- General Secretary, BCM

Chibai bûkna

Kum thar 2017 min hruai thlengtu Pathian chu fakin awm sela, Mizoram Baptist Kohhran member zawng zawngte leh he thuziak chhiartu zawng zawngte kan Lalpa Isua Krista hmingin kum thar chibai ka bûk a che u. He kum tharah hian Kohhran chhûngkaw tinte rilru, taksa leh thlarau lamah Pathian malsâwmna nasa tak in dawn theuh theih nân ka duhsakna sâng ber ka hlân a che u.

Kumhlui 2016 kha chhûngkua leh kohhran hoten hlimna leh lâwmna, hlawhtlinna kawng hrang hrang kan chan kum ni mahse, chhûngkaw thenkhat tân chuan lu sûn kum te pawh a lo ni a. BCM a thawktu Upa Dr. K.L.Biakchungnunga, Principal BHSS, Tv.C.Zonunsânga, Driver, Pu Lalsângzuala, Missionary te leh  Pensioner, an that lai hun Lalpa tâna lo hmang tawhtu thenkhatte pawhin ropuina rama min kalsan kum a ni tlat mai. Kohhran member kan then tâk zawng zawng te kan ui êm êm a ni. An kalsan tâk an chhûngte zawng zawng, he kum tharah  hian Lalpan thlamuanna thûk tak pe che u sela, malsâwmna nasa tak vûr che u rawh se.

Lâwmthu

1)         Kum 2016 kha rilru suangtuahna pawha lang phâk ngai lo, Lalpan a kohhranhote hmanga BCM General Secretary-a ka tlinlohna zawng zawng hre reng chunga min dah kum a ni a. Kei leh ka chhûngte tân chuan damchhûnga theihnghilh ngai loh tûr kum a ni e. Lalpan BCM hi ropui taka a than chhoh tîr zêl avângin a khaipate zînga han tel ve tûra ka han inngaihtuahin ka huphurhin ka insit êm êm a. Mahse kohhranhote rorêl hi Pathian rorêl a ni tih nghet taka pawm ve tlat thin ka nih avângin, he mawhphurhna sâng tak hi tlânchhiatsan chi-ah ngai lovin ka han chelh chho ve ta a ni. Kohhranhoten nasa takin min tawngtaisak thîn a ni tih ka hria a. Min tawngtai sakna leh thurâwn min pêk thinte hian min tanpui nasa êm êm a ni. Hêng avângte hian kohhranhote hnênah lâwmthu ka sawi e. Min lo tawngtaipui zêl tûr pawhin ka ngên a che u.

2)  Kum 2016 chhûng khan Lalpa'n kan kohhran chhûngah kawng hrang hrangin thil ropui tak tak min tihsak a, kan lâwm hle a ni. A then azâr han târlang ta ila:-

• Hruaitu inthlâk kum a ni a. Kan hruaitu hmasa ten BCM leh Pathian ram tâna an lo thawhrimzia kan hmuhin ropui kan ti a. An hma lo lâk tawhte chhunzawm a, hma thar dang la bawka hruaitu tharte lungrual taka kan thawk thei hi Pathian leh a kohhranhote vâng a ni tih kan hria a, kan lâwm êm êm a ni.

• Tualchhûng kohhran engemaw zâtah Biak In hmun lei thar niin, Biak In thar pawh engemaw zât hawn a ni a. Pastor Bial engemaw zâtah Quarters thar  kan nei bawk.

• Pastor bial thar 2, Ramhlun Pastor Bial leh Bazar, Hnahthial Pastor Bial te hawn a ni.

• Ram pâwn Mission Field te khaikhâwm tûrin Kolkata Region thar hawn a ni.

• Ram chhûngah Tualchhûng kohhran thar 8, Mission Field-ah kohhran thar 28, Fellowship thar 35 Lalpan min pêk belh a. Ringthar kan neih zawng zawng hi 4,856 an ni.

•  Kum 2015 Statistics kan en chuan 2016 chhûng khan member pawh engemaw zât Lalpan min pêk belh a ni tih kan hre thei ang.

