July 6, 2024 (Inrinni) khan Rawpui Kohhran Biak In thar chu General Secertary Rev. R. Lalbiakliana’n a hawng. Biak In hawnna programme hi Headquarters atangin General Secretary te nupa bakah - MTKP Secretary- Rev. F. Zorinkhuma, Tv. F. Lalrammawia Production Assistant, Pu Lalruatliana Ralte (Driver) te, Nl. Vanlalrohlui te kalin, Rev. LH Lalmalsawma, Bialtu Pastor te, Bungtlang Pastor Bial hruaitute leh Bial Zaipawl ten an telpui bawk.
Biak In hawn Inkhawm hi chawhma dar 11:00-ah neih niin, Biak In hawn zawh hian Biak In chhungah lutin, Lawmthusawi Inkhawmna leh Biak In thar hlanna Inkhawm neih zui nghal a ni. Inkhawm hi Bialtu pastor Rev. LH Lalmalsawma’n a kaihruai a, General Secretary-in thuchah sawiin, Building Committee Secretary hnen atangin Biak In sak dan report tlangpui ngaihthlak a ni bawk.
He hunah hian Bungtlang Pastor Bial Zaipawl leh Nl. Vanlalrohlui ten fakna hla sa-in rawngbawlna an nei. Inkhawm banah thingpui inhovin, chawhnu lamah Pathian faka zaikhawmna neih a ni a, tlai lamah Biak In thar lawman ruai an kilho a ni. Biak In thar hawn denchhen hian Inrinni zan atangin Pathianni zan thleng, Inkhawm apiangin Bialtu pastor lo ni tawhten thuchah sawiin, Inrinni zanah Rev. LH Lalmalsawma, Bialtu pastor-in thuchah a sawi a, Pathianni zingah Rev. F. Zorinkhuma, MTKP Secertary-in thuchah sawiin Pathiani zanah Rev. Fanai Lalnunmuana’n thuchah a sawi bawk.
BCM Rawpui hi Bungtlang Pastor Bial chhung a awm niin Serchhip ABC hnuaiah awm a. Kum 1918 khan Rev Chuautera hova din a ni a, Kohhran a din tirh hian member 15 an awm a. Tun dinhmunah kohhran member 671 awmin Kohhran Upa 8 leh Upa pension 2 an awm bawk. Rawngbawltu 12 an awm mek a ni.
An Biak in hmasa ber hi Kum 1920 khan sak a ni a. Tuna an biakin thar hawn hi vawi 15 an sak that na a ni. Tuna an hawn tak hi kum 2021 March ni 8 khan Bungtlang bialtu pastor Rev. F. Zorinkhum'an biak In lungphum phumin sak tan nghal a ni. Biak In len zawng hi a dung ft 100 leh a vang ft 49 niin, budget estimate atangin cheng nuai zahnih neiin, tha 4562an seng bawk a ni.
