March 8, 2023 (Nilaini) zan atang khan Mizoram Baptist Kohhran Rorelna sang ber – Assembly vawi 127-na chu BCM Biak In, Salem, Lunglawn Pastor bial-ah neih mek a ni a, thupuiah Sam 22:28  thu  “Ram chu Lalpa ta a ni” tih chu hman a ni. March 8 (Nilaini) zan-ah Pathian Biak Inkhawm neih a ni a,  President Rev. Dr. R. Zolawma’n Assembly hawngin, Inkhawm a kaihruai nghal a, General Secretary Rev. R. Lalbiakliana’n Palai lawmna neiin Rev. C. Lalrochama’n thuchah a sawi a, Bial Zaipawl pathum – Chanmari Bial, |awipui Bial leh Lungsen Bial zaipawl te an zai bawk.

Assembly Rorel Ni hmasa berah Rev. Dr. R. Zolawma, President chuan tanna leh hunserh a hman zawhah President thar Rev. KV Thanga hnenah charge hlanin Rorelna dawhkan a kian a, President thar hian Assembly Rorel a kaihruai nghal a ni.

Hun hmasa lamah Palai lawmna leh Palai inchhiarna neih a ni a, 2022 Assembly leh March 8, 2023 inkara Pastor -1 leh Kohhran Upa 84 chatuan ram pan te, sunna neiin, Assembly hmingin sunna leh tuarpuina thawn ni se tih a ni. Kum 2023-2024 President Elect atan Rev. F. Ramdinmawia, Bialtu Pastor, Shillong Pastor Bial chu thlan a ni.

General Secretary – Rev. R. Lalbiakliana, Rev. Dr. R. Lalthanmawia, AGS Mission leh Rev. R. Lalnunzira, AGS Service te’n an Department chan theuh report an pe a. Upa C. Hrangdula, BCM Statistician-in kum 2022 BCM Inchhiarna report pe-in, tun dinhmunah BCM hi ABC 16 awmin, Pastor Bial 92 leh Tualchhung Kohhran 680 an awm mek a, Kohhran member zawng zawng 1,76,404 niin, kum hmasa aia member punna chu 2,452 a ni.

General Secretary-in April 2022 – February 2023 BCM Thawhlawm (Target) hmuh dan tarlangin,  Thla 11 atana thawhlawm hmuh beisei zat cheng nuai 7236, sing 5 leh 583 (Rs.723,650,583/-) a nih laiin thla 11 chhunga hmuh tawh zat chu cheng nuai 7602, sing 3, sang 1 leh 59 (Rs.760,231,059/-) a ni a, thla 11 chhunga Target khumna hi cheng nuai 365,sing 8 leh 476 (96.30 %) a ni a, thla 11 atana target khumna percent chu 4.63 a ni.

Rorel Ni hmasa berah hian Assembly Nomination Committee in Assembly Committee peng hrang hranga member tur a ruat te, auditors ruatna leh palaina tur hrang hranga palai tur a ruat te pawm a ni a. Zomi Baptist Churches of America (ZBCA) nen thawhhona neih te, Chin Baptist Association of North America nena thawhho dilna te remtiin pawm a ni a, Baptist Mission School, Chawnpui Tlabung High School-a hlankai rawtna te pawm a ni bawk. Tin, Medical & Health Department atanga thawktu 28 te dah ngheh rawtna te, BCM hnuaia thawktu mi 5 hna sang zawka hlan kai tura chhawpchhuah te, hna thawktu Pension-a chhuak tur report te thlirin an pawm a, BCM Assembly Hall/Convention Hall sak tura ruahmanna leh Tualchhung Kohhran-a Appeal siam dilna chu thlirin an pawm bawk.

Assembly Rorel hi Zirtawpni leh Inrinni-ah te neih chhunzawm a ni ang a, zantin Pathian Biak Inkhawm leh Zing kar Bible Study leh Tawngtai Inkhawm neih thin a ni ang, March 12, 2023 - Pathiani zing Inkhawm-ah Pastor 5 nemngheh an ni ang a, Pathianni chawhnu-ah Lalpa Zanriah kil hovin Pathianni zan inkhawm banah  Assembly an tiak ang.