November 7, 2016 (November Thawhtanni hmasa ber) hi khawvel pum huapa Baptist Kohhran inzawmkhawm (Baptist World Alliance)-a Nuho (Womens Fellowship) ten kum tin tawngtairual an neih ni a ni a. Mizoram Baptist Kohhran Hmeichhe Pawl (MBKHP) pawhin hei hi zawm vein Thawhtanni chawhma dar 10:00 atangin BKHP Unit tinin Tawngtai programme hi an hmang dawn a ni. He Tawngtai rual thupui atan hian Tho la, Engrawh. (Isaia 60:1)  tih a ni ang.

Tawngtai hi tum 7 neiin, a kar laka khawvel huapa an hruaituten thuchah/testimony an ziak te ngaihtlak leh Bible Study te neih a ni bawk ang. Hetiang hi programme tlangpui chu a ni:

Hun hman dan tur :  

Tanna	:	Chairman
Thuchah pakhatna	:	President, BWA Women’s Department hnen atangin.
Tawngtai vawi 1-na	:	Pacific Chhimthlang lama Baptist Hmeichhe Pawl tan
Thuchah pahnihna	:	America hmarlam Baptist Hmeichhe inzawmkhawm Pawl President hnen atangin.
Tawngtai vawi 2-na	:	Africa rama Baptist Hmeichhe Inzawmkhawm  Pawl tan.
Hla sak hona	:	Hla sak chhhungin Thilpek lakkhawm nise.
Tawngtai vawi 3-na	:	America hmar lama Baptist Hmeichhe Inzawmkhawm Pawl tan.
Thu inchhiar chhawk	:	Kan chhehvelah hnathawk tura koh kan ni.
Tawngtai vawi 4-na	:	Latin America-a Baptist Hmeichhe inzawmkhawm Pawl tan.
Testimony 1-na	:	Elaine Pearson, Phoebe/Phoibi pawl, Lebanon, USA
Tawngtai vawi 5-na	:	Asia rama Baptist Hmeichhe Inzawmkhawm Pawl tan
Bible Sudy	:	Hreawm a tuar hnua Paula lawmna (2 Korinth 1:3-7)
Chhiar tur	:	Kan tawngtai ni hman dan, hmasawnna kan lo neih dan leh thawhlawm chungchang.
Tawngtai vawi 6-na	:	Caribbean Baptist Hmeichhe Pawl Inzawmkhawm Pawl tan
Testimony II –na	:	Carol Owen-Brandford, Ontario, Canada
Tawngtai vawi 7-na	:	Europe rama Baptist Hmeichhe inzawmkhawm Pawl tan
Hla sak hona leh tawpna.	:	Chairman.

 

TAWNGTAI THUPUI.

Tawngtai vawi 1-na : Pacific chhimthlang Baptist Hmeichhe inzawmkhawm Pawl tan : 1. Australia-a hmeichhe hruaituten hma an lakna kawng hrang hrangah Pathian hruaina an chan zel theih nan. 2. Papua New Guinea (PNG) ram chhung hmun hrang hranga Hruaituten ruahmanna thar nena hma an lak theih nan leh he rama Baptist hmeichhia hna hrang hrang thawktuten an chhungkua-ah leh an hna thawhna hmunahte malsawmna an lo nih a, an engte an enchhuahtir theih nan. 3. Fiji thliarkara naupang leh tleirawlte zinga sual hnathawh, an nuna harsatna thlentu tihreh a lo nih theih nan, a bik takin nu leh pate leh rawngbawlna neituten chak zawka rawng an bawl theih nan. 4. New Zealand-a drug leh zu vanga chhungkua leh khawtlanga buaina lo awm thin dona kawngah sawrkar hmalakna chak zawka a kal theih nan. Heng dona kawnga Baptist Hmeichhiate hmalaknaah i tawngtaipui bawk ang u. 5. Papua khawthlang lam rama Baptist Hmeichhiaten kawng hrang hranga harsatna an tawhnaah chak tak leh lungrual taka hma an lak theih nan leh he ramah hian Pathian mi hruaitu ram leh kohhranah an neih theih nan. 6. Pacific chhimthlang lama Baptist Hmeichhe inzawmkhawm Pawl Hruaituten huaisenna leh tih tak zeta tawngtaina an lo neih a, inlungrual tak leh thahnemngai taka hruaitu hna an thawh theih nan.

Tawngtai vawi 2-na : Africa rama Baptist Hmeichhe inzawmkhawm Pawl tan : 1. Africa ram Baptist Hmeichhia-ten inkhawmpui 2017, August ni 24-25 chhung hian an nei dawn a, hemi atana hma latu zawng zawng tan, ruahmanna fel leh tha tak an neih theih nan. 2. Africa-a Baptist Hmeichhiaten retheihna nuaibona kawngah nasa lehzuala hma an lak theih nan. 3. Africa rama Baptist Hmeichhiaten thilpekah hma an lo sawn theih nan. 4. Africa-a natna tam tak-Ebola, Cancer, HIV/Aids-te a lo rem theih nan. 5. Nigeria hmarlam leh Cameroon hmarlamah BoKo Haram (Mosolman hel pawl)ten nasa takin harsatna an thlen a, a bik takin Kristian hmeichhiaten man, sawisak leh tihduhdahna thih thlenga an tuar avanga hlauhthawnna nei-ten Pathian thlamuanna an lo neih theih nan. 6. Africa-a Baptist Kohhran hruaituten Pathian tihna tak tak an lo neih theih nan. 7. Rual tlang taka mitinte hnenah chanvo sem tlan a lo nih theih nan Africa ram pumpui tan i tawngtai ang u.

