Vawiin, February 10, 2024 hi Christian Hospital, Serkawn kum 101 a tlinna  Anniversary a ni a, hemi ni denchhen hian Hospital Operation Theatre (In zaina room) thar  leh Blood centre (Blood Bank) thar hawnna leh Pathian hnena hlanna zing karah neih a ni a,   Department hotute leh  Christian Hospital a thawktute an kalkhawm a ni.

He hun hi  Upa Dr. Lalramzauva, Medical & Health Dept. Director-in a  kaihruai a,  report tlangpui a pe.  Operation Theater  hi General secretary Rev. R. Lalbiakliana'n hawngin, Pathian hnenah a hlan a.  Rev. R. Lalnunzira - AGS (Service) in Blood Centre (Blood Bank) thar a hawng  bawk.

Operation Theater (OT) thar buatsaih nan hian mimal leh pawl angin thilpek tam tak dawn a ni a, tanpuina sum tlingkhawm hi cheng nuai 47 leh sing nga chuag niin,  Donation petute hming hi Operation Theater kawngka bulah tar a ni.