Tunkar Pathianni, February 19, 2017 hi Mizoram Baptist Kohhran ni pawimawh, Kristian Hospital Ni a ni a, BCM Biak In tinah he Ni pual hian hun hman a ni ang. Kumin Kristian Hospital Ni thupui atan “Tihdam Rawngbawl - Ringtute mawhphurhna” (Mathaia 10:8). tih hman a ni ang. Hemi Ni thawh lawm hi Headquarters-ah thehluh tur a ni ang a, Hospital poor fund-atan hman a ni ang.
Christian Hospital Serkawn hi February 10, 1923 ah din a ni a, kum tinin a din tan ni emaw, Pathianni a nih loh chuan a hnaih ber Pathianni hi Kristian Hospital Sunday atan dah thin a ni.
Tawngtai rual thupui:
Hemi Ni Pual hian Tawngtairualna neih a ni ang a, tawngtai thupui atan hengte hi tarlan a ni.- Lawmthu sawina: Pathianin tihdam rawngbawlna hna BCM thawh min la phalsak avang leh he rawngbawlna kaltlanga mi tam takin damna leh malsawmna an dawn avangin lawmthu sawi ila. Tin, he rawngbawlnaah hian hma kan sawn ve zel a, ICU leh Dialysis unit te leh Minor OT te kan neih thar bakah Laparoscopic surgery (zai hawng lova, verha zaina) te kan lo ti thei ve ta a. Tin, School of Nursing kaltlanga Nurse graduates te Mizoram mai bakah India ram hmun hrang hrangah hna an thawk a, missionary-in engemawzat an chhuak bawk a, heng hi Pathian malsawmna a ni a, lawmthu sawi ila.
- Thawktu zawng zawngten Lal Isua Krista rawngbawlna chhunzawmtu pawimawh tak kan ni tih inhria a, hmangaihna leh inpekna thuk zawk nen hna kan thawh theih nan.
- Damlo enkawlna kawnga tunlai thiamna leh hriatna hmasawn chak tak ah hian hma kan sawn ve zel a pawimawh a, chuvangin thawktu inpe, a bik takin Specialist doctor kan hmuh belh theihna turin tawngtai ila. Tin, Medical hmanrua/khawl tha leh changkang kan mamawh belh zel a, kan mamawh leh tul angte Pathian hnenah kohhran ten dil ila.
- CMC, Vellore-a zirlai kan neihte tawngtai pui ila. Dr. V.L.Chhanhimi Jahau -Specialist zirlai, Dr. Laldinsangi Hnamte- House ti lai, Dr. T.Hana Christy – Internship ti lai, MBBS zirlaite- Tv. Jonathan Lalrempuia, Nl. Laltlansangi, Nl.Sarah Laltlamuani Pachuau. Tin, Nl.Zodinpuii Hangzo, Bsc Nursing zirlai, Nl. Lalchhuanmawii, Post Basic Diploma Nursing zirlai te.
- School of Nursing-ah GNM zirlai kum tin kum tin 20 lak an ni a, an zirlaite tha taka an zawh theihna tur leh School of Nursing hian hma a sawn zel theihna turin.
- Christian Hospital Lawngtlai- hi tih len tura hma lak chhoh mek a ni a, Lawngtlai leh a chheh vel mipuite tan tangkai taka he rawngbawlna hi a kal zel theih nan.
- Hospital min rawn pan tuten taksa, rilru leh thlarau damna an chan theihna tur leh Rilru leh Thlarau damna kawnga hma latu Chaplain leh thawktu te tan.
- Kan thawhlawm Pathian hnena hlanin mi tam tak tan malsawmna a nih theihna turin dil ila.
..................
CHRISTIAN HOSPITAL REPORTS
Upa Dr. B. Laldinliana, Medical Superintendent, CHS
Vawiin Christian Hospital Sunday-ah hian BCM member zawng zawngte BCM Medical and Health Department-a thawktu leh zirlaiten Lal Isua Krista hmingin chibai kan bûk a che u. Lal Isua Krista rawngbâwlna pawimawh ber pakhat 'tihdam rawngbâwlna' kan zosâp Missionary te bul lo tan chu Baptist Church of Mizoram chuan chhun zawm zêlin hma pawh kan sâwn ve zêl a. Tûnah hian Hospital pahnih (Serkawn leh Lawngtlai) leh School of Nursing hmangtein hma kan la a. Serkawnah hian khum 100 awmin thawktu 151 kan awm a, School of Nursing-ah thawktu 11 kan nei a; Lawngtlaiah khum 25 awmin thawktu 31 kan nei bawk. Tin, GNM students kum tin 20 lain tûnah hian zirlai 85 an awm mêk a ni. Thingtlâng lamah Clinic-a fehchhuahna te pawh a khât tâwka neih a ni thîn a, Sawrkâr programme engemaw zât kan thawhpui bawk.
He tihdam rawngbâwlna hi Kohhran hoten kan ta leh kan rawngbâwlna theuh a nih avângin tûn hnaia kan hmalâkna leh hmasâwnna kawng hrang hrangte kan hriat duh a rinawm a, a tlângpui târlang ila:
- He rawngbâwlna atâna pawimawh hmasaber chu mihring (human resource) a ni a, theih ang angin kan inbuatsaih ve zêl a. CMC Vellore-a MBBS BCM-in kan sponsored Dr. LH Lallâwmsânga chuan a zirlai tha taka zovin 11th April 2016 atang khân hna a rawn zawm a. Tin, Nursing Diploma zir Nl. Zothanzuali (Renal Nursing) leh Nl. Lalrintluangi (Oncology) te chuan an course zovin an rawn zawm ve ta bawk. Tûnah hian CMC Vellore-ah Doctor PG zirlai DR. V.L. Chhanhim Jahau kan nei a, Dr. Laldinsangi Hnamte-in Anaesthesia (Hnimhlum) Department-ah House a ti mêk bawk. Dr. Hannah Christy chuan internship March thlaah zovin April atangin a rawn zawm kan beisei. Tûnah hian BCM sponsored MBBS zirlai 4 kan nei a, Bsc Nursing zirlai Nl. Zodinpuii Hangzo a awm a, Nursing Diploma (Critical Care) zirlai Nl. Lalchhuanmawii a awm mêk bawk.
