August 17, 2014 Pathian Ni hi Mizoram Baptist Kohhran ni pawimawh(Special Sunday), 'Theological Education Sunday' a ni a. He Ni pual hian  Mizoram Baptist Kohhran Biak In tinah hun hman a ni ang a, Headquarters atanga thupui thlansa  “Thu ka pek zawng zawng che u pawm turin zirtir rawh u” (Mathaia 28:20) tih hmangin thuchah ngaihthlak a ni ang,  AICS Report chhiarchhuah leh Tawngtai thupui ruahman sa angin tawngtairualna hun hman a ni bawk ang. Tawngtairual thupui: 1). Lâwmthu sawina: Pathianin AICS hlawhtling tak min dinsak avângin, leh Kawng hrang hranga min hruaina avângin lâwmthu i sawi ang u. 2)   Tawngtaisakna – AICS- thawktu zawng zawngte leh zirlai leh chhûngkua awm zawng zawng tân. 3)   India rama TheologicalCollege hrang hrang a kan Pastor  M.Th leh Doctorate zira Jorhat, Bangalore, Madurai, leh Serampore-a awmte tân. 4)  JubileeBibleSchool tan tura beisei ani. A hun taka tan anih theih nan leh zir tur mi kan neih theih nan Pathian hnenah I dil ang u. ...........................................

THEOLOGICAL EDUCATION SUNDAY lo chhuah dan (August Pathianni vawi 3-na)

Kum 1956 Assembly-ah (Chutih lai chuan Presbytery tih a ni) Phawngpui Bial atangin Serampore College puala chawlhni vawi 1 hman rawtna a lo lut ta a, Assembly chuan  Serampore Collage hminga Pathianni vawi khat hman chu a lo remti ta a. A hun atan  Serampore College dintu William Carey piancham August ni 17  emaw, a hnaih ber Pathianni apiang chu he mi ni atan hian ruat a ni ta a ni. He mi ni hi Serampore College tangkai zia sawi nan te, tawngtaisak nan te hman a ni a. Pathianni zing thawhlawm chu headquarter-ah thawn a ni a. A hlawmin Serampore College tanpui nan pek a ni thin.

Hun a lo kal zel a, tunhma angin kan Pastorte Serampore-ah vek Pathian thu zirin tirh theih leh tirh sen an ni ta lova; India ram chhung Theological College hrang hrangah an lo zir ta hlawm a. Chuvangin Serampore College Ni tih chuan a huapzo tawk ta lova; a hming hi College dang pawh huap vekin Theological Education Sunday tih a lo ni ta a. a hun thuah pawh a changa Pathianni vawi 2-na, a changa Pathianni vawi 3-na hman thin ai chuan Assembly chuan Pathianni vawi thumna hi a ruat nghet ta a. Thawhlawm pawh hmun khata chhun luh vek a rem tak loh avangin Headquarters-a thawn kher lovin Chawlhni tuk dang thawhlawm ang bawkin a zalen ta a; tualchhung Kohhran in a duhnaa a hman theihin a awm ve ta a ni.

Tunah chuan keimahni (BCM) ngeiin Theological College (Academy of Integrated Christian Studies) kan neih tak avangin Pathian thuzir pawimawhna inzirtir nan leh kan College din atana thahnemngai taka Kohhranhote thawk zaho tura infuih tharna ni atan hman a ni taa ni.

.....................................

BCM THEOLOGICAL EDUCATION(BTE) Dinhmun Tlangpui 2014

- Rev.Dr.R.Zolawma, Principal: AICS

Vawiin August 17, Theological Education Sunday hmangtu kan Kohhran member zawng zawngte kan Chhandamtu, theology tluantling kan neih theihna tura ‘Thu tisaa chang’, Isua Krista hmingin chibai ka buk a che u, in lawina tualchhung Kohhran theuhvah hlawk taka he ni hi in hman theih nan duhsakna ka hlan bawk a che u. Pathian khawngaihna leh Kohhranho thahnemngaihna avangin BCM Theological Education chu kawng tinrengin hma a sawn a. Tunah hian Theological Education hmalakna hi kawng thumin a then theih a: 1) Academy of Integrated Christian Studies; 2) Zirna sang (Postgraduate studies), M.Th leh P.hD/D.Th hmun danga zirte enkawl leh 3) Lay Leadership Training /Jubilee Bible School. Heng peng hrang hrang pathuma kumina BTE rawngbawlna dinhmun tlangpui thlirho ta ila.

