November ni 3, 2013 (Pathian Ni) hi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni zing inkhawm ah Headquarters atanga thupui thlan sa hmangin thuchah gnaihthlak a ni ang a. Hei bakaha hian Tualchhung Kohhran ten tul leh tha an tih angin hemi ni pual progamme hi an hmang dawn a ni. Kumin Khawvel Sunday School Ni-a kan thupui chu “Mihring dik tak ni tura buatsaih” tih a ni ang.
Sunday School Intan dan.
Tun laia Sunday School kan tih hi 1780 kuma Robert Raikes-an Gloucester, England-a a din a ni. Hei hi a thang zel a, Sunday School a pung zel a, 1785 kumah Sunday School inzawmkhawm pawl hmasa ber, Society for Promoting Sunday School a lo ding hial a, a hnu lawkah Sunday School Society tia thlak a ni.
Khawvel hmun hrang hrangah a darh zau zel a, India ramah pawh kum 1800 khan William Carey leh a thiante pathumin Serampore-ah an lo din a. Tin, Mizoramah chuan kum 1896-ah Sapupa leh Pu Buanga ten Aizawlah an din a, chhim lamah chuan kum 1902-ah Tv. Thankunga (a hnua Tirhkoh leh Pastor ni ta) leh a thian ten Sethlun-ah an din a ni.
Khawvel Sunday School Ni lo chhuah dan.
Khawvel Sunday School Ni dintu chu Dr. George W. Bailey a ni. Ani hi America (USA) mi a ni a, khawvel huapa Sunday School rawngbawlnaa mi pawimawh tak a ni a. Kum 1910 khan World Sunday School Association ah President atan thlan a ni a. Ama huaihawtin kum 1907 khan khawvel pum huap Sunday School Ni Rome khawpuiah an lo hmang tawh a, President a nih kum, 1910 ah phei chuan Washington khawpuiah May 22 ah ropui takin an hmang a ni. Khawvel Sunday School Ni hi a remchan dan angin hman a ni thin a, mahse India ramah chuan tuna kan hman lai mek, November Pathian ni hmasa ber hi hman a ni ta reng a ni. BCM pawhin kum 1939 khan All India Sunday School Union kan zawm a, chuvang chuan Khawvel Sunday School Ni hi kan lo hmang ve ta a. A hnuah Christian Education, Evangelical Fellowship of India kan zawm leh a, kum 2009 atang khan All India Sunday School Association kan zawm leh ta a ni.
Sunday School pawimawhna.
Sunday School pawimawhna kan sawi seng lovang. Hun rei tak Sunday School-a kan hotu ber ni thin, Rev. V.L Zawnga sawi hi tawi tein sawi chhawng ila – 1. Mizote lehkha thiamna petu, 2. Kohhran dintu, 3. Kohhran ban, tiin a sawi a ni. Sunday School pawimawhna hi a tir te atangin BCM rorelna sang ber pawhin a hria a, kum 1904-a BCM Assembly hmasa ber (Presbytery) Sethlun-a neih chuan “Kohhran din tawhnaah chuan Sunday School awm zel rawh se” tiin an lo rel daih tawh a ni. Chuvangin BCM huam chhunga Kohhran tinte chuan Sunday School kan ngaih pawimawh hi kan tih tur dik tak a ni.
....................
