July 4, 2024 (Ningani) zing dar 10:00 khan Worship Department hmalakna a Solfa leh Music zirna atana an buatsaih thar BCM School of Music chu General Secretary Rev. R. Lalbiakliana’n a hawng.
Hawnna inkhawm hi Rev. ZD Rodingliana, Director Worship Department-in a kaihruai a, Upa Victor Lalrinawma Sailo, Property Director-in room buatsaih dan report tawi pe-in General Secretary-in a hawng a, Rev. R. Lalnunzira’n, AGS-Service-in Pathian hnenah hlanin a tawngtai a. Nl. Rosaline Ramengpari leh Headquarters Office-atangin Live Band- Dindini leh a thian ten fakna hla an sa a, Rev. Lalremsiama Ralte-in lawmthusawi tawngtaina leh malsawmna-in hun a khar.
Music zirna room hi – BCM Worship Department leh Property Department te ruahmanna leh hmalakna niin BCM Headquarters Office Annexed Building Basement-ah siam a ni a. He School of music hi Conductor training nan te, Music leh Solfa zir nan te, BCM Choir hla zir nan te leh Jam room atan music instruments kimchang taka dahin hman a ni ang a, a ṭul angin tih hmasawn zel pawh tum a ni.
Tunah hian Acoustic Drum set, Keyboard, Guitars (Hollow Guitar leh, Electric Guitars) leh violin te dah a ni a, an mamawh tawk light leh sound system dah a ni bawk. He room-ah hian Instruments hmanna tur leh Lecture hall bakah Kitchen leh room dang pakhat a awm bawk.
