Mizoram Thalai Kristian Pawl (MTKP) Rorel vawi 61-na chu Vawiin, February 5, 2015 hian Mizoram Baptist Kohhran Biak In, Rahsiveng, Lunglei-ah neihmek a ni a. Chanchin ziak lai hian Rorel palai 465 an ni. Kumin hi Rampum huap anga Inkhawmpui awm loh kum a nih avangin Rorel palai tura ruat unit aiawh pakhat theuh leh Bial aiawh pahnih theuh bakah MTKP Executive Committee members leh MTKP OB te chu Rorelna-ah hian an tel .
MTKP Statistic-in a tarlan danin tunah hian TKP te hi Pastor bial 77 ah Unit 396 niin, Member hmeichhia – 14987 leh mipa – 25223, an vaiin member 40120 an ni. Tunah hian Rorel Inkhawm neih mek a ni a, Agenda pangngai 31 leh Inkaihhruaina Dan siamthat (Amend) rawtna 11 zet a lut bawk. Agenda langsar zual te:-
1) Kum 2015 chhungin Mizoram khaw hrang hrangah ‘March for Jesus’ neih ni rawh se. (Bawngkawn Bial)
2) Thalai Lal Isua neilo ten Lal Isua an neih theih nan MTKP pum huap Chaw nghei tawngtai neih ni rawh se. (Chawngte Bial)
3) Kristian Chhungkaw din kawngah MTKP-in hma la rawh se. (Mission Vengthlang Bial)
4) Kohhran dang thalai te nen thawhhona tha zawk leh inunauna tha zawk kan neih theih nan MTKP hian hma la se. (Bunghmun Bial)
5) Zu hian ram leh khawtlang, chhungkua leh mimal nun leh kristianna thlenga a tihchhiat avangin, kum 2015 chhung hian zu leh a nghawng that lohna hi inzirtir nise, MTKP-in hma la rawh se. (Buarpui Bial)
6) Ram leh khawtlang nun chhe mek hi siam tha turin MTKP-in hma lak ve ni rawh se. (Thorang Bial)
7) Chhim lama kan Missionary ten Mizoram an rahna hmasa ber ‘Missionary Kai’ (Tlabung) hmun hi a hriatrengna tur MTKP hminga siam ni rawh se. (Tlabung Bial)
Mizoram Thalai Kristian Pawl Reports : 2014-2015
- Rev.Samuel Lalremsanga; Organiser, MTKP.
1. MTKP Inchhiarna 2014-2015 : Mizoram Thalai Kristian Pawl hnuaiah hian Pastor bial 77 kan awm a. Unit 396 niin, Member hmeichhia – 14987 leh mipa – 25223 niin kan zavaiin member 40120 kan ni. Nikum aiin bial 3, unit 7, member 1023 in kan pung a ni. Member tlemna bial te chu (1) Parva – 63 members, (2) Phuldungsei – 83 members, (3) Vaisam – 100 members te an ni a, member tamna bial te chu (1) Bazar – 1717 members, (2) Serkawn – 1491 members, (3) Electric – 1389 members, (4) Lunglawn - 1280 members, (5) Chanmari – 1220 members te an ni. Kumin (2014-2015) chhungin kan member mipa 113 leh hmeichhia 16 (Total – 129) ten ropuina ramah min hawsan a. Nikum aiin member thi kan tlem (nikumah member thi 138). Kumin chhungin dan puitlinga nupui pasal nei tuak 424 (57.06 %) kan awm a (nikumah tuak 347 = 53.46 %). Dante-a nupui pasal nei tuak 319 (42.9 %) kan awm bawk, (nikumah tuak 302 = 46.5 %). Bial 77 zingah bial 74 (96 %) in missionary support an neih thu an report a. Unit 396 atangin unit 231 (58 %) in missionary support an nei bawk. 2016 MTKP inkhawmpui pualin unit 321 (81 %) leh BYFI inkhawmpui 2015 pualin unit 320 (80 %) ten fehchhuah / thehkhawm an nei thei a. 2014 MTKP Thuzir exam buatsaih thei unit 281 (70.9 %) kan ni.
2. Rawngbawlna tlangpui te :
(1) MTKP Rorelnain a rel angin Intodelh tura inzirtirna neih chhunzawm a ni a. Aizawl, Hnahthial leh Lawngtlaiah te Intodelh Seminar buatsaih a ni. Tin, MTKP Report atanga kan hmuh danin kumin chhung khan Intodelh inzirtirna nei leh he mi kawnga hma la thei unit 285 (71.9 %) kan ni.
