March 26, 2021 zinglam  dar 3:00 vel khan Mizoram Baptist Kohhran Biak In, Vengpui, Zawlnuam a mi chu a kang a, Khawtlang mipui ten theihtawpa thelh tuma an bei chungin thelh mih hleih theih lovin Biak In hi a kang chhe nasa hman hle a ni.

Biak In hi Concrete niin, a chung hi kang chim in, a chhung furniture, tukverh leh kawngkhar te a kangfai deuh vek a, a bang kang bang te pawh hi siamthat chi nilovin thiah veka a thara din ngai khawpin a kang chhe hman a ni. Kangmei a chhuah chhan hi hriat a ni lo. BCM Zawlnuam, Vengpui hi 1994-a din a ni a, tunah hian chhungkua 42 awm in member 190 an awm mek a ni.

Vawiin vek khan Kohhran hruaitu Rev. Dr. R. Lalthanmawia Executive Secretary, Rev. Hrangaia Hmar, Aizawl East Bialtu, Rev. C. Lalremmawia, Zemabawk Bialtu, Rev Malsawmzuala, Kawrthah Bialtu leh Rev. LH Lalremruata, Mamit Bialtu pastor ten chhiatna thlenna hmun Zawlnuam hi an pan nghal a , Rev. F. Ramdinmawia, General Secretary, Senate of Serampore College Council Meeting a kal pawh Kolkatta atangin chawhma dar 9 ah Lengpui a rawn thleng a,  Lengpui atang hian Zawlnuam hi a pan ve nghal bawk.

Kohhran hruaitu te hian  Biak In kang dinhmun leh a kan chhan ni awm te a hmunah enpuiin hun an hman bak ah, Biak In kang tanpui dan tur ruahmanna te an nei nghal a ni.

Biak in hi mi hal a ni thei ang em tih ngaihtuahna atangin FIR thehluh tura ruahman a ni zet na-in, Kohhran hruaitu te leh a hmuna awm kohhran ho ten ngun taka kangmei chhuah dan ni thei awm te an en hnu-ah, Biak In hnunglam Ceiling atanga kang tanin, Ceiling hi tile niin, Inchung rangva nena a inkar ah hian dap dah leh a ni a, chu chu current short avanga zawi zawi kang   a nih an ring ta ber a, FIR pawh thehluh a ni ta lo a ni.

Kohhran hruaitu te hian hnatlang thingpui buatsaihna leh emergrency Relief atan cheng singruk an hlan nghal a ni.