A hmasain kan Lalpa Isua Krista leh Lunglei District Fire Prevention Committee hmingin kohhran mipuite chibai ka buk a che u.
Khua a lo thal leh ta in kangmei laka inven kan mamawh leh ta hle mai a.Siamtu Pathianin kan ramngaw, thing leh mau leh nungcha tinrengte kawng hrang hranga suatna ber kan rama kangmei chhuak thin tihtawp hi siamtu Pathian laka kan bat a ni tih kan hriat tlan theuh hi a pawimawh em em a ni.Thing leh mau te hi kan nunna hnar, boruak tha te, tui tlan turte leh nitin a kan khawsakna kawnga kan mamawh tinrengte min petu an nia, kan ramngawte tikang lo tura theihtawp chhuaha hma la theuh turin kan in ngen a ni.
Ramkang laka kan lo fihlim zawk nan Mizoram Sorkar chuan Lo leh Huan vat te chu March ni 15 hma ngeia hal vek turin thupek a chhuah a. He thupek hi Lo leh Huan hal tur neite chuan zawm theuh turin kan inngen a, meilam pawh tha taka sial tur a ni.Sorkar chuan kangmei tichhuaktu te leh kangmei chungchanga sorkar thupek zawm lo te chungah chuan zahngaihna lantir a tum dawn lova, chuvangin kohhran mipuite pawh fimkhur theuh turin kan inngen bawk a ni.
Ramngawt kan ti kang lo a nih chuan keimahni tan bakah kan tu leh fate tan ram kan humhalh a ni a. Ram tikangtu chuan hnam a timualphoin, ram hmel a ti bal a, ram tikangtu chu ram hmelma a ni.
Kangmei laka kan lo fihlim nan mipuite fimkhur theuh ila, kangmei chhuak tur ven chungchangah pawh theihtawp chhuah a hma la theuh turin kan inngen nawn leh a ni e.
Sd/- LIANMAWIA Division Forest Officer
Hei hi kohhranah a hranin thawn a ni lova, Forest Department hotuten mipuite min ngenna hi kohhran miten ngai pawimawhin zawm tum theuh ila, Biak Inah chhiar chhuak thei kan awm pawhin a lawmawm hle ang.
Sd/- REV.F.RAMDINMAWIA General Secretary Baptist Church of Mizoram
