December 4, 2016 (Pathin Ni) khi khawvel huapa kristiante ni pawimawh “Bible Sunday” a ni a, Mizoram Baptist Kohhran pawhin he Ni hi urhsun taka hmangin, Chawhma Inkhawm-ahHeadquarters atanga Progamme siam angin Kohhran tinah hun hman a ni ang. Kumin Bible Sunday thupui atan “Pathian Thu chu a nung a, thil a tithei." (Hebrai 4: 8-13) tih hmangin thuchahngaihthlak a ni ang. Hem ni inkhawm thawhlawm hi Bible Society rawngbawlna atan hman tur a ni a, a hnuaia thupui thalansa hmang hian Tawngtai rual neih a ni bawk ang.
1. Pathian Thu chu thil ti tûra Pathian kâ atanga chhuak a nih avângin thiltihtheihna a nei. 2. Pathian Thu chu Lal ber thu a nih avângin thiltihtheihna a nei. 3. Pathian Thu chu Tlarau Thianghlim hmanrua a nih avângin thiltihtheihna a nei.
Tin, December 4 hi Bible Sunday a nih bakah Sunday School kum tawp Exam Ni a ni bawk avangin Pathianni chawhma Sermon inkhawm banah Sunday School Exam-in a chhunzawm nghal ang. Christian Education Director chuan Kohhran memberte Sunday School exam ngai pawimawha, exam theuh turin a ngen a ni.
………
BIBLE SUNDAY
December Pathian ni vawi khatna
Thuhma:
Bible Sunday hi Kristianten kan thurin innghahna Bible kan neih avanga lawmthu sawina ni atana hman thin a ni a. Amaherawhchu, Mizoramah hian Bible Sunday hi Kohhran hrang hrang lungrual taka kan thawhhona Bible Society pualin kan hmang ta ber a. Hemi ni thawhlawm pawh hi kohhran awmna hmunin a hnaih ber Bible Society-ah thehluh a ni thin. Kohhran Pawl inthliarna awm lovin, hemi ni hian Kohhran Biak In tam takah Bible Society hruaitute feh chhuakin Bible Sunday chu Bible Society puala inkhawm nan leh chutiang lam hawia thuchah sawina hun atan hman a ni a, chu bakah Bible avanga lawmthu kan sawi rualin he rawngbawlna lam hawia infuihna leh mi inpete hnena chawimawina Certificate leh lawmman inhlanna ni atan kan hmang ber a, a lawmawmin mi tam takin kan hlut chho ta hle a ni.
Bible Society lo pian chhuah dan:
Bible Society lo pian chhuah dan hi thui tak sawi tur awm mah se, a tlangpui chauh sawi ila. Kum 1800 vel daihah khan fur khawchhe hnuaiah, Llanfinhangel khua atangin hmeichhe naupang pakhat Mary Jones-i chu kum 9 a nih atangin kum 15 mi a nih thlenga Bible leina tur atana a pawisa khawl chu kengin, mel 25 laia hla, Bala khuaah kea kalin Bible a han lei a. Bala khuaa kohhran hruaitu pakhat Thomas Charles-an Mary Jones-in Pathian Thu a ngainatzia leh chumi avanga a thawhrim nasatzia chu a hmuh chuan Bible pawimawhna chuan a rilru a luah khat ta em em mai a. Tin, Welsh ramah mi nazawng tan Bible neih a harsatzia te hriain, Bible chhutu pawl (Society) din a nih theih nan nasa takin hma a la ta nghal a. Tichuan, March 7, 1804-ah chuan London-ah British and Foreign Bible Society (BFBS) chu din a ni a. Chu pawl hmang chuan khawvela kohhran pawl hrang hranga kristiante tanhona azarah Bible chu sem chhuah theih a lo ni ta a ni.
