February 4, 2025( Thawhlehni) khan Higher And Technical Institute, Mizoram (HATIM) chuan India ram puma College tha leh tha lo tehna, NAAC Assessment & Accreditation (1st Cycle ) chu December 12-13, 2024 khan endikna paltlang tawhin. December 20, 2024 khan result tihchhuah a ni a, Grade B+ (2.68 CGPA) hmuin Mizorama sawrkar enkawl ni lo (private & self-finance) College zinga NAAC Accreditation nei hmasa ber a lo ni ta a ni.
Lawmna programme hi Rev .R. Lalnunzira AGS -Service-in kaihruaiin Pathian hnenah tawngtaina a neih hnuah, Principal Pu V. Vuansanga’n thutawi sawiin HATIM dinhmun tlangpui leh tun dinhmun an thlen theih chhan tlangpui a sawi hnuah, Co-ordinator, IQAC Dr. John C. Lalduhsaka’n NAAC accreditation chungchang sawifiahna a nei.
General Secretary Rev. Dr. R. Lalbiakliana’n HATIM in tun dinhmun a thlen theih nana Pathian hnena lawmthu sawina leh theih tawp chhuaha a bul tan tirh atanga vawiin thlenga hma lo la tawhtute, thawktu ni mek leh kal chhuak tawhte thahnem ngaihna vanga tun dinhmun hi thleng an nih thute sawiin, an hmalam hunah theihtawp chhuah chhunzawm turin zirlaite leh thawktu zawng zawngte a fuih bawk a ni.
Zirlaite hnen atangin hnam lam hmuhnawm tak entir a nih bakah, Nl. Erika Zorinpuii (Asst Prof, HATIM) in Pathian fakna hla a sa a, Rev. L Vanlalsanga (Director, Education Dept, BCM ) in malsawmna-in hun a khar a ni.
HATIM hi kum 2007 khan Baptist Church of Mizoram (BCM) enkawlna hnuaiah din niin, tunah hian zirlai leh thawktu zawng zawng hi 350 bawr vel an awm mek a ni.
