May 2, 2023 (Thawhlehni) hi Baptist Kohhran Hmeichhe Pawl (BKHP) din champha phak vawi 85-na a ni a. He Ni hi BKHP Unit tinah hman a ni. Mizoram BKHP chuan he Ni hi Khawtlang tana mi tangkai ni tura inzirtirna leh thiltha tih nana hmang uar tura chahin Bial leh Unit tinte hnenah ngenna a siam a. Unit tam zawk chuan MBKHP-in a duh dan angin, zingkarah mahni awmna veng leh a chhehvel tifaia hnatlang an nei.

Chhun lamah pawh a remchan danin Vantlang hna thawka hnatlangin chawhnu lamah Khawtlang hmasawnna lam inzirtirna hun atana hmang an awm a, tlaiah BKHP Day lawmna ruai theh pawh engemawzat an awm bawk.  Zan lamah BKHP Day pual hian Inkhawm neih leh a ni bawk. MBKHP hruaitute pawhin Unit hrang hrangah BKHP Day hi an hmanpui a ni.

Baptist Kohhran Hmeichhe Pâwl (BKHP) hi Kohhran chhunga Pâwl (Fellowship) din hmasak ber niin, thlarau lam rawngbâwlna-ah pawh kohhran hnuk leh chelh mar tlattu pâwl tangkai tak a ni. Kum 1938 March thla ah BMS Missionary Pi Zirtiri (EM Chapman) hovin Girls Auxiliary (GA) Assembly hriatpuina leh kaihhruainain din a ni a, GA hian chhungkaw tanpui ngaite tanpui chu an tum ber pakhat a ni. GA member hian nula chauh a huam a vangin duhkhawp lohna a lo awm ve leh a, Kum 1947-ah Nu Pawl chu din a lo ni leh ta a.

Chutianga hmeichhe zinga pawl pahnih lo ding ta chu Assembly chuan fel tawk lova hriain, pawl pahnihte chu pawl khatah dahin March 20, 1965-ah chuan BKHP tih hmingpu-in pawl khatah a chhung khawm ta a. BKHP din ni atan chuan March 20, 1938 chu hman a ni. He p^wl hian Baptist Kohhrana hmeichhia zawng zawng, kum 14 chung lam, a duh apiang chu a huap ta vek a ni. 

MBKHP Executive Committee chuan “Mizoram Baptist Kohhran hmeichhe rawngbawlna awmze neia a din chhuahna chu May 2, 1938 hi a ni e,”  tiin, General Committee-ah May 2 chu BKHP Din ni atan hman turin a thlen a. kum 1990-ah an dilna hi remtiin, BKHP dinni atan May 2, 1938 chu pawm a lo ni ta a ni.

Mizoram Baptist Kohhran inchhiarna thar ber, Statistical HandBook 2022-2023 in a tarlan dan in BKHP hi Mizoram leh Mizoram pawn hmun hrang hrang Pastor Bial 92-ah Unit 457 din a ni tawh a, member 33,364 an awm mek a ni.