Mizoram Baptist Kohhran member zawng zawngte hlim taka mahni hmun theuha Krismas hmang tur leh mahni lungawi tawk theuhah Amah chibai buk turin Krismas hun lo thlengah hian duhsakna ka hlan a che u. Tawngtainain Krismas hmang ho ila, mi dangte tana malsawmna ni turin mi tin i inhawng thar leh ang u.

 

REV.H.LIANNGAIA

General Secretary,

 Baptist Church of Mizoram ..........................................     A hmasain Isua Krista hmingin Chibai kan buk a che u. Kan awmna Ban Luang, Nan Province, Thailand pawh tluang takin thlahnih chuang  kan lo awm ve ta a, Pathian kaihhruaina kan chang hlein kan hria a, kan fate pawhin hreawm an ti lo a, keini nupa pawhin hreawm kan ti lo a, Bangkok atanga kan pem dawn khan kan huphurh kan ring a, mahse Pathian awmpuina kan chang a, kal kan chak em em mai a! Kan fate phei chu kan in peih hmain kal tumin pawnah an lo chhuak sek tawh mai a, mak kan ti zawk hle. Tin kan thlen hlim pawhin Pathian kaihhruaina kan chang a, kan hlim em em mai a, Pathian min duhna hmuna lo awm hi a lo nuam ber a ni e! Australia te, Bangkok-ah te kan han kula zak zak a, Pathian min hruaina vek a ni a, mahse kan rawngbawlna hmun tur tak kan thleng hi kan thlamuang  ve tlat a ni. Tunah hian Dema hi Schoolah a thawk tan tawh a, a ni pawhin nuam a ti a. Tin khawtlangah pawh zirtirtu anga awm khan dinhmun a siam tha ve a, chu chu rawngbawlnaah a tangkai a, thil remchang tak Pathianin min ruat sak zel niin kan hria. Kan fapa Daniela hi kan in bul maiah Thai Schoolah a kal ve rih a, a phur thei em em mai a, kan lawm khawp mai. Kan fanu Grace-i erawh chu Teteiin inah Home Schooling a neih pui thin a, tawngtai pui kan ngai hle. A system hi kan la man vak lo a, Home Schooling  teacher tur kan mamawh khawp mai. Tin mahni fate chen puia, ziritr bawk chu a har duh riau mai! Oct 31 khan kan khuaa ringtu kan neih chhun “Yin” chuan min boral san hlauh mai a, a ni hi natna tam tak nei, Wheel Chair a nawr ngai a ni a, mahse kan tangkai pui hle a, Bible Study te a hruai thei a, keini hian tawng duh angin kan la thiam si lo a, kan pawm kualin kan nawr kual ve nasa a, kan chhungkaw tan pawh channa nasa tak a ni a, rawngbawlnaa hma kan lak tur te pawh kan plan ah a tel ve tlat avangin tunah chuan mahniin bul tan leh a ngai ta a, min lo tawngtai pui ve dawn nia. Amah hriat rengna inkhawm kan khaw thenawma ringtu tlem ten nen kan siam ve a, mi pawimawh leh kan hmelhriat ho te kan sawm a, Pathian thu chah kan thianten an sawi thei a, kan lawm khawp mai. Kan thenawm nu Kruu Khalaya (Khruu hi ‘Zirtirtu’ tihna a ni, Dema pawh “Khruu Dema!”) a fel thei hle a, thil tam tak min hrilhin min zirtir a, mahse Buddhismah hian a chiang em em mai a,a la khirh rih khawp mai!  Hmanni lawk khan  Thailand-ah chuan an Festival pawimawh tak “Loy Krathong” an nei a, an sual te tlen fai nan Lawng lem an siam a, luiah an len bo tir thin a. Kan thenawm nu pawh hian min siam sak ve a, kei niin Kross kan lo tar ve a, kan sual thawina a nih dan kan sawi fiah bawk a. Thai mipui ho hian Kross thu an hriat ve nan tawngtai pui an ngai hle. Dema thawhnaa zirtirtu ho te an fel hlawm hle a, tlai tin school banah kan kal leh ziah a, Thai tawng zir pahin zirtirtu te nen inkawmna hun te kan nei ve thin a, Pathian thu kan ti ri zauh zauh ve thei a, kan lawm rih hle. Pathianin kawng min hawn sak zel thei nan min lo tawngtai pui zel dawn nia. Lawm deuhna kan neih pakhat chu kan thenawm lawka nu pakhat a hming “Pa Chop” a awm a, Bible chhiar te a ngaithla ve duh a, Pathianin a thinlung a hawn zel theih nan in lo tawngtai ve dawn nia. Christmas: Kan awmna hi a thingtlang deuh bakah ringtu pakhatmah an la awm loh avangin Christmas boruak pawh a awm ve lo hle! Tunkar schoolah hian kan zirlai te hnenah leh zirtirtu, thenawm khawveng te hnenah a tam thei ang ber Christmas awmzia tih lan ve kan tum a, tawngtai pui kan ngai hle. Christmas ni tak erawh hi chu inkhawm kan chak ve avangin khawpui lamah inkhawm turin kan kal ve ang. Tin kan thiam thawhpui te nen 27 (Tuesday) hian kan theih angin kan lawm ve ang. Sunday, Christmas leh ni pawimawh dangah te pawh mahni remchan dan angin mahni rawngbawlna theuhah te kan hmang thin a, keini awm thar tan chuan thiam a la har hle! Christmas leh Kumthar Chibai kan buk che u a, hlim taka in hman kan duh sak rual che u in hman nachang pawh la hre ve lo an tam hle tih in lo hriat tho kan duh a, tawngtainaah te in lo hre ve reng thin dawn nia. In Rawngbawlpui, Thangridema te chhung Ban Luang, Nan, Thailand. Postal Address: Thangridema PO BOX 18 Ban Luang. Nan Thailand.  55190