Tawngtai vawi 3-na : America hmar lama Baptist Hmeichhe inzawmkhawm Pawl tan : 1. America hmar lama Hmeichhe pawl hrang hrang 17-te tan finna te, hriatthiamnate leh ruahmanna tha an lo neih theih nan. 2. Kum 2016 khawvel pumpuia Baptist Hmeichhiate a ruala kan tawngtaina hi Pathian ropuina a lo nih theih nan. 3. Khawvel pumpui Baptist Hmeichhe inkhawmpui Africa chhim lama neihah Hruaitute inhmuhkhawmnaa kal America hmar lama hmeichhiaten hlawk zawka an thil hmuh leh hriatte rawngbawl nan an hman theih nan. 4. Tihluihna avanga mihring ram danga an thawn thinte tihtawpna kawngah America hmar lama Baptist hmeichhiaten hma an lak theih nan. 5. Kum 2017, October-a America hmar lama Baptist Hmeichhe inkhawmpui lo awm tur a hlawhtlin theih nan. 6. Khawvel pumpui Baptist Hmeichhe tawngtai ni lo awm tura an inbuatsaihna a lo hlawhtlin theih nan.

Tawngtai vawi 4-na : Latin America-a Baptist Hmeichhe inzawmkhawm Pawl tan : 1. Latin America-a Baptist Hmeichhiaten rawngbawlna chak tak an neih zel theih nan. 2. Latin America-a Baptist Hmeichhiate khawtlang tan malsawmna anlo nih theih nan leh he rama hmeichhia leh naupang tihduhdahna leh nghaisakna tuartute tan. 3. Latin America-a pawl hrang hranga Hmeichhe hruaitute Pathianin anmahni kaltlanga remna leh muanna a lo lantir theih nan. 4. Latin America-a radio, television leh chanchinbu hrang hrangte hmanga Pathianin hna a thawh theih nan leh he ramah hian zalenna leh thlamuanna a lo awm zel theih nan. 5. Latin America-a Baptist Hmeichhiate-Missionary, Pastor, Pastor nupui leh thawktu hrang hrangten an rawngbawlna tha taka an thawh theih nan leh anmahni hmanga Pathianin kawng hrang hranga A eng a tihen theih nan. 6. Latin America-a Baptist Hmeichhiate he ramah leh khawvel hmun hrang hranga mite tan enna an lo nih theih nan.

Tawngtai vawi 5-na : Asia Khawmualpuia Baptist Hmeichhe inzawmkhawm Pawl tan : 1. Asia rama Baptist Hmeichhiaten an ram mamawhna ang taka rawng an bawl theih nan. 2. Asia rama Baptist Hmeichhiaten kum upa lam, tar chak lo leh naupangte hnenah rawngbawlna hlawhtling tak, an mamawhna ang taka an neih theih nan. 3. Asia rama Baptist Hmeichhiaten hriselna lama rawngbawlna hrang hrang – Aids leh natna hrang hrang dona kawngah nasa taka hma an laktheih nan. 4. Asia rama Baptist Hmeichhiaten khawtlangah tihtur pawimawh tak an nei theuh a ni tih an inhriat theih nan. 5. Remna leh muanna kawngah Asia rama Baptist Hmeichhiate hmalatu an lo nih theih nan. 6. An chenna In leh lote a lo thianghlim zawk a, bawlhhlawh paih dan leh ei leh in tih thianghlimna kawngah te, chaw tha, thlai chin uar kawngah te, thing phun uar kawngahte Asia rama cheng Baptist Hmeichhiaten tun aia tan an lak lehzual theih nan.

Tawngtai vawi 6-na : Caribbean thliarkara Baptist Hmeichhe inzawmkhawmPawl tan : 1. Dominica rama thli na tak hurricane Erica an tih mai tuartu zawng zawngte Pathianin an mamawhte a pek a, anmahni kea an lo din leh theih nan. 2. Caribbean rama chengten harsatna an tawh-hnathawh tur vangte leh ei leh bar harsatnate karah pawh Kristian nun dan mawi an lo neih zel a, heng an harsatnate sutkian a lo nih zel theih nan. 3. He rama thalai tam tak an zirna kawnga pawisa lam harsatna tawktute tan. 4. Caribbean thliarkara hmeichhiate inkarah remna leh muanna a lo awm theih nan, Pathian ropuina a lo lan zel theihna tura inlungrual taka an thawehho zel theih nan. 5. Caribbean rama cheng Kristian hmeichhiaten Pathian tan an eng an tihen zel theih nan. 6. Caribbean rama cheng hmeichhiaten chakna thar an lo neih a, an puan in hmunte an lo tihzau zel theih nan.

Tawngtai vawi 7-na : Europe rama Baptist Hmeichhe inzawmkhawm Pawl tan : 1. Europe rama Kristiante, Pathian duh dan anga an kalzel theih nan leh Europe ram chhung tiengtu an lo nih thei nan. 2. Europe rama Kristian hmeichhiaten Pathian hmangaihna an lo tarlan zel theih nan leh midangte tana malsawmna an nih theih nan. 3. Europe rama cheng zawng zawngtenl mitin hnenah Lal Isua hmel kawng hrang hranga an lo tarlan lehzual theih nan. 4. Europe rama naupangte leh tleirawlte midangte tan malsawmna an lo nih ve theih nan. 5. Hmeichhia tar chaklo leh tleirawlten chak zawka an theihna zawnah rawng an bawl theih nan.

