Nimin, February 7, 2013 atang khan Serampore Convocation, AICS Aizawlah neih mek a ni a. Naktuk thleng hian Senate Meeting hrang hrang neih a ni ang. February 10, 2013 Pathianni-ah Convocation hi neih a ni ang a, hetah hian Theological Graduate mi 350 chuang zet hnenah Degree Certificate hlan an ni ang. Heng bakah hian Doctorate Degree la tur engngemawzat an awm bawk.
Mizoram Baptist Kohhran Pastor te zingah Rev. R. Zolawma chu Doctorate Degree (D.Th) pek a ni dawn a, hemi rual hian Rev. VL Zawnga pawh Doctor of Divinity(DD) Honorary pek a ni bawk ang.
......................
Rev. R. Zolawma
Rev. R. Zolawma hi Upa Guduha leh Pi Japanti te fapa a ni a, Tlabung ah a selian. A nupui chu C. Sangnghaki a ni a, fanu pahnih an nei a, tunah hian AICS ah an chhungkuain an khawsa mek a ni.
Lehkha zirna lam:
High School - Tlabung P.U.C. - Lunglei Gov’t. College B.Th. - E.T.C. Jorhat B.D. - Serampore & E.T.C Jorhat. M.Th. - UTC, Bangalore
Kohhran Upa chhûngkuaa seilianin, Sunday School kai te leh Kohhran ngaih pawimawh te chu a tih tûrah a ngai mai thîn a, Kohhran hruaitute leh Pastorte a ngaisang thin hle. Naupan lai atangin Pathian tihna nei tlat mi a ni. Salvation Camping leh Crusade ah te pawh vawi tam tak lutin, hengah te hian inhlantharna te pawh, a nei ve thîn a. Pathian rawngbâwl tura kohna leh inhlanna tak tak erawh chu kum 1989 June thlaah a nei a, Martarte chanchin a chhiar atangin engkim chan huamin, chhungkaw kalsan huamin a inhlân a ni.
Full time-a rawngbâwlna leh a awmtawhna te:
1990-1993 - Pro. Pastor Vaseitlang Pastor Bial 1993-1995 - Nghalimlui Pastor Bial 1997-1998 - Chawngte Pastor Bial 1998-2000 - Pangzawl Pastor Bial 2002 - Lecturer, AICS 2009-2010 - Dean of Ministerial Training, AICS 2010 - Academic Dean, AICS.
2013 - Elected Principal, AICS
D.Th. - Federated Faculty for Research in Religion and Culture (FFRRC), Kotayam, Kerela D.Th a zir lai hian a zirlaia a mamawh châkkhai lam turin Princeton Theological Seminar, Princeton, USA-ah Doctoral Research Student Programme hmangin thla nga chhûng Supervisor, Dr. Richard Fox Young-a kaihhruaina hnuaiah research a bei a, tûnah hian D.Th. (Doctorate Degree) a la dawn ta a ni.
Mizoram Baptist Kohhran Assembly Exeutive Committee chuan Term thar atan AICS Principal atan a ruat a, Principal ni lai, Dr.RL Hnuni pension-a a kal hunah a hmun hi a luah ve leh dawn a ni.
...................................Rev.V.Lalzawnga
Rev.V.Lalzawnga hi ft 5 ‘6”-a sâng a ni a, May ni 25, 1932-ah Keltan khuaah a pianga, Vanchhawng hnam a ni. A pa chu Dailova a ni a, a nu chu Kapkimi (Hlawncheu) a ni.. Unau paruk, mipa pali leh hmeichhe 2 an ni a, a naupang ber dawttu a ni. A naupan têt laiin Keltan khua hi Purûn tlâng bul, Chawngtui (S)-ah an insawn a, chu chu a seilenna khua a ni ta. Kum 1947 August ni 31-ah Chawngtui khuaah Baptisma a chang a. Kum 1947-ah a piang thar a, Kum 1956-ah Rawngbâwltu-ah lâk a ni. Kum 1963 July ni 31-ah Chalsawithangi (Hlawndo) nên an innei Fapa pathum leh fanu pahnih an nei a.
Zirna (Secular line) lamah a zir sâng lo. Kum 1945-ah Class-III a passed a, chhûngkaw harsatna avângin a zir zawm thei lo va, 1946-1954 thlengin hlo thlo mi a ni ta a. School-ah lut thei lo mahse chutih lai chuan Serampore Lay Preacher Course mahni in atanga zir theih chu a zawm ve a, Kum 1951-1952 thleng a zira, Second Class-ah a pass a, Certificate a dawng ve a ni. Kum 1955-ah Jubilee Bible School-ah a lut a, examna-ah chuan pakhatna a ni nghe nghe a. Bible a zir lai hian Missionary F.J. Raper-a chuan Pastor atân a ît avângin Class VI thleng zir leh tûrin a lo râwn a. Puitlin hnuah a zir leh ta a. 1957-ah Class VI chu a pass a, Pastor ni tûrin Pathian thu zir a dîl ta a, 1958 Assembly chuan a la a. Cherra Theological College-a kaltîr an tum avângin 1958 chhûng chu Serkâwn-ah Sâp tawng zirin a awm rih a. Kum 1959-ah chuan Aizâwl Theological School-ah a lut ta a, heta a zir lai hian Serampore Matric an zirtîr nghâl a, 1962-ah a pass ta a.