(2) Cyber Crimes chungchanga inzirtirna neih a ni a. Ronny Lallianmawia, BCM Ramhlun North a mi thuziak chu Unit tinah inzirtir tura thawn chhuah a ni. Cyber crimes chungchanga inzirtirna hi unit 322 (81 %) in kan zir thei.
(3) Ram tana tawngtai tlaivar neih a ni a, June 8, 2014 (Pathianni) zan khan Baptist Youth World Day of Prayer nen hman kawp a ni. Bial leh Unit hrang hrangah kan hmang tha hle. Report atanga a lan danin Baptist Youth World Day of Prayer & MTKP Ram tana tawngtaina hmang thei unit 274 (69 %) kan ni.
(4) 2015 TKP Ramthimni (May 29) leh TKP Day (July 30) te unit hrang hrangah hlung leh hlawk takin hman a ni a. MTKP hruaitu te pawhin unit hrang hrangah sawmna kan hmuh angin hun kan hmang hlawm. Unit 348 (87 %) ten TKP Ramthimni kan hmang thei a, Unit 363 (91 %) ten TKP Day kan hmang thei bawk.
(5) Projector thar Rs 48500.00 (Singli sangriat zanga) man lei thar a ni.
(6) National Ecumenical Youth Assembly (NCCI) Durgapur, W.Bengal-a neihah MTKP atangin palai 8 tirh a ni.
(7) NEICC Youth Assembly Saiha-a neihah MTKP atangin palai 17 an kal a. BCM Choir te pawhin rawngbawlna tha tak an nei thei bawk.
8) Jampui Sakhan Thalai Kristian Pawl (JSTKP) inkhawmpui (Jan 9-11, 2015 @ Tlangsang)-ah MTKP aiawh palai tirin Hnahthial South Bial zaipawl te nen kan kal thei a. Hemi lai vek hian Tripura Baptist Youth Fellowship Conference cum Music Festival (Bishramganj)-ah neih a ni a, Organiser chu speaker atana sawm a nih angin MTKP hruaitu te leh Zemabawk Bial zaipawl te nen an kal bawk.
(9) Bial hrang hrangte thisen pek hun (Voluntary Blood Donation Calendar) siam a ni a, kan tihlawhtling mek zel. Kumin World Blood Donors’ Day khan Aizawl TKP Coordination Committee chuan Aizawl District-a thisen pe tha lawmman pahnihna kan dawng a. Serchhip District-ah TKP Thenzawl bialin lawmman pakhatna kan dawng a, Lunglei District-ah pawh MTKP ten lawmman pakhatna kan dawng bawk a ni.
(10) Krizyhpa Thyutlia Py (KTP) Evangelical Church Of Maraland chuan MTKP nena inkhawmpuia inpalai tawn an duh thu an rawn thlen a, MTKP chuan lawm taka dawngsawngin Fellowship Organisations Dept chuan tihhlawhtlin a nih theih nan Administrative Committee-ah min thlensak a. Administrative Committee meeting No 71 of 29/10/14 chuan MTKP leh KTP (ECM) te inpalai tawn hi min phalsak a, kan lawm hle a ni. Feb 5-8, 2015 chhung hian KTP (ECM) inkhawmpui hi Zawngling-ah neih a ni dawn a, min sawm angin MTKP atanga palai turin Rev Samuel Lalremsanga, Pu R.Lalengliana (Fin Secy) leh Pu R.Lalrintluanga (Lawngtlai) te leh Lawngtlai South Bial zaipawl te an kal ang.
3. Mission lama hmalakna : TKP Bial 74 (96.10 %) leh Unit 231 (58.33 %) ten Mission Support kan kalpui mek a. Kumin khan MTKP Mission Relief atangin Zawlpui khuaa Missionary Nurse Quarters sakna atan Rs 100,000.00 (Nuai khat), MP & MH Field (Korku)-a Dharakot biak in sak tanpuina atan Rs 5000.00 (sangnga), Social Concern Dept hnuaia Nutritional Support for children of HIV infected parents tan Rs 10,000.00 (singkhat) leh BCM State Veng, Vairengte biak in sak tanpuina atan Rs 5000.00 (Sangnga) pek chhuah a ni. MBKHP Chhawmdawlna in (Melte) tan TV tha tak Rs 10,000.00 (singkhat) -in leisak a ni bawk a. BCM Hqrs-in min beisei angin Mission Support Rs 135,000.00 (Nuai khat singthum sangnga) pek a ni bawk. October 29 – November 5, 2015 chhung khan Mission Visit Prog neih a ni a. MTKP hruaitu mi 8 te chuan Assam Rabha area kan tlawh a. Debitola, Mandabari, Birpara leh Jaigoan station te tlawh a ni a. Rabha Baptist Church Union Thalai inkhawmpui kan hmanpui nghal a. Organiser chu speaker pakhat atana an ruat angin Inaugural service (inrinni) leh pathianni zing inkhawmah thu a sawi. Inkhawmpui tanpuina pawh MTKP hmingin kan pe ve.
