Pathianin Khawvêl a hmangih êm êm a; chutichuan a Fapa mal neih chhun a pê a, Amah chu tupawh a ring apiang an boral loh va, chatuana nunna an neih zâwk nân. Johana 3:16.
Pathian hmangaihna hi Greek \awngin Agape tia sawi a ni \hîn. Hemi awmzia hi \awngkam pakhata sawifiah theih a ni lova, mihring leh mihring inkâra hmangaihna awm thei ang zawng zawng belhbawm vek pawh hian a sawifiah thei lo a ni. Kan Pathian Thu hi chumi hmangaihna chuan mawi takin a vêt kual chhuak chiai a ni. Sawifiah theih a nih loh avângin he leiah hian a \hen pawh kan hre thei lova, chatuan khua a vâr hunah Amah ngei kan hmuh hunah kan la hre dâwn chauh a ni. Paula chuan tihian a sawi "Tûnah zawng dârthlalangah kan hmu riai ruai a ni" tiin he damchhûng hian kan hriat famkim theih loh tûrzia min hrilh (1 Korinth.13:12). Chuti taka hmangaihna nasa chu mihring \awnga sawifiah chi ni hauh lo mahse, tihian lo ngaihtuah ho ta ila.
1. Pathian hmangaihna (agape) chu Mahni inpe ral a ni:
Pathian hmangihna tawp lo hmihringte tâna luang chhuak hi sawifiah theih a nih loh a vângin a taka lantîr loh chuan a fiah lova. Tuarna râpthlâk ber mai tuarin Krawsah khan lantîr a ni. Thihna azawnga râpthlâk leh \ihbaiawm ber mai hmanga lantîr a ni.
2. Mi dangte tâna hmun kenna a ni:
Ephesi 2:5-ah chuan tihian Pathian thuin min hrilh, "Mihringte anga lo piangin, bâwih angah a insiam a, amah leh amah a intitlâwm ta zâwk a" tiin. Heta “intitlâwm" tih hi Greek \awngin "kenosis" a ni. Kenosis chu "hmunkian, mahni aia mi dang dah" tihna a ni. Pathian hmangaihna, Fapa Isua Kristaa lo lang hi, mi dangte hmun kenna a ni. Pathian hmangaihna ropui tak chuan vân hmuna Lal\hutthlêng ropui tak chu min kian a, ropuina tinrêng kan chan theih nân amah chu a intitlâwm mai a ni lo, engmahlovah a insiam a ni. A ropuina tinrêngte chu tûnah hian hmangaihna avângin kan chan tûrin min dahsak a ni.
3. Pathian hmangaihna chuan a ûmzui \hîn:
Pathian hmangaihna ropui tak mai hi Edena huanah khan kan hmu. Khatia kan thlahtuten Pathian duh loh zawng tia, hmêlma setana thu zâwm a, Pathian an uire san khan Pathian hmangaihna chuan hrehawm a tiin a khua a har vawng vawng a ni. A hmangaih mihringte kha mi sual chuan a hnên a\angin a lo pawt \hen ta a. "Adam khawnge i awm" tia kohna awm hi hmangaihna vâwr tâwp, thinlung na ngawih ngawih chunga kohna a ni. An awm dun theih loh hnuah pawh khân a hnawt chhuâk satliah a ni lo. Savun kawrfualte a siamsak a, a hâktîr a nih kha. A hmangaihna a la daih chuan lohziak an hmu. Hmangaihna sawi hleih theih loh thinlung nên a hnawt chhuak a nih kha. Khatih hun lai khan Evi leh Adama hrehawm tihna lêt sang tam tak khan Pathian Engkimtithei, hmangaihnaa khat thinglung chu tihnat leh hliamin a awm a ni. Zâwlnei chuan "Ka mite ka fanu natnaah chuan ka na ve si, ka sûn a, thlaphânnain mi vuan ta" tiin mihringte a hmangaihna avângin lei leh vân Lalber chu a thla a phâng a ni. (Jeremia 8:21)
4. Inchhîra, inlamlêta, ngaidam \hîn hmangaihna a ni:
Pathian hmangaihna danglam thei lo hian eng ang pawhin a mite hi sualin hawisan fo \hîn mah se, an in lam lêt hun a nghâk reng thin. A mite sualna avânga a vaukhânna leh hremna an chunga a thlentîr pawhin hmangaihna avânga thunûnna a ni zêl a, an tawrhnate kha an inlamlêtna tûr atâna hmangaihna nêna hremna leh thununna a ni \hîn.Pathian rilru chhûngril bera a tum chu insiam\hattîr a ni \hîn.( Jeremia 33:7, Ezekiela 18:32, Joela 2:14)
5. Tâwp chin awm lo hmangaihna a ni:
Chanchin\ha Luka ziak 15:11-26-ah hian Fapa tlanbo tehkhhin thu kan hmu a, Bible chhûttu \henkhat chuan he thawnthu (parable) hi "Fapa Tlânbo" chanchin a nih tho laiin "Pa hmangaihna thu a ni zâwk a ni" an ti \hîn. Pathian chuan a hnên a\anga tlân bote chu a hmangaih reng a, a hnêna an kir leh hun nghâkin a thlîr reng \hîn. Pain a fa tlânbo chu engtik lai mahin a theihnghilh ngai lova, engtikah nge a lo hâwn leh ang tih thlîrin nghâkhlel leh lungngai takin a lo nghâk reng \hîn, a fapa a hmangaih tak a rawn kîr leh hma loh chuan pa lâwm a kim thei lo ang hian Pathian chuan a duh loh zawng tia, sual Setana rawngbâwl \hînte hi an inchhîra a hnêna an kîr leh hun a thlîr reng \hîn a ni. Mi sualten inchhîrna thinglung neia, sima a hnêna kir leh te hi Pathian chuan a lo pawm mai a ni lova, a thil neih \ha \haa lo thuamin an tûn hma khawlohna zawng zawng chu theihnghilhin lâwmna ruai nên a lo lâwm \hîn.