1. Academy of Integrated Christian Studies (AICS):

Tunah rih chuan BTE hmalakna pui ber chu AICS hi a ni. Kan hriat angin AICS-ah hian programme hrang hrang panga kalpui a ni a, chungte chu- 1) BD course 2) M.Div. 3) Diploma in Mission Studies 4) Diploma in Church Music 5) Ministerial Training (Probationary pastor Training leh Senior pastor te pualin Refresher Course).Tun thla li kal ta chhunga AICS-a thilthleng pawimawhte leh hmalakna chhinchhinchhiah tlak te chu a hnuaia tarlan ang hi a ni.

April 10, 2014-ah zirlai course zirzo tawhte thlahna, Valedictory programme buatsaih a ni a, hetah hian BD 25; M.Div.3; Diploma in Mission Studies 10; Diploma in Church Music 3 te chu thlah an ni. He program min hmanpui turin Rev. Santanu K. Patro, Registrar thar, Senate of Serampore chu speaker atan sawm a ni a, kan sawmna ngaipawimawhin a lo kal a, kan lawm khawp mai. Headquarters-a BCM hruaitute leh Aizawl City chhunga kohhran hruaitu thahnem takin min telpui bawk. Programme hlung takin kan hmang thei a, kan lawm tak zet a ni.

April 23, 2014 khan BD zir tur 24 leh M.Div. zir tur 7 a la thar a, Diploma in Mission Studies zir turin BCM-in missionary thawk lai 10 a rawn tir bawk a, Probationary pastor 8 nen, kuminah zirlai thar 49 kan nei a nih chu. Kumin hi BD leh M.Div. zir tur dil kan neih tam ber kum a ni a, dil 60 vel an awm a, chuta tang chuan kan hostel leh classroom neih dante ngaihtuahin kan lak theih chin sang ber 31 kan la a ni.

BTE chuan AICS-a thawk turin mi thar a hnuaia mite hi a la a:-

1.Assistant Professor in Church Music(Substantive) : Mr.Moses Lalrohlua Sailo 2.Assistant professor in Systematic Theology(Contract): Johny C.Lalhmingmawia 3.Assistant Professor in Missiology (Contract):Miss.Lalhmingmawii Chongthu 4.LDC (contract):Miss T.Lalramdinmawii 5.Driver (Contract): FC. Lal nghaksanga

Pastoral Department-in Rev. PC. Zosangliana, M.Th in Christian Counselling chu AICS-ah a rawn depute bawk a, kan phuisui sawt.Faculty quarters thar: Kum hmasa, 2013-14 Department Income surplus chu Finance Committee-in min phalsak angin Faculty quarters pahnih siam nan kan hmang a, pakhat kan zo fel tawh a, pakhat kan siam mek a, BCM hruaitute chungah kan lawm hle a ni.Retreat: Kum tina tihdan pangngai angin Academic session tan tirhah, June 20-22 chhungin retreat neih a ni a. Speaker atan Rev. Dr. H.M. Songate kan sawm a, seminary-a zirtirtute leh zirlaite mila thusawi a thiam bawk a, kan hlawk tlang hle.

2. Lay Leadership Training & Jubilee Bible School: BCM-in AICS a din hnuah tunhma Jubilee Bible School/Missionary Training Institute hmalakna chhunzawmin Mobile Lay Leadership Training a kalpui a. Kohhran hruaitu pakhatin he Lay Leadership Training a fakna thu ka hriat chu, ‘Tualchhung Kohhran buaina a tireh,’ a ti. Kumin April 30 atangin May 4 thlengin Chhipphir Pastor Bial huapin Chhipphirah kan buatsaih a. Rev. C. Vanlaldika, Dean kaihhruaina hnuaiah hlawhtling takin kan nei a, kohhrana hruaitu nihna chelh mek mi sawmriat lai he trainingah an tel a. Zirtirna pe turin AICS atangin Zirtirtu pali bakah Rev. Dr. Raltawnga Chhakchhuak Lunglei atangin a lo kal a , Musician Miss Joanna Heath leh a thianten min tawiawm bawk.

