Vawiin, September 8, 2023 (zing dar 10:00) khan BCM Hall, Serkawn-ah Mizorama Chanchin Tha lo thlen kum 50-na leh kum 100 tlin lawmna chanchin ziakna lehkhabu chu Rev. Dr. Raltawnga, Foremer General Secretary, BCM-in tlangzarhin Pathian hnenah a hlan. Lehkhabu tlangzarh hun hi BCM Headquarters Office zing Devotion zawh-ah neih zui niin, Office a thawktuten an telpui nghal a ni.
Lehkhabu buatsaih dan tlangpui Rev. Dr. Lalzarliana, Director, Communications Department –in sawiin, a tlangzarhtu Rev. Dr. Raltawnga Chhakchhuak-in Lehkhabu chhunga thu awm tlangpui a sawifiah a. Tlangzarhna a neih hnu-ah tawngtaiin Pathian hnenah a hlan a ni.
He Lehkhabu hi Mizorama Chanchin Tha lo thlen kum 50-na leh kum 100 tlin lawmna leh Programme hman dan te, Mizorama Chanchin Tha a lo luh dan te ziakna niin a ziaktute hi Rev. Dr. HS Luaia, Rev. Dr. CL Hminga, Rev. Dr. VL Zawnga, Rev. Dr.PL.Lianzuala, leh Rev. Dr. Raltawngta Chhakchhuak te niin, Pastor Senior tak tak an nih bakah heng Jubilee lawm hun laia nihna pawimawh tak tak chelhtute an ni. Lehkhabu hi phek 139 leh thlalak pawimawh tak tak phek 28 a awm a. Thil chhinchhiah tlak tak tak leh Mizo Kristiante tana Chanchin pawimawh tak tak a awm a ni. He lehkhabu bi BCM Bookroom-ah te cheng 200/-in lei theih a ni.