...............................

BAPTIST WORLD ALLIANCE HMEICHHE TAWNGTAINI, 2016 Thupui : Tho la, Engrawh. (Isaia 60:1)

‘Lal Isua tana kan lo penchhuah hian keimahni-ah A eng chu a lo engchhuak thin.’ ‘Mimal, chhungkua, khawtlangahte Lal Isua tan tho la eng rawh.’

Thuchah pakhatna : Khawvel pumpuia Baptist Hmeichhe inzawmkhawm Pawl President hnen atanga thuchah 

Khawvel hmun hrang hranga ka unau duhtakte u, vawikhat chu conference-naah hmeichhiate tihduhdahna leh tuarna chungchang hi Nancy Murphy, Family life today-a an Director ni lai mek nen kan sawi dun a. Kum tam tak liam tawh a Croatia (Khrawsia) ram kha kan sawi deuh ber a. Croatia rama hmeichhia 64% (zaa sawmruk pali) zet thingtlanga chengte chu an pasalten an vaw thin nia hriat a ni a, chu chu an pasalte duh dan anga an awm loh vang a ni. Chung thil thleng chu pawi i ti em? Hetiang hi a thleng tur a ni lo asin. Mihringte hian tihduhdahna leh innghaisakna hi kan tuar tur a ni lo. He thil hian ka ngaihtuahna a ti kal thui hle mai a, tihian ka ngaihtuah ta a, ‘Engtinnge Baptist Kohhran tlemte hian chung chu a tihdanglam theih ang?’ tiin. Chung zawng zawng hnuah chuan Croatia chu sawrkar pakhat, communist-in a kaihhruaina hnuaiah kum sawmnga (kum 50) chuang a awm leh ta a ni. Kohhran chu te tak te angin, hriat tham mang lohvin a awm a, khawtlangah mite ngaihven a hlawh lo. ‘Khawi atang hian nge tan tur?’ tiin Nancy chu ka han zawt a.

Nancy chuan, “Ho te a ni, in Kohhran hi heng Hmeichhe tihduhdah tuartute lama a tan tlat a, Lal Isuan an natna zawng zawng tihdamsakin, zalen turin a duh tih inhriattir chuan, in Kohhran chu ‘Hmangaihna Kohhran’ tiin hriat a lo ni ang a, rawngbawlna tur tam tak in la nei zel dawn a ni,’ tiin. Chu chu kan khawtlang siamthatna tura thurawn tha tak, thildang zawng zawng aia tha a ni. Chu chu eng Kohhran tan pawh, a lian a te, hmun hrang hranga mite tan pawh zawm awlsam tak a ni. Thil thar leh mak tak pawh a ni lem lo, Bible thu zirtirna nen pawh a inrem thlap a ni. Thil thar ropui tak takte leh thiamna lam te, khawtlang inrelbawlna lamte sawi tura koh kan ni lem lova, Lal Isua hna thawhpui tura kohte kan ni. Kohhran entirna ber chu kawng hrang hranga Lal Isua an nuna an lantirna hi a ni.

Tun kum 2016-a khawvel puma Baptist Hmeichhiate tawngtaina thupui chu, ‘Tho la, eng rawh,’ tih hi a ni. Pathian tana kan penchhuah hian khawtlangah Lal Isua eng chu tihlanin a lo awm thin. Tuna kan tawngtaina thupui hrang hrang hi America hmar lama kan unauten an buatsaih a ni a. Kan tawngtaina chu, hmeichhe awm nem zawk leh chaklo zawkten huaisen taka he harsatna kawng hrang hrang an tawhte an lo hmachhawn theih nan leh kristianna lo tlahniam zel tur kawnga hlauhthawnna neiten chakna thar an lo neih nan leh khawtlanga an lo enchhuah zel theih nan. Hmangaihna hi a chungnung berin midangte tan a thawk bawk tur a ni. Kan hriat theuh angin khawvela harsatna hrang hrangte hi hmachhawn a har hle thin mai. A chang chuan harsatna kan lo tawrh tawhten min tilungngai leh thin. He khawvel harsa takah hian enchhuah pawh a har hle mai! ‘Engkim a tha vek e,’ tih mai a, harsatna sukiangtu tur nghah mai a awl hle thin. Mahse, Pathian Lal ram hi hetiang hian tihlan a ni ngai lo.

Amaherawhchu, chung harsatnate chu chiang taka en a, hmachhawn tura koh kan ni tlat si. Pathian chu heng harsatna zawng zawng sukiang tur hian a chak tawkin a tha tawk a, A fanute chu Ama rual hian kan kal zel tur a ni. Tawngtaina tur tam tak a awma, Baptist Hmeichhiate kan tawngtaihona hi pumkhat kan nihna anga kan rawngbawl tlan theihna chu a ni.

Lalpan a hmangaih

Ksenniji, President, BWAWD 92015-2020).

.............................

