Tun kar Zirtawpni, (March 25.2016) hi Khawvel puma Kristiante ni pawimawh ber zing ami "Good Friday"a ni a, March 27 (Pathian Ni) hi Isua Krista Thawhlehna Ni (Easter Sunday) a ni bawk a.
He hun ropui tak hi Mizoram Baptist Kohhran chuan serhin naktuk zan atangin Zoram pumah Kohhran hoten Good Friday Programme kan hmang dawn a, Pathianni-ah Easter Sunday programme hman a ni leh ang. Hemi a nih avang hian Kohhrana thawktute pawh March 24–28 thleng hian an hna chawlhsanin Good Friday leh Easter chawlh an hmang dawn a ni. Heng ni-ah hian Headquarters-a hruaitu te pawhin Kohhran hrang hrangah hun an hmang hlawm dawn a ni.(Good Friday leh Easter-ah Hqrs.hruaitute)
Good Friday:
Good Friday Eve hi Kohhran tam zawk chuan Lalpa Zanriah (Sacrament) kilho nan hun an hmang dawn a, inkhawm ban-ah Kohhran inpawlhona leh Zaikhawm programme te siam a ni ang. Good Friday -ah Chawhma lamah Inkhawm a awm ang a, Headquarters atanga Good Friday thupui thlan sa – ‘Krista pawh khân a tuar sak che u avângin hetiang ti tûrin koh in ni asin (1Petera 2 :21)’ tih hmangin thusawituten thuchah an puang ang. Chawhnu lamah Kohhran inpawlhona leh zaikhawm a awm leh ang a, hetah hian Kohhran tam zawk chuan Chhang ruai leh Sawhchiar te nen hun an hmang leh dawn a ni. Zan lamah pawh Inkhawm leh Kohhran Inpawlhona zaikhawm Programme te buatsaih a ni leh ang.
Easter Sunday:
April 27.2016 Pathianni hi Isua Krista, thihna hneha a thawhlehna Ni champha, Easter Sunday a ni a, he Ni hi Mizoram Baptist Kohhran chuan serhin Zoram pumah Kohhran hoten programme kan hmang leh dawn a ni. Easter Sunday Chawhma lam Inkhawm ah Headquarters atanga Easter Sunday thupui thlan sa – "Thawhlehna chuan Pathian Fapa a nih
nasa takin a hriattîr a;" (Rom1:4) tih hmangin thusawituten thuchah an puang ang a. Ram pumah Tawngtai thupui thlansa hmangin tawngtairual a ni bawk ang. Chawhnu lamah Kohhran inpawlhona leh zaikhawm awmin zan lamah pawh Inkhawm banah zaikhawm programme siam a ni bawk ang.
............................................
GOOD FRIDAY & EASTER SUNDAY
GOOD FRIDAYGood Friday hi Kristiante Ni pawimawh tak tak pathumte zinga pakhat, khawvel chhandamna atana Lal Isua kraws-a an khenbeh ni hriatrengna ni a ni. Kristiante hun pawimawh, a ni leh thla pangngai reng lo chi (movable feast) an tihte zinga pakhat a ni a, March 20 leh April 23 inkarah a thleng thin (Hetianga a hun a inthlak danglam thinna chhan chu Easter Sunday chungchang ziaknaah sawi a ni). Kum zabi khatna atang tawhin kohhranhoten zirtawpni hi chawnghei tawngtai ni atan an lo serh hrang tawh thin a.
Kum zabi 4-na atang erawh chuan Easter Sunday hmaa zirtawpni hnuhnung ber chu Lal Isua krossa khenbeh a nih hriatrengna ni atan an serh ta a bni. A tirah chuan .Holy Friday. (Zirtawpni Thianghlim) tiin an sawi thin a, .Great Friday. (Zirtawpni Ropui) an ti bawk. Kum zabi 6-na vel atangin Rom Kohhranin .Good Friday. an ti ta a, chu hming chu a pu chho ta zel a ni.
