh Kohhran miten a pawimawhna an lo hriat deuh deuh theih nan kum khata chawlhni vawikhat, December chawlhni hmasa ber chu ruat a lo ni ta a. December Pathian ni hmasa ber hi Khawvel pumah Kohhran pawl hrang hrang ten Bible Sunday-ah hman a ni a. Tun hma zawng chuan Bible Society Sunday tiin Calendar-ah kan chuantir a; kum 2007 Assembly chuan Society tih chu paihin Bible Sunday tiin a thlak fel ta a ni. Kan Kohhran Calendara arsi chuang a ni a, hemi ni thawhlawm hi chu mahni awmna Branch Bible Society theuhah thehluh tur a ni.

....................

        BIBLE SUNDAY  Thuchah

“Hlobet chu a vuai a, a par chu a chuai thin, kan Pathian thu erawh chu chatuanin a awm reng ang”   (Isaia  40:8)

  Kristaa unau duhtakte,

Min chhandamtu Isua Krista hmingin chibai kan b<k a che u. He lehkha kan rawn thawn theih che u avang leh Bible tana in thawhna avang hian kan lawm takzet a ni. He lehkhaa kan hnathawh leh hmasawnna kan tarlante avang leh Pathianin thil ropui tak min tihsak avang hian in lawm ve ngei ang tih kan ring. Chu mai bakah, he lehkha atang hian in tawngtaipuina dawn pawh kan inbeisei bawk a ni.

Kum 26 hnuah hruaitu thar:

Pathian hruaina hnuaiah Bible Society of India Executive Committee member te chuan Rev. Dr. M.Mani Chacko chu General Secretary atan August 11, 2011 khan an thlang a, a lakluhna inkhawm hi September 13, 2011 khan St. Mark’s Cathedral Church of South India, Karnataka Central Diocese, Bangalore ah neih a ni a, kum 26 hnua hruaitu inthlak lehna hmasa ber a ni. General Secretary thar leh a thawhpuite hnuaiah hian chak taka hmalak zel a ni a, kan lawm hle.

Kohhran kutchhuak:

Kum 1811 a Bible Society of India din a nih atang khan kohhran tana thawktu kan la ni reng a. Bible Society thil tum leh hnathawh ber chu miten anmahni tawng ngei leh man tlawm zawka Bible an neih theih nana hmalak zel hi a ni a, chu mi hmang chuan mten awlsam zawkin Pathian thu an lo hre thei dawn a ni.

 

Bible Society hian Bible lehlin, chhut leh sem darh hna te India ram pum pui buapa a thawh avangin a hma a zau hle a. India sawrkar tih lohah chuan India ramah chhutchhuah hna thawktu lian ber kan ni. India ram hmun hrang hranga Auxiliary 15 awm te hi kohhran leh mission hrang hrangte nen hian thawhhona tha tak kan nei thei vek a, chhunzawm zel pawh kan tum a ni. Chutih rual chuan Pathian Thu nung leh Nunna Thu hi a lo darh zau zel theih nan kohhran hote nena tun aia thuk zawka kan thawh theih kan beisei hle a ni.

BSI chuan miten tunlai hmasawnna hmanrua hmanga Pathian thu an lo hmuh theih nan pawh hma a la mek zel a, heng – mitdelte chhiar tur Bible te, Bible ngaihthlak chi leh en chi te, internet a website hmangte, phone leh computer-a hman turte a siam mek zel a ni.

Bible lehlin hna:

Kum 200 liam ta chhung khan BSI chuan Bible te, Thuthlung Thar te, Chanchin Tha te leh Scripture portion te India rama tawng hrang hrangin a letling a. Heng lehlinte hi mite hnenah sem chhuah a ni thin a, Bible Society in lehlin hna a thawh hian nasa takin tawngah pawh hma kan sawn phah a ni.

Chhiarpuia a lan dan chuan India ramah hian tawng chi hrang 1652 kan hmang a, mi tam tak te hi chu tawng chi hnih hmang thiamte kan ni bawk a, kan survey atanga a lan dan chuan Bible Society hian Pathian thu hi tawng hrang 300 in kan letling tawh a, chuti a nih chuan Pathian Thu hian a thleng thui tawh hle tihna a ni. Tun thlenga kan dinhmunah chuan Bible pum tawng hrang 66, Thuthlung Thar tawng hrang 70 leh Portion leh selection tawng hrang 52 in a letling tawh a, lehlin hnathawh mek 76 kan nei.

Hmalaknate:

Hmeithai leh hmeichhe chanhai te, school atanga hnawhchhuahte, nawhchizuar te, naupang, thalai leh chhungkaw harsa zualte hnena Pathian thu thehdarh leh tanpuina lamah kohhran lehpawl hrang hrang te nen kan thawkho mek a, Seminar leh Workshop te buatsaih thin a ni.                                                    

En theih leh ngaihthlak theih lama hmalakna:

Mit tha lo te, lehkha chhiar thiam lo te, phur te, HIV vei mek te, tawng leh beng hriatna lama harsatna neite tan en chi te, ngaihthlak chi te leh mitdel chhiar chi tein Pathian thu thehdarh a ni a. Heng kan hnathawhte hian a thleng thui hle a, mi tam tak ten tangkai takin an hmang mek a ni.

Rahbi thar leh chona:

Kum zabi 19-naah chuan Bible hi Europe-ah a darh zau a, kum zabi 20-ah chuan America-ah a ni leh a, kum zabi 21 na ah hi chuan Asia khawmualpui hian Bible hi darh zau ber turin tan la ila, chu miah chuan India, China leh Imdonesia te hian hma kan hruai thei a ni. Asia khawmualpuiah hian kristianna a darh zau zel a, Bible tam zawk theh darh hna hi kan kovah a innghat a ni. Face book lamah pawh Bible page hian tlawhtu a ngah em em a, chu mi awmzia chu Pathian thuah kan tuihal hle a ni. Bible hi a bua chhiar theih leh thalaiten an hman tangkai theih nan digital cyber based format lamah pawh tun aia hma kan lak nasat hi a tul hle a ni.

Mamawhtute hnena thlen:

Resource Mobilisation Team te hian Central Office leh Auxiliary hrang hrangte thawhpuina zarah Pathian thuziak mamawhtute hnena thlen kawngah chak takin hma a la zel a, hlawkna tam tak pawh kan hmu zel a ni. Heng kan hmalaknate hi zau zawka a thlen theih nan Global Christian Institution te chuan World Mission leh hmun hrang hranga kan thawhpui Bible Society te kaltlangin Pathian thu hi a sem darh ve zel bawk a ni.

Sawmna:

In hnathawh zawng zawng avanga thinlung taka lawmthu kan sawi rualin tawngtaipuina leh thawhlawma tan la zel turin kan sawm tak meuh che u a ni. In thawhlawmte avang hian kohhran mipuite hman tur Bible leh Pathian thu nung leh thiltithei hi a mamawhtute hnena sem tur kan nei thei a, kan vaia kan tan tlanna hian mi beidawng leh Pathian thu mamawhtute hnenah Pathian chhanchhuahna ropui tak kan thlen zel thei dawn a ni.

Krismas leh kum thar hun hlimawm tak hmang turin duhsakna kan hlan a che u.

Pathian tana in thawpuite,

Dr. (Mrs) Navamani E. Peter            President,   Rev.Dr.M. mani Chacko General Secretary