Thuchah pahnihna

America hmarlam Baptist Hmeichhe Pawl inzawmkhawm President hnen atanga thuchah 

Lal Isuan, “Kei hi khawvel entu ka ni” a ti. Chutiang zelin, “Khawvel eng chu in ni, tlang chhipa khaw awm chu thuhruk theih a ni lo,” tiin. Kan khawtlangah Lal Isua eng chhi chhuaktu kan ni thei vek a, eng chhuak turin Lal Isuan thu min pe a ni. Thupek ropui tak chu a ni.

Hmuntinah eng ang takin nge chu eng chu a lanchhuah ang? America hmar lama hmeichhiate hmanga Pathian hnathawh leh anmahni hmanga a inpuanna kan hmu thei ang. An nuna Pathian inpuanchhuahna hi malsawmna leh min tichak thartu lo ni rawh se. Kan vela mi tam takte chu thimah an la awm a, engtinnge Lal Isua hi anmahniah tarlanin a lo awm theih ang a, beiseina nung leh hmangaihna eng chu tarlan a lo nih theih ang?

Kan inah, kan hnathawhnaah, Dawr hmun leh sikul kan kalnaahte kan engchhuak tur a ni. Pathianin a dahna hmun apiang che kha A tana i enchhuahna hmun tur chu a ni. Mite hnena i hmel hlim tak i lantir khan i engchhuak a ni.

America hmarlama hmeichhiaten kan ngaih pawimawh ber pakhat chu, a bik takin mi chaklote leh tanpui ngai hmeichhiate engchhuak tura fuih hi a ni.Hei hi kawng hnihin kan kalpui a-Hmeichhi, chaklo zawk te, naupang tanpui ngai ngawih ngawihte tanpui leh kan vela mite tanpuina kawnga fuih leh tanpui te. Tin, kan hmalakna hi kawng hrang hranga a tulna inhriattir mai bakah hmalatute kan infuih tawn reng bawk a ni. Kan harsatnate inhriatsak tawnna tur hmunte siamin kan in tawngtaisak bawk thin. America hmarlama hmeichhiate hian kan vela harsatna leh mamawhna a hmu a, Lal Isua hi hmun hrang hrangah kawng hrang hrangin enchhuahtirin a la awm zel a. Hmun thenkhat la thim mahse, Lal Isua eng chu kan beiseina la awm reng chu a ni. Thil tam tak tihtur kan velah hian a la awm. ‘Baptist Hmeichhiate hian khawvelah thil ropui tak an ti a ni’ tiin miten min sawi ta se, chu chu a ropui dawn lo em ni? Lal Isua keimahniah a engchhuak ang hian kan awmna, tlangchhipa eng awm kan ni ang hian kan eng chu ropui takin engchhuak rawh se.

Heti hian an sawi thin, ‘Nangmah-ah chauh hian a ni Lal Isua an hmuh thin ni. Lalpa duh tak, ka thenawma harsatna leh manganna tuartu te, kan khawtlang leh hmun hrang hranga harsatna tuartute tan engchhuak turin min pui ang che. I tana kan enchhuah theih nan tha i tih ang chu kan chungah thlentir ang che’ tiin.

Khawvel pumpuia Baptist Hmeichhiate kan tawngtaihonaah hian Lalpan malsawm vek che u rawh se.

Moreen Sharp, President, NABWU (2012-2017).

.................................

Thu inchhiar chhawk 

Kan chhehvel-ah hna thawk tura koh kan ni 

Hruaitu : Kan chhehvela mi leh kan khawtlanga Hmeichhia chaklo tak tak, nekchepna leh harsatna hrang hrang tuartute (Ephesi-a kan hmuh ang khan) “Hmanah khan thim inni a, tunah erawh chuan Lalpaah chuan eng in lo nih tak hi (Ephesi 5:8). Eng fate angin i awm ang u.

Mipui : Keimahni hmanga Lal Isua eng tihen a hun ta.

Hruaitu : Hmeichhia, taksa leh rilrua hliam tuarte tan i penchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhiat mipatna hmanga tihluihna tuartute tan i penchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhiate an thuneihna leh an duhthlanna hmang turin i bei ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Tar chaklo zawkte tan i engchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhia tan ina tangte an lo chhuah hnua nun bul tan thatna tur hrelote tan i engchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhia nun hlauthawng taka nungte tan leh engmah neilova an inleh lo chhuahsante tan i engchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhia kawng hrang hranga pawngsual tuartute tan i engchhuak ang u.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Hmeichhia an pasalten an thihsan khawhar taka awmte tan i engchhuak ang a.

Mipui : Tho la, i engte chu enchhuah tir rawh. Pathian ropuina lo langchhuak rawh se.

Hruaitu : Baptist Hmeichhia, Kristaa unau zawng zawngte Pathian Lal ram a lo zau theih nan i penchhuak ang u. Tihdan hrang leh hmun hrang hranga awm kan ni nachung hian.

Zavaiin : Unaute u, penchhuak ila kan khawtlang leh ramin min ko a ni. Pathian ropuina chu nangmahah lo engchhuak zel rawh se.

....................................

Bible zirtur : 2 Korinth 1:3-7. Lakeeyna Cooper-Raleigh(Lakeina Kupar Raleih),

NC USA hnen atangin.

“Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se. Pathianin keimahni min thlamuanna ngeiin hreawm eng anga awmte pawh chu kan thlamuan ve theihna turin ani chuan kan hreawmna zawng zawngah min thlamuan thin. Krista tuarnate chu kan chunga a chuang aliam ang tak hian, kan thlamuanna hi Krista zarah achuang aliam a ni. Nimahsela, hreawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hreawm tuar bawk hi chhel taka in tuarnaah chuan a thawk thin a ni. Tin, hreawmna chang vete in nih ang hian, thlamuanna chang vete in ni bawk tih kan hriatin kan beisei sakna che u hi a nghet a ni, (2 Korinth 1:3-7).