4. MTKP hruaitu te rawngbawla an zin chhuahna leh zaipawl te : Kumin (2014-2015) chhungin MTKP hruaitu ten heng bialah te hian rawngbawlna an nei tawh – 1) Vairengte 2) Sakawrdai 3) Haulawng 4) Chhipphir 5) Bungtlang 6) Paithar 7) Tlabung 8) ZPMBK (Shillong) 9) Chawngte 10) Phawngpui W 11) Saiha 12) Hrangchalkawn 13) Lawngtlai E 14) Hauruang 15) Serkawn 16) Theiriat 17) Bazar 18) Tawipui 19) Lengpui, 20) Saiha West, 21) Bunghmun, 22) Vathuampui, 23) Kawrthah, 24) Mamit, 25) Hnahthial North. Tin, kumin chhungin khawpui leh thingtlang unit 20 velah rawngbawlna neih tawh a ni bawk.
Bial leh Unit bakah heng inkhawmpui leh prog-ah te hian MTKP hruaitu ten rawngbawlna an nei bawk – 1)National Ecumenical Youth Assembly (NCCI, Durgapur) 2)North East India Christian Council Youth Assembly (Saiha) 3)Hnahthial ABC (Inkhawmpui @ Cherhlun) 4)Kristian Juaing Dol (KJD) Inkhawmpui (Bru Baptist Church, Ngengpuikai) 5)Chakma Music Festival (Chawngte) 6)Lawngtlai Area TKP Meet (Chanmari, Lawngtlai) 7) Baptist Youth Fellowship India Committee meeting (Serkawn & Kolkata), 8) Jampui Sakhan Baptist Association Thalai inkhawmpui (@ Tlangsang) 9) Tripura Baptist Youth Fellowship Conference cum Music Festival (@ Bisramganj)
Zaipawl tha tak takin rawngbawlpui tura kan sawmna te chhangin sum leh pai, tha leh zung leh an hun hlu tam tak sengin MTKP te rawngbawlna min tawiawm thin a kan lawm hle. MTKP chuan zaipawl te rawngbawlna hi a ngaihlu hle a ni. Kumin chhungin heng zaipawl te nen hian kan zinho – 1) Luangmual Bial zaipawl 2) Rahsiveng Bial zaipawl 3) Theiriat Bial zaipawl 4) Lunglawn Bial zaipawl 5) Hnahthial North Bial zaipawl 6) Lawngtlai North Bial zaipawl 7) Lawngtlai East Bial zaipawl 8) Lengpui Bial zaipawl 9) Hnahthial South Bial zaipawl 10) Zemabawk Bial zaipawl 11) BCM Choir 12) Zohnuai Kohhran zaipawl 13) Lawngtlai Bazar Kohhran zaipawl, 14) Lawngtlai South Bial zaipawl ? (la zin tur). Tin, henga kan tarlan bakah hian kum hmasa lamah te pawh zaipawl engemaw zat nen rawngbawlna neiin kan fehchhuak ho thin a. Tin, kan zaithiam (soloist) te pawh kan chhawr rim hle a, an chungah lawmthu kan sawi bawk a. Zaithiam te leh zaipawl tam takin MTKP Programme-a zai tura kan sawmna te min tihhlawhtlinsak thin hi an chungah kan lawm takzet a ni.
5. MTKP hmachhawp lian deuh te :
(1) April 23-26, 2015 hian MTKP chuan “National Baptist Youth Conference 2015” kan thleng dawn a, inbuatsaihna kalpui mek a ni. Hemi atan hian Baptist Youth Fellowship India (BYFI) hruaitu 5 te chuan Sept 11-15, 2014 chhung khan min rawn tlawh a, Serkawnah MTKP ten kan lo mikhual a ni. October 16, 2014 khan BYFI Executive Committee meeting neiin Rev.Samuel Lalremsanga leh Pu Victor Lalrinawma Sailo te Kolkata-ah an kal bawk. Inkhawmpui dawl tura kan ngen BCM Serkawn chuan inkhawmpui pual hian budget Rs 13,00,000.00 (Nuai sawm pathum) chuang an ruahman a. Tin, FOD Committee chuan Budget-a Rs 50,000.00 (Singnga) min dahsak bawk a, kan lawm hle.