6. Phu loh hmangaihna a ni:
Khawvêl mihring ânchhedawng fate zîngah hian tumah Pathian hmangaihna hlawh chhuak tlâk an awm lo. Pathian thu chuan "Tumah mi fel tak rêng an awm lo, pakhatmah an awm hauh lo… a ni lo lamah an pêng ta vek a" (Rom 3:10-12) tiin min hrilh. Pathian hmangaihna hi mihringin a phu êm avânga a dawn a ni lo va, Pathian ziaa awm hmangaihna khan a huap zawh êm avâng zâwkin phu loh hmangaihna chu mihringin Pathian hnên a\angin a dawng zâwk a, khawngaihna luangliam tak meuh meuh a ni zâwk a ni. Kan phu loh hmangaihnaa min hmangaih tlat mai hi a va lâwmawm êm.! Lapa chu fakin awm fo rawh se.
7. Pathianin min hmangaih avângin inhmangaih tawn tûr kan ni:
Kan sawi tawh ang khan Pathian hmangaihna hi a nasat êm avângin a dawngtu nunah a lang chhuak ngei ngei \hîn. Huatna leh îtsîkna thinlung chu duhsakna leh hmangaihna thinlungin a lehsak \hîn. (Ezeliela 36:26) Hei hi Lal Isuan a ngai pawimawh êm êm a, hmun tam takah inhmangaih tawn tûr kan nihna min hrilh a nih kha. A zirtîrte hnêna thupêk thar a pêk pawh kha inhmangaih tawnna thupêk a ni. Ti hian min hrilh "In inhmangaih chuan mi zawng zawngin ka zirtîrte in ni tih chumiah chuan an hria ang, tiin. He inhmangaihna hi mak tak maiin mihringin a tum leh a zawn pawh ni lovin Pathian mi tak takte zîngah chuan amahin a piang mai \hîn. Mihring siam chawp inhmangaihna leh induhsakna chu a tlo lo va, a daih rei lo bawk \hîn. Pathian a\anga chhuak hmangaihna erawh chuan a daih rei a, belhchian a dâwl \hîn.
Khawvêl hi hmangaihna leh hmangaihtu zawngin a tuihâl ngawih ngawih a, Pathian mite inhmangaih leh inrem taka khawsaho an hmuh hian khawvêl mite hian Pathianah tuihâlna leh Lal Isua pan duhna an lo nei \hîn a ni. Chuvângin ringtute kan nihna zînga ropuiber mai chu inhmangaihtawnna hi a ni, tih kan hriatreng a \ûl hle a ni. Hmangaihnaa phuar beh Kohhran leh chhûngkua chu a nghing ngai lo va. Lal Isua mawina an târlang deuh deuh zâwk \hîn a ni.
Tlângkawmna:
Tûn lai khawvêl hun tâwp dâwn lamah hian Pathian thuin a sawi angin hmangaihna a lo dai zova, mahni hmasialna leh duhâmnain kan lo khat zo ta. Hetih hun laiah hian ringtute chhinchhiahna ropui ber, hmangaihna nun hi kan vawn nun reng a va pawimawh êm. Heti hian i \awng\ai \hîn ang u
“Lalpa i hmangaihna ka hriat fiah deuh deuh theih nân min pui la, i hmangaihna zârah mi dangte pawh ka hmangaih theih nân min pui ang che" tiin.