Hemi lehkhathawn Korin khuaa mite hnena mi, a bung hmasa berah hian Paula leh Kristaa a thlarau lam fa Timothea-ten Korin khuaa Kohhran Akaia mite chibai an buk thu kan hmu a. Hetah hian Paula hian eng hi nge thlamuanna tak tak chu harsatna leh manganna hmunah hian tih a sawilang a. Engti kawng zawng emaw tak hian harsatna leh manganna hi kawng hrang hrangin mitinte hian kan tawk theuh mai a. Hemi bungah pawh hian ringtuten kawng hrang hranga harsatna kan tawh huna kan inthlamuanna tur Paula hian min hrilh a ni.

Chibai bukna a sawi zawh hian, Paula hian tihian a sawi leh a, “Kan Pathian ropui tak chu chawimawiin awm rawh se,” tiin, chu chu Pathian biak inkhawmnaa sawi hlawh tak a ni. Paula hian mite aiawhin lawmthu sawina Pathian hnenah a nei a. Kristian nunah hian harsatna leh mangannate a thleng fo thin a ni tih a hrechiang hle a. Mahse, chumiah chuan kan harsatna leh mangannate min sutkiansak turin Pathian kan dil fo tur a ni tih a sawilang bawk a. Pathian fate kan nihna angin harsatna leh manganna karah thlamuanna famkim chu kan hmu thei dawn a ni. Paulan harsatna leh manganna a tawh lai apianga tanpuitu hnai reng chu Pathian a ni.

Greek tawngah chuan thlamuanna tih hi ‘an tawrhna va tawmpuina emaw anmahni dinhmuna indah,’ tihna a ni. ‘Thlamuantu’ tih hi a awmzia diktak chu ‘mi pahnih inkara inpawh tak maia an harsatnate inhrilhtawn’ tihna a ni. ‘Thlamuan’ tih chuan ‘midangte harsatnate sukiang tura tanpui’ tihna a ni. Midangte kan tanpui hian Pathian chu rintlak a nihzia midangte hnenah kan puangchhuak a ni. Pathian chu hmangaihna leh zahngaihnaa khat a ni a, A hmangaihna chuan a hnena cheng turin min sawm reng a ni. Pathian chu mite tanpui turin A inpeih reng a, Pathian hmangaihna aia thildang chungnung zawk leh ropui zawk a awm lo a ni.

Paula khan a rawngbawlnaah harsatna tam tak a tawk a; nimahsela, Pathianin a awmpui reng thin. Harsatna leh manganna karah pawh rinawm takin Pathian tan i thawk zel ang u,(Tirhkohte 14:22). Harsatna kan tawhte hi inhnehtir a awl hle mai, a chhan chu kan harsatna kha kan dahlen lutuk thin vang a ni. Heng harsatna hmunah hian Pathian chauh han en la, i hnenah a awm a ni tih hria la, chuta tang chauh chuan midangte tan malsawmna i lo ni thei dawn a ni. Pathian chauhin i harsatnate a sutkiansak thei che a ni. Harsatna kan tawhte hian chakna min pe thin a, kan rinna kawngah pawh Pathian hnathawh leh a rinawmna hi harsatna kawng hrang hrang kan tawh atangte hian kan hmu thin a ni, inthlamuan tawnna hi ringtuten kan tih makmawh a ni.Tuar huamin midangte tan rawng kan bawl tur a ni. Kan Bible-in min hrilh angin tuarna chuan chhelna min pe thin si a. (Tin, chuti chauh chu ni lovin, kan hreawmnaah pawh lawmin i awm ang u, hreawmna chuan chhelna a siam a, Rom 5:3). Harsatna leh manganna karah pawh chu midangte tan thlamuantu i lo nih ve theih nan Pathian chu i bulah a awm reng a, Kristaa pumkhat kan ni angin kan tihtur chu midangte tana malsawmna nih a ni, chu chuan hmangaihna a entir a ni. A tihdamna famkim kan chan theih nan a chang chuan kan natnate leh harsatna kan tawhte hmang hian Amah min hnaihtir thin. Lal Isua nihna hriatchianna chu kan tana a tawrhna hi a ni(Tin, mipuiho chu a zirtirte nen a kova, an hnenah, ‘Tu pawhin mi zui a duh chuan, mahni hreawm pawisa lovin, a kraws puin mi zui raw se, Marka 8:34). Tawrhna hian chhelna min pe thin a ni.

Ringtuten lawmman kan dawn tur Paula sawite khan kan nunah chakna min pe thin rawh se. Paula chuan beiseina kan neihna hian chakna min pe thin tih a sawi a. Chu kan beiseina chu Lal Isua thihna leh thawhlehna kan tawmpuina-ah a ni. Kan tawrhna a nasat poh leh Pathianah chuan chakna thar kan lo nei thei thin. Tawrhna atang hian thlarau lamah chakna thar kan lo nei thin a ni. Korin khuaa mite hnena lehkhathawnah hian Paulan sawi a tum tak chu midangte thlamuantu ni theuh tura fuihna a ni. Hei hian min zirtir chu, ringtute chuan tuarna hi kan paltlang a tul thin a, midangte harsatna kan hriatthiampuiin thlamuantu kan lo nih theih phah thin tih hi a ni.

