MBMP Rorel vawi 3-na-in Environment humhalh kawnga hma lak chhunzawm an rel

By Communications Dept.BCM

 

Mizoram Baptist Mipa Pawl Rorel Vawi 3-na chu vawiin, February 9, 2024 khan BCM Biak In, Ebenezer, Zobawk South Pastor Bial-ah neih a ni a. Rorel inkhawm hi MBMP President Rbt. Chawngrolura Chawngthu-in a kaihruai. Rev. H. lalfakzuala, Secretary bakah Pu Lalnunsanga Pachuau, Treasurer leh Pu Vanlalpeka, Fin.Secretary ten sum dinhmun report an pe bawk. Kumin MBMP Rorel-ah hian Mizoram hmun hrang hrang Bial leh Unit BMP aiawh rorel palai member 414 an tel thei a, hun hmasa lamah kum 2023 Rorel leh Kumin rorel inkara BMP member chatuan ram pan ta te sunna neiin, Member boral 271 sun an ni.

Kumin MBMP rorel-ah hian MBMP Executive atanga agenda pathum leh bial hrang hrang atanga agenda lut 18 a awm a, chung zingah chuan heng te hi tihhlawhtlin turin remtih a ni. 

Executive thu te

1.Christian Hospital Serkawn a hman tur C.T. Scan leina tur budget ah dah.

2. Environment humhalh kawngah hmalak chhunzawm.

3. Christian Hospital Serkawn-in Colonoscopy a neih theih nan MBMP-in a tul angin hma la se.

Pastor Bial thu te

4. Bial BMP rorel hi ram pumah rualkhai zawka neih anih theih nan MBMP hian hma la se.

5. 4th May, BMP Day ah hian BMP Unit tinin ram tan leh BMP member te tan a ruala tawngtai neih ni se.

6. Kum 2024 chhung hian MBMP chuan Christian Chhungkaw campaign neih ni se.

7. Christian Hospital Lawngtlai hi hmanraw tha zawka thuam that anih theih nan MBMP hian hma lak ve ni se.

8. Nau hlan, Baptisma, Inneih Certificate leh Mitthi record te BCM Headquarters in Data-base-a vawng turin MBMP hian hma la rawh se.

Heng bakah hian Kum 2024-2025 budget-atan cheng nuai 13 ruahman te thlirin an pawm bawk.

MBMP Secretary report-in a tarlan danin -  Baptist Mipa Pawl (BMP) hi Pastor bial 76-ah dingin, Unit 315 ah member 16,068 an awm mek a, BMP Unit leh Bial hrang hrang atanga Missionary Support atana an pek chu a vaiin cheng Rs. 6,39,600/- niin, MBMP in Missionary Support atan Rs. 200,000/- target an neih chu pe tlak tawhin,  Kum 2023 BMP Day thawhlawm Rs. 2,30,000/- chu AICS tanpui nan hman a ni . Christian Hospital Serkawn leh Lawngtlai-ah Poor Patient Fund atan Rs.3,27,000/- pek a ni bawk. 

Heng bakah hian Kum 2023 Rorel thu bawhzuiin Environment humhalh kawngah inzirtirna kawng hrang hrangin neih a nih thu te, MBMP Media Cell din a nih thu leh BMP Aw Chanchinbu tih chhuah a nih thu te tarlan a ni bawk.

Kum  2026 MBMP Inkhawmpui chu S.Vanlaiphai Bial-ah nghah a ni ang.

MBMP INKHAWMPUI ORGANISING COMMITTEE MEETING VAWI 6-NA NEIH A NI:

MBMP INKHAWMPUI ORGANISING COMMITTEE MEETING VAWI 6-NA NEIH A NI:

South Vanlaiphai Pastor Bial MBMP Inkhawmpui Organising Commttee-te chuan kum 2026-a MBMP Inkhawmpui an dawl tur inbuatsaihna hrang hrangte thlirin June 28, 2025 (Inrinni) khan South Vanlaiphai Pastor Bial Committee Room-ah Meeting an nei. …

Mission Sunday hman a ni dawn.

Mission Sunday hman a ni dawn.

July ni 6, 2025 Pathianni hi Mizoram Baptist Kohhran Nipawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kumin Mission Sunday-ah hian thupui chu II Lelte 7:9 thu “Hawh u, lal chhungte I hrilh ang u” tih hman a ni ang. Mission Sunday-ah hian Kohhran hote Ramthim rawngbawlna lama intih chak tawnna tur leh Pathiam ram ţulna te in kawhhmuhna atan hman ţhin a ni a, kuminah pawh Bial leh Tualchhung Kohhran engemawzatin Mission Convention leh Mission Programme an buatsaih a ni. …

CMC Vellore Council Meeting-ah AGS-Service leh Director Medical & Health Department an kal.

CMC Vellore Council Meeting-ah AGS-Service leh Director Medical & Health Department an kal.

Christian Medical College, Vellore, Council Meeting July 3 & 4, 2025 khan neih a ni a, BCM aiawhin Rev. Vanlalmuankima AGS-Service leh Upa Dr. B. Laldinliana, Director, Medical & Health Department Christian Hospital Serkawn te an kal. …