• Infrastructures lamah pawh hma kan sâwn zêl a. HATIM, AICS, BHSS, Mission Schools, Hospital (CHS & CHL), Headquarters-ah te pawh Building thar eng emaw zât kan neih belh a. Hospital lamah khâwl thar man to leh tangkai tak tak kan nei thar bawk. Hêngte hi kohhranhote leh chhûngkua thenkhat inpêkna leh thahnemngaihna vâng a ni a, kan lâwm êm êm a ni.

• Zirna leh Training-na ram chhûng leh ram pâwna kan neihna zawng zawngah Result tha tak hlîr kan nei.

• Ramthima kan rawngbâwlnaah Lalpa'n ringthar, kohhran thar engemaw zât min pe.

• THILPêK - Kum 2015-2016 Budget kan tlin mai ni lovin kan khûm theia a lâwmawm hle.

Hêngte hi Lalpa'n min tihsak vek a ni, a va han lâwmawm êm! Lalpa chu fakin awm rawh se.

B. 2017 Beiseina thar nên:

Kohhran hian hmasâwnna leh lâwmna tam tak kan neih lai hian harsatna hrang hrang kan hmachhawn ve fo bawk thin. Kumin kum tharah pawh hian Lalpa'n khawngaih rawngbâwl hna tam tak kan hmaah a rawn chhawp leh dâwn, kohhranhoten huphurh leh zâm mai lovin rilru thar, beiseina thar nên hma i la thar leh ang u:-

1)   Pathian Chibai bûk lamah: Pathian ni zing leh zân, Nilai zân inkhâwm number inthlau lutuk thinte hian Pathian chibai kan bûknaa tan lâk a tûlzia a tilang thei awm e.  Kohhranhoten 2017 hi inkhâwm uar kumah tawngtai tam kumah hman i tum ang u.

2)   Bible chhiar leh zir lamah: Kohhran mite hian Bible aia chhiar peih zâwk kan ngah ta lutuk hi thil pawi tak a ni. Kum 2017 hi Pathian Thu chhiar, zir leh a taka hman  dik kumah neih i tum theuh ang u.  Mi mal, chhûngkua, kohhran leh kan ram min kaihruaitu atân a rintlâk ber, kan ke atân khâwnvâr, kan kawng atân êng chu Pathian Thu hi a ni e.

3)   Mission rawngbâwlnaah: Kan Lalpa lâwmna ber leh hna tûl ber thlarau bo chhandam hna BCM-in a ngai pawimawh tlat hi thil lâwmawm tak a ni. Kum 2017-ah hian mahni, tawngtai leh thilpêka Lal ram thar din zêl tûrin kohhranhoten nasa lehzualin tan i la ang u.

4)   Thilpekah: BCM than zêlna tûr leh rawngbâwlnaa hmanraw tangkai ber chu sum hi a ni. Financial Year kal mêk (2016-2017)-a kan Budget hi tlin tûr chuan kan ram dinhmun enin tan nasat hle a ngai dâwnin a lang. Kum kal mêk Budget aiin 2017 - 2018 Financial Year-ah hian chêng Nuai 500 (zanga) zetin kan budget a pung ang. Pathian ram tûlna hriaa kohhranhoten harsa chung chung pawha hlim taka thilpêk kan pe thîn hi a va han lâwmawm êm. Financial Year kal mêk leh tûn kum thar a kan Budget tûrte hi tlin ngei tûrin Pathian rinchhanin kohhranhote i tang zêl ang u.

5)   Rinawmnaah: Kan ram, kohhran leh chhûngkuain kan mamawh ber fo chu rinawmna hi a ni reng fo ang. Kum 2017 hi -

*    Pathian leh BCM lakah te,

*    Rawngbâwlna a kan mawhphurhnaah te,

*    Kan sorkâr hna leh eizawnna kawng hrang hrangah te,

*    Chhûngkuaa mawhphurhna theuhah te,

*    Khawtlângah te,

*    Kan mihringpuite leh Pathian thilsiam hrang hrang lakah te, a thara rinawmna kan lanchhuahtîr kumah hman theuh i tum ang u.

Kum 2017-ah hian Lalpa'n kohhranhote hruaiin malsâwm che u sela, nasa takin a rawng bâwltîr che u rawh se.