Pastor bial hrang hranga a awmna te, Baptist Kohhran chhûnga hna hrang hrang a lo vawn te leh Pathian thu a zir dân chu a hnuaia mi ang hi a ni a. Pathian thu a zir hun chhûng, Serampore Lay Preacher Course a beina tiam lovin kum 9 a ni. 1955 : Jubilee Bible School Serkâwn. Thla 6 course 1959-1961 : Aizâwl Theological School. Kum 3 course 1962-1964 : Thingsai Pastor Bial Pro.Pastor 1964-1966 : L.Th. Cherra Theological College. Kum 2-ah a zo 1966 June.19 : Serkâwn Biak inah Rev. Challiana Murray-in Minister-ah a nemnghet (Ordained) 1966-1970 : Lawngtlai Pastor Bial 1971 : B.Th zirin Jorhat-ah (L.Th tân B.Th hi Kum 1-a zawh theih a ni) 1971-1978 : Lawngtlai Pastor Bial 1978-1980 : B.D. Serampore College 1980 -1981 : Chhîpphîr Pastor Bial 1981-1984 May : Chandmary Pastor Bial, Lunglei 1984 June-1992 : Sunday School Secretary, Church Office, Sêrkâwn 1993-1994 : Gospel Centenary Secretary (Full time) 1995-1996 : Bazar Pastor Bial (1996-ah BCM President Elect) 1997 : BCM President (Full time) 1998 : Kohhran Beng EditorHêng lehkhabute hi a ziak :
1. Josua Bu Hrilhfiahna 2. Hnehna nun 3. Johana thawn I, II, III hrilhfiahna 4. II Korinth hrilhfiahna 5. Baptisma zawnna bu (Revision) 6. Zirtîrna him tawk lo te 7. Thlarau bo mantu 8. Ka Beram note chawm rawh 9. Thlarau Thianghlim chanchin zirna 10. Inkhâwm Hruai dân (Revision) 11. Baptist Kohhran chanchin pawimawh lawrkhâwm 12. Baptist Kohhran lo pian chhuah dân (Private) 13. Sermona hman tûr tehkhin thu te (Book I) 14. Sermona hman tûr tehkhin thu te (Book II) 15. Sermona hman tûr tehkhin thute (Book III) 16. Baptist Kohhran thurin leh khawtlâng nun siamthatna(Beirual thuzir) 17. Jona bu hrilhfiahna 18. Genesis bu hrilhfiahna 19. Baptist Hand Book 20. Pastorte chanchin 21. Harhna leh khawtlâng nun siam thatna (Rev.Dr.CL.Hminga nêna tang kawpin) 22. Thawnthu pali 23. Khawvêla Harhna ropui lo thleng te. 24. Kohhran Chanchin (A.D 1-600 thleng) 25. Mizo Study Bible (Mi dangte nêna thawh ho a ni a, amahin kum 4 lai a buaipui zui a. A pension hnua Bible Society-in an thawhtîr a ni).Rawng a bawl chhûnga Kohhran tâna a Contribution nia a hriat chu heng hi a ni.
1. Sunday School hmasâwnna : Tun hmain Sunday School hi Baptist Kohhranah a chak lo hle a, Secretary a nih hnuin Pathianin mi rilruah Sunday School pawimawhna nasa takin a tilang a khaw tin deuh thawah a lo vul ta a. Pathian malsâwmna a dawnah a ngai a ni.
2. Archive : Mizoram Baptist Kohhran tân tul hlein a hria a. Harsatna tam tak awm mahse a hma lâkna chu Pathianin mal a sâwm a. Archive lo awm ta hi Pathian zâra Kohhran tâna a Contribution-ah a ngai a ni. 3. Mizo Study Bible : Hei hi Bible Society of India hma lâkna a ni a. Aizâwl Auxiliary-in a bawhzui a. Mi dang tam tak nên an thawkho va, 2004-2007 thlengin amahin a bawhzui a. Chumi bâkah Study Bible-a chuang tûr Bible lehlin thar C.L (Common language) an tih kha siam fel ngai apiang a tifel bawk a. Chuvângin a Contibution-ah a ngai a ni. 4. Literature lam : Lehkha bu chi hrang hrang bu te deuh te nên 25 a ziak a. Literature lamah pawh Contribution neiin a inhria a ni.