Amaherawhchu, Mobile Lay Leadership Training chu duh tawk lovin BCM Assembly chuan Mizo Tawnga Pathian Thuzirna tur Jubilee Bible School din a rel a. He project hi a hlawhtlin theihna turin Dean kal chhuak ta, Rev. C. Ngurhnema leh a thawhpui, Rev. Lalthanglianaten chak takin hma an la a. Tunah hian Class room tur peih fel a ni tawh a, Hostel sak mek a ni a, zirlaibute pawh buatsaih mek a ni. Board of Theological Education-in Rev. H. Lalthlamuana chu Dean atan a ruat a, amah tanpui turin zirtirtu pakhat, David Lalkhawngaiha a la thar bawk. Jubilee Bible School hi tun Financial Year chhunga tan hman tura hmalak mek a ni.

3. BTE Hmachhawp, AICS-a Zirna sang, M.Th programme hawn:

India rama theological education than chhoh dan leh Mizoram Baptist Kohhran mamawhna te thlirin AICS-a zirna sang, M.Th programme hawn thuai tula hriatna leh duhna BTE-in a nei a, tichuan, Central Committee leh Assembly Executive Committee pawmpuinain Assembly-ah thlen chhoh a ni a. BCM Assembly 2014, Serkawnah dodaltu awm lovin lungrual takin AICS-a zirna sang hawn chu kan phar thlu a, hei hi Theological Education-a rahbi thar kan kaina tura thutlukna pawimawh tak a ni. Pathianin min hruai zel ang a, a mite tan M.Th programme tha tak min pek ngei i beisei ang u.

4. PTS atangin Khual Tha kan nei:

Kum 2008, Princeton Theological Seminary-a ka awm laiin BCM hruaitute hriatpuiin PTS leh AICS thawhhona thuthlung kan siam a. AICS chu PTS student te Foreign Field education placement pakhat ni se, kan ti a. Tichuan, kumtin 2009 atangin PTS senso vekin student pakhat (duh chuan pakhat aia tam pawh) thla thum chhung AICS-ah practical ministry nei turin a rawn tir a, AICS-in a lo hmang tangkai a, English zirtirtuah kan hmang.

Tunhnai, May 29 khan kan beisei phak loh PTS Associate Director, Rev. Dr. Chester Polk leh a nupui, Mildred-in min rawn tlawh hlauh mai a, kan hmunhma te min hmuhpui tura sum tam tak senga an lo kal hi, an chungah kan lawm tak zet a, anni pawh PTS student lo kal tawhte kan enkawl dan an hriatin an lawm ve hlein kan hria a, kan thawhho zelna turah a tha zawngin nghawng a neih pawh kan beisei. Postgraduate course AICS-ah hawn kan tum thu te kan hrilh a, kan library tihhmasawn kawngah tanpui min tiam nghe nghe a. Tin, June 18-ah PTS zirlai, Briana Wong chu AICS-a thla thum vel practical ministry nei turin a lo thleng chho tawh a. Kum hmasa lama zirlai lo kalte aiin hmel landanah kan inang deuh a, a fel lehzual emaw tihtur a ni.

5. BTE hnuaia Zirna sang hmun danga zir te: Ph.D/D.Th zir te *Rev. C. Vanlaldika (D.Th in OT, UTC *Rev. R. Lalthanmawia (D.Th in NT, UTC *Rev. Rodinmawia Ralte (D.Th in Religion, NIPGTS), *Rev. H. Lalthlamuana (D.Th in Counselling, UTC), *Mr. Andrew Lalhmangaiha (Ph.D in Missiology, USA), *Rev. V.L. Hruaia Khiangte (Ph.D in Hist. of Christianity,msterdam), *Rev. Lalhmingchhuanga Zongte (D.Th in Couns,Kottayam), *Rev. B.Lalramhluna (Ph.D in Missy, SAIACS,Bangalore), *Mr. K.C. Siang (D.Th in NT, ATC, Aizawl), a tan chauh. Deputation-a M.Th zir mek te * Rev. R. Lalrintluanga, M.Th-II in Hist. of Christianity, ETC, Jorhat *Rev. Joe Laldinpuia, M.Th-II in OT, UTC, Bangalore *Rev.Vanlalmuana,M.Th-I in Hist.of Chrisnty., ETC, Jorhat. *Rev. Lalrohlua Pachuau, M.Th-I in NT, UTC,Bangalore.

Zawlnei Jeremiah anga “I thute chu ka ei a, ka tan lawmna leh thinlung hlimna a ni” (15:16) BCM member tinten kan theihnan Pathianin BCM hmalakna theological education malsawm rawh se.