- Khawvêl thang zêlah hian Medical lam hmanruate pawh tha zâwk leh thil thar a lo chhuak zêl a. Mihring, sum leh kawng hrang hranga duhthusâm ang kan neih theih loh avângin duh ang chuan hmasâwn chak chu a har hle. Mahse, Pathian tanpuinain zawi zawi chuan hma kan sâwn ve zêl e. Tûnah hian ICU neiin chhim lama awm chhun a ni a, mi tam tak tân damna a ni mêk. Dialysis khâwl 3 kan nei ve ta a, hei pawh hi mi tam tak tân malsâwmna a ni. Laparoscopic surgery (inverha zaina) leh URS (phîng leh zun kawnga lung awm chhut kehna) te kan lo neiin hei pawh hi chhim lama hetiang tihtheihna hmasaber a ni. Tin, Computer-a X Ray print-na lei thar a ni a, X Ray fiahfel-fai takin kan print thei ta a, Portable X Ray machine thar chu ICU-a damlo leh Ward-a dam lo serious zual ten an chhawr tangkai hle bawk. Ultrasound Machine tha tak kan nei thar ta bawk. Colposcope (Chhûl hmâwr enna) leh ICU equipment engemaw kan nei thar a, hêng zawng zawng hi Kohhran, Fellowship Organization leh mi thahnemngaite kaltlanga Pathian malsâwmna a ni a, Pathian ropuina tûr lo ni zêl sela.
- Infrastucture lamah Pathian tâna mi inpe ten kan beisei phâk bâkin thil ropui tak tak min tihsak a. Minor OT kan mamawh êm êm chu OPD Block-ah kan nei thei a, Conference Hall tûr buatsaih mêk a ni bawk a. Serkawn leh Lawngtlai-ah Cabin atân donation sum engemaw zât kan dawng a, Cabin thar tha tak tak engemaw zât kan neih theih phah bawk a ni. Kan rawngbâwlnaah hian mi thahnemngaiten an theih tâwka tha ber theuh-hmawlhte suih atanga chêng nuai tam tak takte kan lo dawng thîn a, hêng zawng zawng hi tangkai takin mi dangte tâna malsâwmna atân kan lo hmang thîn a ni.
- Hospital Sunday thawhlâwm hi Poor fund atân Headquarters kaltlanga Hospital-a lût a ni a, hei hian dam lo mamawh zawng zawng daih lo mahse dam lo harsa zual engemaw zât hnênah sem rual deuha an hospital bill atân pêk a ni thîn a, mi tam tak tân malsâwmna ropui tak a ni. Tûn kum 4 chhûnga Poor fund atanga damlo kan pêk chhuah hi Rs.7,04,517/- a ni a. Kum 2016 chhûngin Rs. 770,147.00 kan pe chhuak a ni. Chuvângin, Poor fund hi a tangkai hle a ni tih hriain thahnemngai takin kan thawh zêl dâwn nia.
- Hospital-ah hian a rawn tlu lût apiang chu kan lo enkawl a, mahse mahni thawh chhuah atanga inchâwm tûr kan nih avângin Hospital bill chawi ngai a awm lo thei lova, pe tûr pawhin kan in beisei bawk thîn. Amaherawhchu, pêk tûr nei ngang lo pawh kan enkawl zêl tho a, chuvângin bill min bat sak engemaw zêt kan nei reng a, Tûn hnai kum 5 chhûnga bill bâ kan neih hi Rs. 42,93,573.00 (Chêng Nuai sawmli pahnih chuang) a ni a. Tin, free treatment Chêng nuai sâwm chuang an awm bawk. Bill min bat sak tam zâwk hian an rawn ngaihsak leh tawh ngai lo. Amaherawh chu, hêng zawng zawng hi kan rawngbâwlna a ni tih hriain kan hloh hlêpah kan chhiar thîn a ni.
- Kum 2016 chhûng khân OPD-ah dam lo 27132 Serkawnah en an ni a, Lawngtlaiah 6824 en an ni. Dam lo 3535 Serkawnah admit an ni a, Lawngtlaiah 1125 admit an ni. Operation 939 Serkawnah leh 5 Lawngtlaiah tih a ni a, Nau piang 557 Serkawnah leh 65 Lawngtlaiah an awm.
- Tihdam rawngbâwlna hi Lal Isua rawngbâwlna pawimawh ber pakhat a nih avângin khawi hmunah pawh kohhran awmna apiangah chuan kohhrante hi hmahruaitu an ni thîn a. BCM awm chhûng zawngin he rawngbâwlna hi chhunzawm zêl a ni ang. Amaherawh chu, khawvêl thang zêlah kawng hrang hranga kan than ve a tûl a. Chuvângin, kohhran member zawng zawngte kan theih ang theuha rilru thar nêna kan tan tlân zêl hi kan mawhphurhna a ni. Dam loten taksa, rilru leh thlarau an lo chan theihna tûrin thawktute pawh min lo tawngtaipui reng dâwn nia.