Zofate kristian kan lo nih tirh atangin, a awmzia tak kan man hma pawhin Missionary-te zirtirna atangin Good Friday hi kan serh chho ve a. Kan serh dan erawh chu khaw hrang hrangah a inang vek lo. Khua/Kohhran thenkhatin an lak urhsun viau laiin kohhran henkhat chuan a hming chuahvin an serh thung. Lal Isua sunna rilru nen hun hman a ni thin a, pulpit leh a chhehvelah puan dum te an zar thin. Khaw thenkhatah phei chuan mitthi dar te pawh an vaw hial thin a ni awm e. Kan Mizo hlaphuahtute pawhin chutiang lam zawnga rilru hruai thei turin hla an phuah nual a ni. Hun lo kal zelah Lal Isua thihna awmzia kan hriat fiah angzia zelin kan hun hman dan leh kan rilru put dan pawh a danglam chho ta zel a ni. Pathian fapa sual reng reng hre lo, mihringte chhandam nana ama inpekna avanga kross-a khenbeha a awm hi khawvel history-a thil thleng ropui tak leh pawimawh tak a ni. Chuvangin a chhandamna changtute chuan he ni hi kan ngaisangin, urhsun takin kan serh zel tur a ni ang.
.........
EASTER SUNDAY
Christmas, Good Friday leh Easter Sunday te hi mihringte chhandamna siam tura Pathian Fapa, Isua Kristan he khawvela a hun hman leh tawn ropui tak takte an ni. Christmas hi mihringte tan lawmna ni a nih laiin, Lal Isua tan chuan tuarna a rawn tan hun a ni a, Good Friday phei chu tuarna vawrtawp a ni. Easter Sunday hi thihna hneha a thawhlehna ni a nih vangin, lawmna ni ropui tak a ni. Chuvangin Easter Sunday hi a ropui chungchuang a ni. Tirhkoh Paula chuan Krista thawhlehna chu kan rinna innghahna bul leh a Chanchin Tha hril innghahna a ti hial a ni (1.Kor. 15:14, 17).
Easter Sunday chu Lal Isua thihna hneha a thawhlehna ni hriatrengna atana kristiante ni serh a ni. Kristiante kut pawimawhte zinga a ni leh thla pangngai reng lo chi (movable feast) an tihte zinga pakhat a ni a, March 22 leh April 25 inkarah a thleng thin. A hun leh ni a danglam thinna chhan chu hetiang hi a ni:
Hun hmasa lama kohhran lo kaihruai thintute- .Kohhran Pa. an tihte chuan Lal Isua thihna, phuma a awmna leh a thawhlehna te chu Kalhlen kut zawh hlimchhawna thleng a nih avangin, Easter Sunday hi Juda-te Kalhlen kut zawh Sunday hmasa berah hman an duh a. Chutih laiin Judate hun pawimawh calendar (holiday calendar) chu calendar pangngai angin a kal lo va, ni leh thla her danin a hril zawk a. Hemi chhut dan pakhatah chuan khawvel hmun tinah kum khata chhun leh zan rei zawng inchen ni .equinox. pahnih (March 21 leh September 22) zinga a hmasa zawk [vernal (spring) equinox] March 21 hnua thla bial zan hmasa ber dawta Sunday hmasa ber tiin chhut a ni bawk thin. Hei vang hian Easter Sunday, Good Friday leh Palm Sunday te hi ni (tahrik) bik nei lo, insawn thei (movable) an ni a, kum hrang hrangah an thlen hun a inang lo ta thin a ni.
Good Friday leh Palm Sunday te pawh hi Easter Sunday atanga chhut leta zirtawpni hmasa ber leh sunday hmasa ber te an ni thin a ni. Engpawh ni se, a hunbi (tahrik) hi a pawimawh ber lo va, kan serhna chhan tak, Lal Isua hun tawnga thil thlengte kha kan chhandamna kawng min siamsakna a nih avangin, chung hun hriatrengna atana kohhran hmasaten hunbi an lo chhiar dan zawm mai hi a pawi lem chuang lo ve. Kan serh dan leh kan ngaihpawimawh danah a innghat zawk a ni.