(2) October 21-25, 2015 hian Bangkok, Thailand-ah Asia Pacific Baptist Youth Conference neih tur a ni a. BCM atangin zaipawl kal tura tih a ni a. MTKP pawhin TKP member a tam thei ang ber kan kal theih nan hma a la mek a ni.
(3) February 18-21, 2016 hian MTKP Inkhawmpui vawi 46-na chu Lawngtlai-a neih turin inbuatsaihna kalpui mek a ni a. Prog tlangpui pawh buatsaih tawh a ni.
6. Rawngbawlna kawng danga inhmanna : MTKP hruaitu te hi MTKP pawn lamah pawh rawngbawlna hrang hranga inhmang leh hruaitu chan chang kan nei thin a, lawmawm kan ti hle.
(1) MTKP Executive Committee member, Tv Lalhriatpuia Chawngthu team (Horeb Ministry) chu BCM Revival & Evangelism Committee chuan recognized evangelistic team-ah a pawm thar a, kan lawmpui hle.
(2) MTKP Asst Secretary, Pu T.Lalhlimpuia chu North East India Christian Council Youth Assembly (NEICCYA) Vice President a ni mek.
(3) MTKP Organiser, Rev Samuel Lalremsanga chu Baptist Youth Fellowship India (BYFI) President a ni mek a. National Council of Churches in India Commission on Youth (NCCI CoY)-ah Commission member a ni mek bawk.
(4) MTKP Vice President, Pu Victor Lalrinawma Sailo chu BYFI Executive Committee member a ni mek bawk.
7. Thalai Entu : January 16, 2015 khan MTKP leh Thalai Entu Account te audit fel a ni a. Thalai Entu sum dinhmun hetiang a ni.
Thalai Entu Account :-
Opening Balance - Rs 4,04,706.00
Receipt 2014-2015 - Rs 8,78,729.00
Grand Total - Rs 12,83,435.00
Total Payment - Rs 7,13,257.00
Balance - Rs 5,70,178.00
Thalai Entu hi February, 2015 atan copies 12000 (singkhat sanghnih) kan print ta a, nikum (January 2014) khan copies 10887 print a ni a. Kum tin copies sangkhat vel zela pung ang a ni a. Malsawmna tam taka min vurtu Pathian hnenah te, TKP leh Kohhran member, Thalai Entu tana thahnem min ngaihpuitu zawng zawng te chungah lawmthu kan sawi a, Editorial Board hnenah pawh lawmthu kan sawi bawk a ni. (Thalai Entu Audit Statement hi en duh tan Rorelna hmunah hian dah thin a ni a. Office lamah pawh lam zel theih a ni ang).
8. Lusunna : Saiha West Bial TKP Secretary Tv Lalrindika chuan December 30, 2014 khan ropuina ramah min hawnsan a, a kuangah hian MTKP hmingin pangpar dah a ni a. Tin, TKP din chhuaktu te zinga a sulsutu pawimawh tak, Pu Vanlalkunga (kum 87) Aizawl Zarkawt, chuan July 7, 2014 khan ropuina ramah min hawnsan bawk a, a vuinaah hian a kuang chungah MTKP hmingin Pangpar dah a ni a, TKP aiawhin thusawina kan nei bawk.
Tlangkawmna : Pathianin a khawngaihna rawngbawl hna ropui tak min kawltir a. Kan chakna leh theihna, kan thiamna leh finna ten a phak loh thlenga mal min sawmsak thin avangin a hnenah lawmthu kan sawi tak meuh a ni. Hmun tina TKP hruaitu leh member, Krista leh Kohhran tana rinawm leh thahnemngai taka thawk thintu zawng zawng te chungah lawmthu kan sawi bawk a. MTKP rawngbawlnain hma a sawn zel theihna tura inpumkhatna tha tak nena rawng kan bawl zel pawh kan beisei a ni. MTKP hruaitu te hi min fin chhuaha, min tawngtaipui fo turin kan beisei bawk a. Pathianin kan tawngtaina te min chhansak thin avanga a hnena lawmthu sawi chungin rinna leh beiseina thar nen hma lam panin i kal zel ang u. Amen.