Pathian chu thlamuanna a ni a, Amahah chuan ringtute chuan thlamuanna kan lo nei thin a ni. Kan harsatna leh tawrhna zawng zawng hi Pathian hriatpui loh a awm lo (‘Aw Lalpa, nangin ngun takin mi enchhuak a, mi hre ta. Nangin ka thut leh ka din hi I hre thin a, Ka ngaihtuahna hi hla tak atang pawhin I hrethiam thin. Ka kal leh ka mu hi mi enngun thin a, Ka awmdan zawng zawng hi i hre vek a. Ngai teh, aw Lalpa, nangin I hriat fai vek loh chu, ka leiah hian thu reng reng a awm lo’, Sam 139:1-4). Pathian chuan thlamuanna famkim kan neih theih nan kan tawrhnate hi min tawmpui thin a ni. Midangte tana thlamuanna kan nih theih nan Pathian chuan thlamuanna famkim min pe a. Harsatna i tawhnaah khan nangmah chauhin i awm lo a ni tih hria la, Kristaa unaute chuan harsatna leh mangannate hi kan intawrhpui thin tur a ni.

Tun hi a ni midangte tana malsawmna kan nih theih nana engchhuak tura kan penchhuah hun chu ni. Nangmah hmangin i engte chu midangte tan Pathian tihentir rawh.

......................

Testimony 1-na

Elaine Pearson, Phoebe/Phoibi pawl, Lebanon, USA hnen atangin.

(Phoebe/Phoibi connection hi Hmeithai pasal sun tawhte inzawmkhawm Pawl pakhat hming).

Pathian kaihhruainain he pawl hian a bik takin hmeichhia pasal sun tawhte midangte tana tanpuitu an lo nih ve theih nan hna a thawk ber a. Hmeichhiaten kan kawppui (pasal) kan lo sun hian thim chhah taka awm anga inngaihna te, hmabak nei tawh reng reng lova inngaihnate a awm thei a. Chung huna thil pawimawh tak pakhat chu keimahni kan inhriatchian hmasak phawt a ngai thin, ‘Tunge ka nih tak a, engnge ka tih ve theih?’ tia zawhna kan inzawh a tul thin. A pasal nena an khawvel, an nun hman thinte chu a ral tawh a, an hun leh ni hman thinte chu a khawharthlak thei thin hle ang.

He pawl hi kum 2012-a din tan a ni a. A lo dindan chu hetiang a ni, Pastor-in a Kohhran mite hnenah hmeithaite tan bik hetiang hian zawhna a siam a,-‘Engtikah nge kan lusunna leh kan tawrhnate hi a tawp ang?’ tiin. Ronda nen chuan kan Pastor chu kan hmu a, pasal sun tawh mi 12 lai mai chu tihtur leh hmachhawpte nen inrawnkhawmin, pawl angin kan lo insiam ta a. Kan pawl hming tur chu kan ngaihtuah a, ‘a hun takah Pathianin kan pawl hming tur chu min pe mai ang’ tiin Pathian kutah kan dah a. Kan hmachhawp leh tihtur, hlenchhuah tur kan sawiho lai chuan kan pawl hming chu tihian a lo lang ta mai a, ‘PHOEBI’ (Phawibi) tiin. A awmzia chu hetiang hi a ni :

P (Point=hei hi) : Hei hian a entir chu Lal Isua hi “HEI HI’ a ni hmeithaite tana damna leh innghahna tlak chu.

H (Help=tanpui) : Hei hian a entir chu Hmeithaite an lusun khawharnaa tanpui.

O (Outreach=thleng phak) : Hei hian a entir chu kan Kohhran mi ni kher lo kan hmeithai puite tana rawngbawlsak.

E (Extend=tihzau) : Hei hian a entir chu kan rawngbawlna tihzau, a bik takin hmeithaite an hmeithaipuite tana malsawmna ni ve tura fuih leh tanpui.

B (Become=tan) : Hei hian a entir chu midangte tana rawngbawl tura inpekna.

E (Encourage=fuih) : Hei hian a entir chu hmeithaite chakna thar nei tura fuih leh an thlarau thilpekte haichhuahsaka, chu chu hmang thei tura fuih leh puih.

He pawl hian kawng hrang hrangin rawng a bawl a. Kawng hrang hrangin sawmnate a siam bawk thin. Midangte a bik takin pasal sun tawhte tana kawng thar kawhhmuhtu tha tak a lo ni a. Hmeithai pasal sun tawhte hian tanpui an ngai takzet a ni. Pathianin an nuna thiltum a neihte an hriat a ngai a, thlamuanna leh anmahni chauhin an awm lo a, Pathian chu an hnenah a awm reng a ni tih an hriat a ngai a. Khawharna karah pawh thlamuantu an nei a ni tih an hriat a ngai a ni.

Hemi pawl rawngbawl dan tlangpui chu –Mite tan eitur an siamsak bakah chenna in neilote an tanpui bawk thin. Sikul hrang hrangahte tanpuina pein mite tan tanpuina kawng hrang hrangin an thawk bawk thin a ni.