Mizorama Bible Society lo indin dan:
India ramah pawh Cacutta-ah February 21, 1811 khan Auxiliary din a ni a. 1956 November thla khan NE India pumpui huamin Assam Auxilary hawn a ni ve leh a. Assam Auxiliary hawnnaah hian Mizoram atangin Rev.C.L. Hminga, Pu Muka leh Rev. Zairema te an tel ve a ni. Mahni rama branch hawng ve tura ngen an nih angin Mizoram atanga kalte pawhin mahni kohhranah hma an la ve nghal a. Mizoram Baptist Kohhran Standing Committee (Jan 10, 1957) Agenda No 6 naah Bible Society Branch din thu a ngaihtuah a. June 7, 1957 Executive Committee, Theiriata neih chuan Agenda No-5 naah Bible Society Branch hi din ni rawh se, tiin a rel ta a. December 8, 1957-ah chutih laia Assam Auxiliary Secretary R.W. Phillip chuan Bible Society of India (BSI) Lunglei Branch chu Bazar veng Biak Inah a rawn hawng a. BSI Lunglei Branch-a hruaitu hmasa te chu : President -Rev. H.W. Carter (Pu Kara), Secretary cum Treasurer -Rev. C.L. Hminga. Pi Reii (Mrs Raper) chu a hnuah Treasurer atan ruat a ni leh bawk. Hei hi Mizorama BSI Branch kan neih hmasak ber a ni. R.W. Phillip chuan a haw lamah December 11, 1957-ah Dawrpui Biak Inah Aizawl Branch a hawng ve leh a, October 1957- October 1958 chhunga hruaitu a tan President Rev. Liangkhaia; Secretary -Pu Muka leh Treasurer- Pu Llyod-a te ruat lailawk an ni bawk.
Mizo tawnga Bible lehlin thu :
England rama Leeds khua atangin mi hausa, missionary rilru Pu Robert Arthington-an ama sum senga a tirh missionary pahnih, J.H. Lorrain (Pu Buanga) leh F.W.Savidge (Sap Upa) te chu January 11, 1894 khan Mizoram an lo lut a, anni pahnih hian Mizoramah Chanchin Tha meichher mit lova chhawm nun reng tur chu lo chhiin, Chanchin |ha lungphum chu an rawn phum ta a. Anni hian Mizo tawng ziaka a awm theih nan A AW B an siam a. Chumi hnu chuan Mizote ziak leh chhiar an zirtir hnuin Bible lehlin tumin hma an la a. Tichuan, August 21, 1895 chawhnu lam chuan Bible lehlin hna chu an thawk tan ta a. Chutih hun laia ringtu hmasate pawhin Mizo tawnga Bible lehlin hna an thawhnaah Sap missionary-te chu a tul dan ang angin an pui ve thin a ni. A tirah Chanchin Tha Luka ziak an letling hmasa a; tichuan, Johana leh Tirhkohte Thiltih an letling leh a. August 31, 1897 khan Rev. D.E. Jones (Zosaphluia), Welsh Calvinist Methodist (Presbyterian) chu Wales ram atangin Aizawl a lo thleng ve a. D.E.Jones-a hian Pu Buanga leh Sap Upa pawh chu eng emaw chen a pui ve hman a. Pu Buanga leh Sap Upa kha a tirtu Arthingtona’n hmun pakhata rei tak an awm a remtih loh avangin an ramah a ko hawng leh rih a. An hna zawng zawng chu chhunzawm turin D.E. Jones (Zosaphluia) hnenah an hlan a. Tichuan, Sap rama an haw thlak pahin Calcutta-a Bible Society hotute hnenah an Bible lehlin chu chhut atan an pe a. Calcutta-ah an chhut thei loh avangin Sap ramah an thawn thla a British and Foreign Bible Scociety; London chuan Luka leh Johana hi kum 1898-ah an lo chhu ta a, kum 1899-ah Tirhkohte Thiltih bu pawh chu chhut a ni ve leh ta a ni.
Bible lehlin hmasak te hming:
An Bible lehlin bu hmasate chu hetiang hian a hmingah an dah a; Sap tawngin an dah nawn bawk a.
