Tunkar Pathianni, February 14, 2016 hi  Mizoram Baptist Kohhran ni pawimawh, Kristian Hospital Ni a ni a, kumina hemi Ni pual thupui chu "Nang malsawmna ni ang che’ (Genesis 12:2) tih a ni ang a, BCM Biak In tinah he Ni pual hian hun hman a ni ang. Hemi ni Thawhlawm hi Christian Hospital puala hman tur a ni ang a, headquarters –ah pek tur a ni ang, Christian Hospital Serkawn leh Lawngtlai tan tawngtai rualna neih a ni bawk ang.

..............................................

Christian Hospital Ni (February 14, 2016) hman dan tur chungchanga hriattur

Introduction:

Christian Hospital Serkawn hi 10th February 1923-a hawn a ni a, tichuan hemi hnaih Pathianni chu Kristian Hospital ni a tan ruat a ni ta thin a. BCM ni pawimawh Programme ruahmantu duh dan angin nikum lamah Hospital lo din tan dan (history) leh tun thlenga kan dinhmun chipchiar chu kum 2015 BCM Ni pawimawh programme buah tarlan anih tawh avangin tun tumah chuan tarlan a ni tawh dawn lo va, hriat duh neite chuan nikkum ni pawimawh programme bu en mai nise.(related link)

Hman dan tur leh hriattur pawimawhte:

1. Pathianni zing inkhawm chu Hospital puala hman tur a ni.

2. Thawhlawm hi Christian Hospital Poor fund atan headquarters –ah pek tur a ni a, hun changtu/chairman-in Poor fund pawimawhna leh mi harsa zawkte kan tanpui theihna pawimawh tak a nih thu sawi zau ni sela.

3. Kohhran thenkahtah Headquarters leh Hospital staff-te atanga hun hman tum a ni ang a, Kohhran tam zawkah erawh an kal sen dawn loh avangin Pastor emaw Kohhran Upa tein emaw hun hman nise. Tin, hriat chian/belh duhte a awm chuan Hospital lam hruaitute zawh nise.

4. Christian Hospital Serkawn leh Lawngtlai tana tawngtai rualna neih ni se.

5. Thupui: ‘……. Nang malsawmna ni ang che’ (Gen 12:2) tih hmang hian tihdamna rawngbawlna kawnga midangte tana malsawmna kan nih theih dan leh pawimawhna sawi nise.

6. Hun hman dan tur (order of service), hla thlan tur, special number etc te chu hun hmang tuten tha an tih angin ruahman nise.

Tawngtainaa hriat turte Lawmthu sawina turte:

1. Lal Isua Krista rawngbawlna ki pawimawh ber pakhat ‘tihdamna’ rawngbawl hna BCM Pathianin min la thawh tir a, midangte tan damna hmanrua ni thei tura chanvo pawimawh tak tun thlenga min pek avangin lawmthu sawi ila.

2. Christian Hospital Serkawn leh Lawngtlai tun thlenga harsatna lutuk awm lova kan la kal zel theih avang leh mi tam tak tana damna kan nih avangin lawmthu sawi ila.

3. Dr. Isak Lallawmkima MD (Medicine) in kan Hospital a thawk tura a rawn zawm avangin lawm thu sawi ila. Thawktute zingah nikkum chhunga zirna sang zawk zir tura seat hmu te avangin lawmthu sawi ila. Chungte chu Dr.V.L.Chhanhimi DGO (Obs & Gynae), Nl. Zodini Hangzo (Bsc Nursing), Nl.Zothanzuali (Post Basic Diploma Nursing), Nl. Lalrintluangi (Post Basic Diploma Nursing) te an ni.

4. School of Nursing ah GNM graduates thar 15 an zir chhuah leh theih tak avang leh students thar 20 Pathianin min pek leh avangin lawmthu sawi nise. Administrative Office leh class room block thar leh Auditorium thar kan neih theih avangin lawm thu sawi ni bawk se.

5. Damlo enkawlna kawnga thil pawimawh ICU leh hmanraw pawimawh tak tak, Ramp (damlo nawrna), Bus 1, Cabin thar 4 (Christian Hospital Lawngtlai) leh thil dang engemawzat kan nei thar a, Kohhran, Pawl hrang hrang leh mimal te hnen atangin thilpek hlu tak tak kan dawng bawk a. Heng Pathian malsawmna kan dawnte avangin Pathian hnenah lawmthu sawi ila.

Tawngtai puina tur te:

1. Doctor thawk tur Pathian tana mi inpe kan neih belh theihna turin tawngtai ila, Specialist kan mamawh na a lian hle a, Pathian hnenah thlen ila.

2. Christian Hospital Serkawn leh Lawngtlai leh School of Nursing hmasawnna atana mamawh infrastructure leh hmanraw chi hrang hrang kan neih zel theihna tur leh Dialysis machine kan neih thuai theihna turin tawngtai ila.

3. Hospital tana zirna sang zawk zirlaite tan tawngtai ila, chungte chu Guwahati- a Msc Nursing zirlai Nl.K.Lalchhuanmawii, CMC Vellore a zirlaite: Dr. Vanlalchhanhimi Jahau DGO zirlai, Dr.Lallawmsanga MBBS internship tilai, MBBS zirlai te Miss. T.Hana Christy, Mr. Jonathan Lalrempuia, Miss Laltlansangi, Miss Sarah Lalthlamuani Pachuau te tan leh Miss. Zodinpuii Hangzo Bsc Nursing zirlai, Miss. Zothanzuali leh Miss. Lalrintluangi Post Basic Diploma Nursing zirlai te tan. Tin, Aizawla Ultrasound training mek Dr.Goldie Lalrinsangi Sailo tan.

4. Tunah hian thawktu 145 leh Nurse zirlai 80 Serkawnah kan awm a, Lawngtlaiah 33 kan awm bawk a. Thawktu leh zirlai zawng zawng ten Lal Isua Krista rawngbawlna chhunzawmtu kan ni tih hre chunga rawng kan bawl zel theihna turin tawngtai ila.

5. BCM member zawng zawngte he tihdam rawngbawlnaah hian kan tel vek a ni tih hria a, inpekna thar nena he rawngbawl naah hian kan tel theuh theih nan tawngtai ila.