BCM Assembly 2016 in alo rel tawh bawhzuiin vawiin July ni 31, 2016 chawhma dar 11 khan BCM Mission hnuaia Regional Office pahnihna; Kolkata Region chu Baptist House, Salt Lake, Kolkata-ah Rev. Dr. C. Vanlaldika, Associate General Secretary (Mission) in Pathian ram alo zau zel nan a hawng.

Kolkata Region hawnna inkhawm hi Rev. Joseph Vanlalruata, Regional Director, Guwahati Region in a kaihruaia, Rev. Lalhmunsanga, Regional Director, Kolkata Region in kalkhawmte lawmna leh report tawi pekna hun a hmang a, kalkhawmte aiawha thusawina tawi Pu H. Lalliana Songate IRS (Secretary, Calcutta Mizo Christian Service) leh Rev. Dr. R.l. Hnuni (Principal, Calcutta Bible Seminary) ten an hmang bawk.

Kolkata Regional Office hawngtu Rev. Dr. C. Vanlaldika chuan kalkhawmte hnenah 'hetianga BCM in mission rawngbawlna kawnga hma a lakna hi BCM doctrine leh principle tih lar tumna ni lovin, Lalpa ram zauhna leh chanchintha puan darh nan chauh atih a ni. Lalpa chakna rinchhanin kan la hriat ngaihloh kalkawng kan zawhna kawngah hian a chhanna neitu Pathian hnenah inhlan chungin kan kal zel a tul a ni' a ti.

Kalkhawmte hi Pathian fakna hla mawi tak tak hmanga awih an ni a. Rev. Dr. R.L. Hnuni leh a zirlaite, Tv. J. Vanlalpekzuala (BD Zirlai, Calcutta Bible Seminary) leh Nl. Vanlalpeki Ralte (Temami, Mizoram House) ten thiam takin Pathian fakna hla an hlan.

Pathian thuchah tawi tha tak Rev. B. Lalrinawma, Coordinator of Mission hnen atangin ngaihthlak a ni a, Upa Dr. Vansanglura, Principal Serampore College in tawngtaina in inkhawm a ti tawp a, kalkhawm zawng zawng ten chaw chhun tui tak kilhona hun an hmang bawk.

Regional Office hawnnaah hian sawmbikte an kaltha hle a, Calcutta Mizo Christian Service aiawhin puipate an kal kim deuh vek a, Rev. Dr. Rodinmawia Ralte, Associate Professor, Bishop's College leh a chhungkua, Rev. Israel Lalremtluanga, Serampore College leh a chhungkua, leh Kolkata chhunga BCM member sawmbikte an kal tha hle. Vanduai thlak takin Rev. K. Lalzarliana, Asst. Professor, Serampore College chu a damloh avangin an chhungkuain an tel ve theilo.

Tin, he hun hmang tur hian Mission Field aiawihin Rev. B. Zirsangliana, Field Director, Bengal Field leh Rev. TC Vanlalmalsawma, Field Director, Jharkhand Field te an tel bawk.

BCM Mission Field hrang hrang te Region hniha then anih tak hnu hian Kolkata Region hnuaiah Bengal Field, Jharkhand Field, North India Mission Field leh MP & MS Field te an awm tawh dawn a ni.