Vawiin, February 3, 2017 chawhma dar 10:00 khan Sap Upa leh Pu Buanga Hall, BCM Office, Serkawn-ah Rev. Dr. Rodinmawia lehkhabu ziak 'Yoga leh Kristianna" tih chu Rev. R. Zohmingliana, AGS i/c Service, BCM-in a tlangzarh ta. Lehkhabu chungchang sawizauna Rev. Pc Liandula, General Manager i/c BCM Publication Board-in a nei. He lehkhabu hi phek 143 a chhah a ni a, BCM Publication Board-in a publish niin Baptist Printing Press-a chhut a ni. Copy khat Rs. 100/- a hralh chhuah a ni ang a, BCM Bookshop-ah te ngaihven theih a ni ang.

Lehkhabu ziaktu

He lehkhabu ziaktu, Rev. Dr. Rodinmawia hi Religion bika doctorate degree nei a ni a. Mizoram Baptist Kohhran Pastor thawklai zinga mithiam senior pawl a ni bawk. He lehkhabu a ziak lai hian Bishop’s  College, Kolkatta leh North India Institute of Post Graduate Theological Studies-ah Religion Department-a Associate Professor ni lai mek a ni.

Rev. Dr. Rodinmawia hian lehkhabu pathum 1) India ram sakhaw lian zual te, 2) Kawng dang a awm em ( Religios Pluralism) tih leh 3) Hindu Firfiak tih te a ziak tawh a. Saptawng lehkhabu – Hindu and Hindutva tih a chhuah tawh bawk. Tunah hian Doctoral Thesis behchhana a ziak “The Unveiled Christ of the Indian Gurus” tih chu Printing Press-ah chhut mek a ni bawk.

Chhuahtu thukhawchang

He lehkhabu chhuahtu Mizoram Baptist Kohhran Publication Board aiaawhin Rev. Pc Liandula, General Manager chuan “Tunlai khawvelin a buaipui zing ami ‘Yoga’ chungchang Rev. Dr. Rodinmawia Ralte ziak an chhuah theih avanga lawmthu sawiin Mizo Kristiante zingah Yoga hian inhnialna tam tak a chawk chhuak a. He lehkhabu hian kan rilru put dan tur leh kan kalpui dan tur tha tak min kawhhmuh thu leh, Mizoram Baptist Kohhran ngaihdan dik tak npawh min hrilh nghal thu a larlang a ni” tiin, “Pathian mihmante thu ziak chhuah theia kan awm hi Pathian hnenah lawmthu kan sawi a ni”, a ti

Lehkhabu ziak chhan

He lehkhabu ziah a nih chhan hrang hrangte chu – (1) Mizoten yoga hi dik tak leh ziktluak deuh hleka kan hriat theih nan; (2) Hmun danga kan Kristian unauten engtiangin nge yoga hi an lo hmuh a, an lo dawnsawn ve, tih kan hriat theih nan; (3) Hindu sakhaw lam thil nia lang thil dang – chal hnawih sen, coconut sawh keh, bati chhit, tih vel te hi Kristiante tan tih chi a ni em tih kan hriat theih nan; (4) Kristiante zinga inhnialna nasa tak thlentu yoga hi Mizoten engtia lo dawn sawn tur nge tih kan lo hriat theih nan te ziak a ni.

Lehkhabu kalphung

He lehkhabu hi hmun thumah then a ni a:

A then khatnaah hian yoga chungchang sawi a ni – a to bul te chhuiin a lo than chhoh zel dan  chhui a ni, tin, yoga chi hrang hrang, a langsar zual leh pawimawh zual te a sawifiah bawk.

A then hnihnaah hian yoga leh Kristian sakhua in nawk vel dan tarlan a ni a. International Day of Yoga a lo irhchhuah dan leh hman a lo nih dan tawite a sawi a. India rama Kristianten yoga hi engtiang angin nge an hmuh tih te a chhui bawk. Khawthlang lama Kristianten yoga an hmuh dan kawng hnihin a sawi a – yoga duhtute leh yoga dotute thlir dan chipchiar ang reng takin tarlan a ni. Kristiante hian engvangin nge yoga an tih (practice) ve thin, tih te pawh uluk taka chhui a ni bawk. Then hnihna tlangkawmnaah Mizoten eng angin nge yoga kan lo dawnsawn ve, tih lam a sawiin, Kohhrante leh Pawl dangten yoga chungchanga Thuchhuah an siamte a tarlang bawk.

Then thumnaah hian Hindu sakhaw biakna lam thil nia lang – chal hnawih sen te, bati chhit te leh coconut sawhkeh chungchang te a sawi ve thung.

He lehkhabu hi a him em ?

He lehkhabu hi chhuah a nih hma hian Kohhran hruaituten uluk taka enin an zirchiang a, duhthusam lo deuh lai nia an hriatte chu siam tha tura rawnin uluk takin a en nawn leh vek a, BCM Publication Board chhuah atana tha tawk nia an hriat hnuin chhuah tura buatsaih a ni ta a ni.

...............

YOGA KAN ZINGAH A LO AWM TA !

Chal hnawih sen, Coconut sawh keh, Bati chhit thlengin...

Mizo Kristiante hi heng thil lakah hian kan inthiarfihlim dawn nge, kan sakhuaah lalutin kan ti kristian zawk dawn ?

He lehkhabu hi chhiar la, ngaihdan siam rawh le