Ramrikawn, Pangzawl chuan March 31 - April 1, 2024 khan “Lalpa’n thil ropui tak min tih saka, kan lawm hle a ni” tih Sam 126:3 thupuia hmangin an kohhran din champha phak vawi 50-na (Golden Jubilee) an hmang a. General Secretary Rev. R. Lalbiakliana’n he hun hi hmanpuiin Jubilee lungphun a hawng a ni.

Golden Jubilee lawmna hi March 31 (Pathianni) atanga hmang tannin zan lamah Jubilee meithal lawn leh halmawi te halin hun hman a ni a, April 1, Thawhtanni zing dar 10:00 ah Biak In kawtah Jubilee dar vua-in, dar vuak zawhah kohhranin kum 50 an tlin hriatrengna lungphun, (Golden Jubilee Monument) chu General Secretary-in a hawng a, Biak In-ah lutkhawmin Pathian hnena lawmthu sawi Inkhawm neih chhunzawm a ni.

Rev. Pc Lalmuankima, Bialtu pastor-in inkhawm kaihruaiin tualchhung kohhran secretary – Upa Lalhmachhuana’n kohhran din tirh atanga tun thlenga BCM Ramrikawn chanchin tlangpui leh report a sawi a, bial hruaitute hnen atangin chibaibukna ngaihthlak a ni bawk. Rev. PC Lalmuankima’n Jubilee hriatrengna Souvenir a tlangzarh a, Rev. R. Lalbiakliana’n thuchah sawiin, Bial Zaipawl, KNP Zaipawl, Bial BMP Zaipawl leh Kohhran Zaipawl leh  Nl.Laltanpuiii Pachuau ten zaia rawngbawlna an nei a. BCM aiawha APBYF 2024-a kal tur Zaipawl, Hnahthial South, Hnahth ial North leh Hnahthial Bazar bial atanga thlanchhuah te sawm an nih ang in an zai bawk.

BCM Ramrikawn hi kum 1974-ah BCM Pangzawl atanga indangin an ding tan a,tunah hian Kohhran chhungkua –118 awmin Kohhran member – 611 an awm mek a ni.