Pathian fapa mal neihchhun min chhandam tura a lo pianna hriatrengna hun kan lo thleng leh thei hi a va lawmawm em! He hunah hian kohhranhote in zavaiin Krismas chibai kan buk che u a. Hlim leh lawm taka Pathian hming in fak ngei kan duh sak che u a ni. Mi tin ta tur Chanchin |ha lawmawm em em (Luka 2:10) kan chan bik kan vanneih zia hrereng chungin Pathian hnenah lawmthu sawiin a hming fak tlang ila, a la hre lote hnenah hrilh hre thuai thuai turin i thawk tlang zel bawk ang u.

Rema leh Beii, Central Asia .....................................  

Kohhranho zawng zawng hlim leh lawm taka krismas in hman kan duhsak che u a, malsawmna tam tak in dawn kan beisei bawk- May your Christmas celebrations be a time of joy reflecting the love of God; and may the message of the birth of Christ inspire us to live our lives as a living sacrifice (Rom 12:1) for Him.

Dam takin,

Muana and Villy, Thailand ..............................  

Mizoram pawna Zofate nen Krismas ‘Krista Ruai’ anih ang ngeiin i kilho leh ang u. Mosolman tam takte pawhin Isua chibai buk turin Nagaon khaw daiah Krismas lawmna December 25-27 hian an buatsaih mek, Lalpan rem a tih chuan, kan nupain tel ve kan tum. A sang tel an kal khawm beisei a ni. Hemi hnu lawk hian, Isua ka Chhandamtu leh Lalah pawmin Amah zui ka thlang ta’ tia baptisma chang tur mi 3,500 lai hming pe kan nei leh ta! Hetih rual hian, Assam ram Kohhran hrang hrang 500,000 aia tamte chuan Assam tan tawngtai beipui an thlak mek, lawmthu i sawi zel ang.

Hnam tin damna tura lo piang, Isua Krista Ram chu lo zau zel rawh se!

C Muanthanga te Nupa,

North East India Harvest Network, Shillong