He pawl hmang hian Lal Isua eng chu tihen lo ni zel rawh se. Lungngaihna chu hlimna in lo thlak se, midangte tana an rawngbawlsakna hian chakna thar pe zel bawk rawh se. Jean-i chuan heti hian a sawi a, ‘Hei hi ka tan chuan a tha takzet a ni,’ tiin. Lisa-i pawh hi he pawl a zawmtirh chuan khawhar tak a ni thin a, tunah chuan rawngbawltu pawimawh tak a nih mai bakah hruaitu nihna hialte a lo chelh ta a ni.

Midangte rawng kan bawlsak hian malsawmin kan lo awm thin a. Kutkawrte pawh a mamawhtuten he pawl hmang hian athlawnin an lo dawn phah a. Sahbawn te, hanawhna hlotein a mite hnena hriselna a thlen dante hi mak i ti viau lo maw? He pawl hian Rom lehkhabu-a Phoibi-te rawngbawlna kha chhunzawm a tum ber a ni (Rome bung 16). Hei hi mi thenkhatte tan chuan thil thar a ni mai thei; mahse, Lal Isua thlamuanna chuan kan lungngaihnate min thlamuanin midangte tan eng turin min duh a ni.

...................

Testimony 2-na

Carol Owen-Brandford, Ontario, Canada hnen atangin

‘I thiante zingah tho la, eng rawh.’

He hmun Old Temple (Biak In hlui) ka tlawh kha march 2005 khan a ni. Biak In hlui tak a ni a, tunah phei chuan Inthianna In (Friendship House) tia thlak a lo ni ta. Interview Board hmaah ka inlan a, Naupangte an sikul ban hnua lo enkawl leh tihtur hrang hrang lo buatsaihsak chu ka hna a lo ni ta a. Hna hahthlak tak chu a va ni em! Naupang sawmli panga (45) lai mai kum li atanga kum sawmpanga (kum 4-15) vel rual inchhunga tlai dar thum leh a chanve atanga dar nga thleng bengchheng tak mai han enkawl chu a hahthlak khawp mai. Ka thawhpui Merran-i chu naupangte enkawlthiam tak a nih bakah naupangte pawhin an ngaina hle a. He in awmna hmun chu drug leh zu in avanga harsatna tawkte awmna hmun bulah a ni a. Retheihnain a chim vel mai bakah chulai velah chuan eitur tha neih loh vanga an taksa leh rilru lam thlenga buaite tam tak an awm a ni. He ‘Inthianna In’-a kan hmalakna leh tawngtaina chu Lal Isua hmangaihna hriattir a, Amah chu taksa leh rilru-ah chakna thar petu ani tih hriattir hi a ni.

Pathian hnenah, ‘Lalpa, chu hmangaihna chu engtiang hi nge?’ tiin ka zawt a, Bible-ahte ka han zawng a; tichuan, Matthaia 25:34-36 hi a lo lang ta a, “Chumi hnuah chuan a ding lama mite hnenah chuan, ‘ka Pa vohbikte u, lo kal ula, khawvel siam tantirh ata in tana ram buatsaih chu chang rawh u, ka ril a tamin nangnin ei tur mi pe a, ka tui a halin in tur mi pe a, mikhual ka nihin mi thleng a, saruak ka nihin puan mi sintir a, ka damlohvin mi kan a, tan ina ka awmin ka hnenah in lo kal si,’ a la ti ang” tih hi. Tichuan, ka rawngbawlna tur chu chiang takin min hriattir ta a. Kum sawm a lo ral meuh chuan rawngbawlna hlawhtling tak kawng hrang hrangin hmuh tur a lo awm ve ta a. Naupangte chu eisiam dan leh thildang zirtirnate kan nei thin a, Naupang mai bakah tleirawlte tan pawh beiseina thar an neih theih nan rawngbawlna kan nei bawk thin. Kawng hrang hranga rawngbawlna kan neih thin mai bakah coffee in hunte kan siam a, chaw ei turte kan buatsaih a, Lal Isua chanchin kan lo hrilh thin a ni. Damlo na tak tak te, jail tangte lo tlawh ve thin teh u, anmahni tlawh mai bakah an harsatnate hi i hriatpui teh ang u.

Heng rawngbawlna hrang hrangte leh ei tur kan siamsakte hi athlawnin kan ti thin a ni. Bible-ah hian Lal Isuan a rawngbawlna leh tihtur a kalsan thu hi kan hmu lo a ni. Lal Isua zuitute chuan kan rawngbawlna hi kan kalsan tur a ni dawn em ni? Ani chuan kan mamawhte min pe dawn em em si a. Heng rawngbawlna hna kan tan hi kan lawm takzet a, nitina Pathian thiltih mak ropui hmuhte hi a va han nuam tak em!

Lalpan a eng chu mi dangte hnena beiseina leh thlamuanna petu atan nangmahah ti eng chhuak zel rawh se. Amen.

.......................

BWA Hmeichhe tawngtai ni kan hman thin dan leh hmasawnna kan lo neih theih nan :

Khawvel pumpui Baptist Hmeichhe tawngtai rual ni hi Baptist hmeichhiaten a rual a kan hman tlan theih hun pawimawh tak a ni a. Baptist Hmeichhia kan nihna angin thil pahnih pawimawh tak he ni kan hmanaah hian a tel a, chu chu – Tawngtaina leh Thilpek a ni.Tawngtaina hi chakna min petu a ni a, Lal Isua ringtute chuan tawngtaina kaltlangin beiseina nung leh hlimna kan lo neih phah thin a, chu chu kan innghahna a ni. Khawvel puma Baptist hmeichhiate hi tawngtaina-in kan tangrual fova, tawngtaina hian thil ropui tak a ti thei tih kan hre bawk a. Hemi nia kan thawhlawm tlingkhawm hian khawvel hmun hrang hranga Baptist Hmeichhiate rawngbawlnaa kan thawhho thatzia a tilang a, kawng hrang hranga kan unaute kan tanpui hian Pathian Lal ram kan tizau bawk a ni. Hemi atana kan inbuatsaihnaah hian tawngtai leh thilpek hi i hrereng ang u.

