Bualte leh Ṭhualṭhu khaw inkara lei min nasa tak avanga khualzin tangkhangte chhawmdawlna atan BCM chuan Charity Fund aţangin khawtlang hruaitute hnenah thilpek an hlan. Bualte leh Thualthu inkar leimin hi July 7, 2026 (Thawhlehni zan) ruahsur nasa tak khan lei ti minin, kawng a ti pinga, a tuk tlai aṭangin khawtlang hian ei leh in tur ngaihtuahsakin an buaipui nghal a ni.

Hlanna hun hi Rev. RC Lalthanzama Director, Relief & Development Department-in a kaihruai a, Rev. Lalzarliana Khiangte, Administrative Officer, BCM chuan vawiin, July ni 10, 2026 zirtawp ni hian Bualte khawtlang tan Rs. 35,000 leh Ṭhualṭhu khawtlang tan Rs. 15,000 a hlan a ni.

BCM hruaitute hian lei min hi a hmunah tlawhin Bualte leh Ṭhualṭhu khawtlang mipuite rawngbawlna chu fakin khualzin tangkhangte laka an chet dan chu a Pathian thu hle a ni tih sawiin BCM hruaitute pawhin an inpekna ropuizia an hriatpui tih an sawi.

BCM hruaitute hi Rev. RC Lalthanzama Director, Relief & Development Department; Rev. Lalzarliana Khiangte Administrative Officer; Tv. PC. Lalrinmawia Production Asst. leh Tv. Lalramnghaka Hnamte LDC-te kalin, BCM hruaitute hi Bialtu Pastor, Rev. Vanlalhruaia leh Upa Lalthlangliana Sailo, Hrangchalkawn Bial Secretary ten a tawiawm a ni.

Tunah hian Bualte leh Thaizawl inkar kawng leimi avang hian Lirthei hi 180 bawr vel tangin, mi 400 vel an tangkhang a, Bualte leh Thualthu khawtlang mipuite leh khawtlang hruaitute inpekna zawng zawngah BCM chuan lawm thu a sawi tak meuh a ni.