September 19, 2023 (Thawhlehni) khan ‘Our Daily Bread (India) hruaitu te Director - John D. Samuel leh Asst. Director – Moses te chuan BCM Headquarters rawn tlawhin, Rev. R. Lalbiakliana, General Secretary leh Rev. Dr. R. Lalthanmawia -AGS Mission bakah Pu Lalruatkima, Administrative Officer ten lo dawngsawin, General Secretary room-ah inkawmhona an nei
Our Daily Bread (India) hotute hian Intenational level-a an hotu, USA amite tirha lo kal an nih thu sawiin, BCM nena thawh ho dan kawng a awm angem tih thu an rawn thlen a ni. Inkawmhonaah hian General Secertary chuan BCM rawnbgawlna te report tlangpui sawiin, Mission rawngbawlnaa hma a lak dan te a sawi fiah a. Our Daily Bread hruaitute pawhin an rawngbawlna leh hma lak dan tlangpui an sawi bawk.
Inkawmhona tha tak neiin, Thawhho dan tur kawng zawn tha an ti a. Thawhho dan tur te duangin ruahmanna siam ni se, BCM Administrative Committee kal tlangin Assembly Executive Committee leh Assembly ah te la thlen chhoh ni se tiin thu an dah ta a ni.
Our Daily Bread hi Khawvel puma Chanchin Tha puandarh kawnga hma latu lian tak niin, kum 1938-ah Dr. Martin De Haan chuan USA-ah ‘Detroit Bible Class’ tiin a din a, kum 1994-ah Radio Bible Class (RBC) ti-a hming thlakin, 2015 atangin ‘Our Daily Bread Ministries’ tiin a hming a pu leh ta a ni. Khawvel ram hrang hrang leh hnam hrang hrangah Pathian thu chhiar tur leh tawngtai kaihruaina te siamin tawng 58 hmangin ram 150 ah Pathian thu an thawn darh mek a ni. India ramah kum 2003-ah Office Building nghet neiin changtlung takin an in din tawh a, India rama tawng lian deuh deuh - English, Hindi, Tamil, Telugu, Kannada, Marathi leh Malayalam tawng hmanga ziak Bible zirna leh Pathianthu ziakna (Bible Track) te siamin an thehdarh mek a ni.
