August 4, 2013 (pathianni) hi Mizoram Baptist Kohhran ni pawimawhte zinga mi ‘Thlai thar hlan ni’ a ni a. Mizoram Baptist Kohhran tinah Pathianni Chawhma Inkhawm-ah hemi pual hian hun hman a ni ang.
He ni hi kan hman tan kum tak hriat a har a. Kum 1950 hma lamah pawh an lo hmang tawh tih chu 1950 Assembly minute-ah a hriat theih a. Thlai thar Kut tiin an lam nghe nghe. Mite thinlungah Pathian hnena an thlai thar hlan chakna te, Mim kut an lo hman thinte an lo tlansan tawh bawk nen, Kohhranin thawhlawm lamah nasa taka tan lak tumna a awm bawk a. Finance Committee chuan thawhlawm a lo pun dan tur a ngaihtuah a. Chungte nena tang kawp vekin Thlai thar hlan ni hi a lo chhuak ta niin a lang.
Atirah chuan September thlaah hmangin Pathianni hmasa berah an hmang thin a. Lo, leipui leh huan lama thlai thar remchang apiang thawh khawmin Biak in chhung leh hulhliapah an chhung vum thur a, inkhawm banah lilamin an tiral thin a. Darkar rei fu fu a awh hial thin. Kohhran leh khawtlangin an nghahhlelh hun pawimawh tak a ni hial a ni. Hmun thenkhatah chuan awm ni khamin Innrinniah te hmangin zaikhawm leh ruai hialte pawh an theh a, beirual hunin a zui bawk nen kohhran hlimna hmahruai a ni kum tin fo.
September thla Pathianni hmasa bera an hmang thin hi thingtlang hmun then then atangin thlai thar chuai tawh lam a ni a, a hun sawn hma an rawt thin a (Assembly 1965, 1968, 1971). August thla chhung hi an tinzawn deuh zel a. 1993 Assembly-ah Lunglei North ABC atangin August Pathinni vawi 2-naa sawn rawtna leh Aizawl ABC atangin August Pathianni vawi 1-naa sawn rawtna chu August Pathianni vawi 1-naa sawn a lo ni ta a. 1994 atanga hman ni se tiin a lo rel ta a. Tun thlengin kan lo hmang ta a ni.
Atirah chuan thawhlawm tling khawm chu Headquarters-ah thawn a ni thin a. Ramthim pualah a kal a ni mai thei, Ramthim thlai thar hlan tite pawhin an lo sawi ve bawk. Hetia thlai thar hlan thawhlawm Headquarters-a thawn zel hi titawpa tualchhung kohhran puala dah duhna a lo awm leh a (Assembly 1971, 1984). 1984 Assembly chuan Kum thar, Krismas, Easter Sunday leh Thlai thar hlan ni thawhlawmte chu Headquarters-a thawn tawh lovin Tualchhung kohhran pual atan a lo rel fel leh ta a. 1984 atanga hman tan turin a lo rel ta a. Vawiin thlengin Tualchhung pual a lo ni ta a ni.
Ram hmasawn leh khawsak danglam zelah tunah hi chuan huan leh lo neiha ei zawng kan tlem tial tial a. Khawpuiah phei chuan thlai thar hlan tur nei lo hi chhungkaw tam zawk kan ni hial ang. Heti chung hian Thlai thar hlan ni hi Special Sunday-ah kan hmang zui zel a. Thlai thar hlan tur nei lote pawhin kan thinlung leh kan thil neih hlu dangte hlanna hun atan hmang ila. Pathian miten Pathian kan zawmna leh kan inkungkaihna tithar zeltu chu Thil Hlan Inthawina (Rawngbawlna) hi a ni. Israel-te zingah thil hlan inthawina hi lo awm ta lo se la, Pathian chibai buk kan tih hi Israei-te nunah a khingbai hle ang. Pathian chibai kan bukna, lawmthu kan hrilhna, kan hmangaihna leh kan Pathian a ni a, Ama ta kan ni tih chhinchhiahna pawimawh tak a ni tih hriain kohhranhoten LAWMNA THINLUNG puin i hmang theuh ang u.
