Rev. R. Lalbiakliana

 

Kum 1960 December 14 khân Upa RC. Thiauva (Renthlei) leh C. Kapsangi (Chhangte) te fa sâwmna ni tûrin Muallianpui-ah a piang a. Unau sâwmpakhat, mipa pariat leh hmeichhe pathum an ni. Mizoram buai hnu kum 1968-ah S.Vânlaiphai-ah sawikhâwm avângin an pêm. Kum 1972-ah Pastor Lâwmsângan Muallianpui-ah baptisma a chantîr.

 

Zirna lam: 1968-1972 - S.Vanlaiphai & Thingsai P/S. 1973-1975 - S. Vanlaiphai Middle School. 1976-1980 - S. Vanlaiphai High School. 1980-1984 - Lunglei & Aizawl College, Aizawl.

A naupan lai leh tleirâwl laiin nungchang tha leh zûk leh hmuam pawh ti ngai lo a ni thîn. Zirna lamah pawh rual a pâwlin pâwl sâwm a nih thlengin term exam-ah chuan pakhatna deuh hlir a ni thîn. Chumi hnuin a nun a inthlahdah ta deuh a, kum 1987-ah Pathian hmuh chianna a nei ta a ni. Kum 1991 July 15-ah Irene Colbert nên an innei a, Pastor F. Lalchungnungan Bethel Baptist Biak In, Chanmari, Lunglei-ah a inneihtîr a, fanu pakhat, fapa pakhat leh tunu pakhat an nei.

A naupan deuh lai atangin a chhûngte’n Pastor ni tûrin an beisei a, mahse zirna lama rualawt tak a nih avangin I.A.S nih hi a tum ber a ni thîn. B.A. a zawh hnuin IAS coaching class kal tûrin phai lam a pan a, mahse chuti lam chu tipuitling lovin a tînsan ta a ni.

B.A. a zawh veleh S.Vânlaiphai High School a thawk tûrin sâwm a ni a, a thawk nghâl a. Kum khat a thawh hnuin lehkha zir leh tumin a hna chu a bânsan a, mahse Muallianpui-ah High School dinpui tûr leh Headmaster tûra an sâwm tlat avângin 1985-1987 thleng a thawk leh a, chumi hnuin Full time-a rawngbâwl tûrin a inbuatsaih ta zâwk a ni.

Rawngbâwlna lamah chuan a naupan leh that laia KNP hruaitu a nih leh TKP-a Committee member leh zaipâwl-a a tel mai bâk chu rawngbâwlna chanpual a nei tam lo. Kum 1987-ah Pathian hmuh chianna tak leh Lalpa rawngbâwl tûr a nih inhriat chianna a nei a. Rawngbâwl dan tûrah Pathian leh Upate rawnin ngun taka a ngaihtuah hnuah kohhran châwmin 1988-1991 chhûng Union Biblical Seminary (UBS) Pune-ah B.D. a zir ta a ni.

Fulltime-a rawngbâwlna a chelhte:

1991-1993 - Pro. Pastor, Lawngtlai ‘S’ Bial.

1994 - Serkawn Assembly-ah Minsiter atan Rev. Raltawngan a ordain.

1994-1996 - Bialtu Pastor, Lawngtlai ‘S’ Bial

1996-1997 - Buarpui Bial

1998-2001 - Secretary, MTKP.

2001-2004 - Organiser, MTKP. & Director, FOD

2002-2004 - KNP Promoter (MTKP Org. nen a kawp)

2004-2005 - Programme Organiser, SAC

2005-2006 - Bialtu Pastor, Kolasib Bial.

2006-2010 - Bialtu Pastor, ZPMBK, Shillong.

2010-2013 - Director, Fellowship Organisations Dept.

2013-2016 - Lunglawn Pastor Bial

2016-2019 - Executive Secretary, Lawngtlai Area

2019 - 2022   - AGS - Service

2022-2025 - General Secretary

Lawngtlai South Biala a luh tirh hian Bial hawn thar a ni a, Pastor indaih lohna avângin, Bial charge a la nghâl. Social Action Committee hi Assembly hna hawn thar a ni a, HIV/AIDS vênna lam hawia thawh a ni deuh ber.

Infiamna a ngaina hle a, Hockey leh Football te pawh a khêl thîn. A tuina ber erawh chu Badminton a ni. Rawngbâwlna lamah zai leh lâm te Thuhril te hi nuam a tih zâwng a ni. Speaker nia rawngbâwlin Mizoram hmun hrang hrangah te, Manipur leh Tripura-ah te a kal thîn. Salvation Camping, Crusade leh Inkhâwmpui Speaker niin Kohhran tam takah hun a hmang tawh bawk. Baptist World Congress 2000 hmangin Melbourne, Australia-ah an nupa a kalin Thailand-te an fang nghâl bawk.

Pathian thu a ngainat êm êm chu Sam No.103:1-5 “Aw ka nunna Lalpa chu fak la, ka kawchhûnga awm zawng zawng te u a hming thianghlim chu fak rawh u…” tih hi a ni. Hla-ah chuan KHB No.149 “Lal Isua chakna a innghatin…” tih hi a duh êm êm a ni.

ATTACHMENTS
Baptist Higher Secondary School-in Zirlai tithate chawimawina an hmang

Baptist Higher Secondary School-in Zirlai tithate chawimawina an hmang

Baptist Higher Secondary School. Serkawn chuan May 17, 2024 chawhnu dar 1;30 khan Tucker Hall, BHSS-ah Mizoram Board of School. Education-in HSLC result a tihchhuah a an school atanga zirlai tithate chawimawina programme an hmang. …

NEICC 4th Biennial Session-h BCM aiawh an kal

NEICC 4th Biennial Session-h BCM aiawh an kal

May 17-19 hmang hian North East India Christian Council (NEICC) 4th Bennial Session  chu Jalukie Town Local Baptist Church, Nagaland-ah neih mek a ni a. He Inkhawmpui-ah hian Rev. R. Lalnunzira, President, NEICC te, Rev. ZD Rodingliana, Exe.Committee member te, Rev. Dr. Lalzarliana – Peace and Justice Committee, Upa Lalzirmawia, Executive Committe member te lehBCM aiawh palai member 7 kalin BCM Choir te pawh zaia rawngbawlin an kal bawk. …

Haulawng Pastor Bial-ah Tleirawl Pual Meet neih a ni.

Haulawng Pastor Bial-ah Tleirawl Pual Meet neih a ni.

May 10-11 hmang khan Haulawng Pastor Bial Sunday School Committee buatsaihin BCM Biak In, Hnachang, Zotuitlang-ah Tleirawl Pual Meet neih a ni a, Speaker-ah Upa Pc Vanlalrova, Sunday School Trainer an hmang. …