America hmar lama Baptist Hmeichhiate thupui chu, ‘Kan tanrual hian kan chak a ni,’ tih a ni a. Baptist Hmeichhia zawng zawngte tan hei hi thupui pawimawh tak a ni. Hemi ni kan hman hian chakna thar min pe a ni tih i hre thar theuh ang u. Vawiin hian khawvel hmun hrang hranga tawng hrang hrang hmangte leh tihdan hrang hrang neite hmun khatah min phuarkhawm a. Tawngtaihona kan neih hian inpawhna dangdai tha tak mai min neihtir bawk a ni. Thahnemngai takin thilpek pawh i hlan ang u.

Kan thawhlawm lakkhawmte hi tangkai takin hman a ni thin a, kan hriat tlan atan kan han tarlang e, hetiangin :

Hemi nia kan thawhlawm tlingkhawm kalna hrang hrangte : Hmun hniha thena hmun khat chu keimahni inrelbawl nan, hmun hniha thena hmun khat dang chu Baptist World Alliance Women’s Department-ah kalin mamawhna hrang hrangah hman a ni thin. Hemi a hnuaiah hian kan pawisa hmanna hrang hrangte chu lo tarlang ila.

Hmun hniha thena hmun khat (zaa sawmnga/50%), BWA Women’s Department-a kal hman dan: 1. Hemi ni ruahmanna atan leh thil hrang hrang inhriattir nana senso atan. 2. Khawvel hmun hrang hranga Hmeichhiate tanpuina tura kan hma lakna senso atan. 3. Hruaitute inhmuhkhawmna senso atan leh Hruaitu zinga tanpui ngaite tanpui nan. 4. Chanchinthar puanchhuah nan leh thildang tul bik atan. 5. Hruaitute hmun hrang hranga an thawhna senso a hman atan. 6. Baptist World Alliance Women’s Department Office inrelbawl nan. 7. BWA Women’s Department-a Director leh thawktu dangte hlawh atan.

Hmun hniha thena hmun khat dang (zaa sawmnga/50%) Baptist Hmeichhe inzawmkhawm (Continental Union) hmun hrang hranga kal hman dan : 1. Keimahni inrelbawl nan. 2. Evangelism rawngbawlna atan te, hmeichhia tleirawlte inhmuhkhawmna siamsak nan te, heng atana senso leh kawng hrang hranga hmeichhiate tanpui nan te leh tul dang kawng hrang hranga hman atan. 3. Kan Inkhawmpui senso atan. 4. Mi rethei leh zirna lama harsatna neite tan. 5. Keimahni huam chhunga Hruaitute zin velna atan.

Kum 2016 BWA Hmeichhe tawngtai ni thawhlawm hmanna tur ruahmante : 1. Hmeichhiate tihchakna kawngah : Pawl hming- Farmtown Canada aka Funny Farm. Hmalatu ber – Kelly Franklin, Executive Director. Hmachhawp – Hei hi kar khat nipui hun atana buatsaih a ni a, mite hmasawnna tura tanpuina lam a ni ber. Hmangaihna nena Kristian nun inhriatthiam tawnna te, hma lam huna an tana tha tur thlan thiamna te, mahni inrin tawkna neihtir leh mite nena thawhhona tha neihtirte hi a tum ber a ni. 2. Hmachhawp kaihhruaina tha hmeichhiate tan : Pawl hming – Oasis Dufferin Community Center. Hmalatu ber – Erika Abele, Director of Women’s Programs. Hmachhawp –Pawisa lam khawih dan leh hna hrang hrangah khawtlang tana chhawr tlaka an awm theih nan, a bik takin thalaite tan kawng hrang hrangin training an buatsaih thin. 3. Eitur semna lam : Pawl hming – Mary Magdalene Ministry Gateway. Baptist Church Victoria, BC, Canada. Hmalatu ber – Donna Forster, member. Hmachhawp – A tum ber chu mi hnuaihnung tak takten hna thate an lo thawh ve theih nan hmeichhia tihluihna avanga inzawrh luihtirte chhanchhuahna hna thawhte leh an hmalam kawng kawhhmuhsakte a ni. 4. In leh lo chenna tur buatsaih lama hmalakna : Pawl hming – Christian Women’s Job Corps of Middle Tennessee, USA. Hmachhawp : A tum ber chu mimal tinte hmasawnna tura hmalak a ni. Retheihna avanga harsatna hrang hrang neite puih bakah zirna turte tumsak. Hnathawh tur an hmuh theih nana training hrang hrang pek. Pathian thu zirna leh English zirnate an buatsaih thin bawk. 5. Tanpuina kawng hrang hranga pek : Hmalatu bik – BWA Women’s Department Executive Board. Hmachhawp – Hmun hrang hranga harsate tanpuina kawng hrang hranga pek.