3:1. Chanchin |ha Luka Ziak (The Gospel According to St. Luke in Lushai)
3:2. Chanchin |ha Johana Ziak (The Gospel According to St. John in Lushai)
3:3. Tirhkohte Thiltih (The Acts of The Apostles in Lushai)
(A Mizo tawng bu hming hnuaiah zel hian a Sap tawng bu hming hi an dah a ni)
Mizoramah Mizo Bible :
Bible lehlin a nih veleh Chanchin |ha Luka ziak bu chu kum 1899-ah Dak-in Calcutta atangin a lo thleng a, Zosaphluia sawi danin, hemi kum hian bu 150 chu hralh zawh nghal a ni. Chumi hnu rei vak lovah chuan Johana leh Tirhkohte bu hnih pawh a lo thleng ve leh nghal a ni. Kum 1903-ah Pu Buanga leh Sap Upa chu Mizoram chhim lamah Baptist missionary ni turin an lo lut leh a, Bible lehlin hna chu hmar lama Sap missionary-te nen an thawkho ta zel a, kum 1908-ah Calcutta-ah bu 3000 an chhu leh nghal mai a. Bible pum pui chu September 6, 1959-ah Mission Veng Biak In, Aizawl-ah tlangzarh a ni a, Mizo Kristianten Bible tak tak kan nei ve ta a ni.
Mi tin tan Bible:
Ringtute tan Bible tel lo chuan awm thiam a harsa a, mi a hlim lai leh lungngaih ber lai pawhin Bible-a Pathian Thu Nung chuan nasa takin a nun a hruai thin a; chuvangin ringtu mi mal tinin Bible hi kan thlarau nun min chawmtu atan kan hmang thin. Chuvang chuan, Bible Sunday pawh hi kohhranin tha taka hman kan duh a, he ni hi rilru leh tih tak zetin Bible pawimawhzia leh hlutzia ngaihtuah chung leh lawmthu sawi chungin hlawk taka hmang theuh turin kan insawm a ni.
Bible sahsawm tumna :
Tirhkoh Vanchhûnga Chhakchhuak leh Liankhama chuan Pûkpuiah Luka ziak chu chhuang êm êmin khawlaiah an chhiar a, miten lehkhabu an hmuh ngai loh avângin hmuh an châk a, a bu chhûng thu an chhiar te chu mak leh ngaihnawm ti êm êmin an ngaithla a, mi tam tak an pung khâwm hlawm a. Chu veleh an Rahsi (intilal thiam tak) Dârmaka chuan a ngaithiam lo va, thinrim zetin, “Nangni chu ka sât lovang che u, in lehkhabu kha ka sât sawm vek dâwn” tiin, Gurkhali chempui (khukri) chu a lek ta mai a. Tichuan, a sah tak tak hma chuan Vânchhûnga chuan, “Lianphung, nang tlangvâl tha chak i ni a, he Bible hi tlânbopui rawh, min sahsawmsak zawngin aimit-thlawn ang mai kan ni dâwn si a” tiin Lianphunga chu a tlânbopuitir ta a. Miin khaw tâwp thleng zakin an ûm a, an ûm phâk lova, Bible chu a him ta a ni, an ti. Chutih laia an lehlin dân tawngkam chu hetiang hi a ni. Ngai te Lalpa, ka sum zatve, pachhiate hnena ka pe ang: hmana tu hnena pawh thil eng paw hlep ru ila ahmun liin ka rul leh ang” tih leh, “Voiina he in ahian damna a lo thleng ta, ani poh Abrahama fapa a ni bok shi a. Boral apiang zonga chhan turin Mihring Fapa a lo kal a ni” tih a ni. Miten dodâl nasa hle mah se, Bible thu hi Pathian Thu Nung a nih tlat avângin, mi tam takin an ngainain an duh êm êm tho a ni. “I thu hriattirte chu kumkhuaa rochunah ka la a, ka thinlung tihlimtu a ni si a” (Sam 119:111).
