Tunkar Pathianni, May 28 hi Thlarau Thianghlim thlen ni (Pentecost Ni) a ni a. He Ni hi khawvel pumah Kristian te chuan urhsun takin an hmang thin a. Mizoram Baptist Kohhran pawhin he ni hi Special Sunday atan a hmang thin a ni. Kumina Thlarau Thianghlim thlen Ni Thupui chu Tirhkohte Thiltih 19:2 thu “Thlarau Thianghlim in chang em? tih a ni ang.
............
Thlarau Thianghlim thlen ni hi Good Friday hun anga kum tina insawn danglam fo thin a ni a. Kuminah hian May 28-ah a lo inher chhuak ve leh ta a. Mizoram kohhrante pawhin khawvêl puma Kristiante Calendar-a nipawimawh, kum tina an hman thin chu zawm vein, BCM Nipawimawh zingah chuan tir ve zel thin a ni. Headquarters lam atanga hman dân tur programme duan a ni lem lo va; tualchhung kohhranin tha leh rem a tih anga hman mai tur a ni. BCM hian eng hun chiah atang khan nge he nî hi kan lo hman tan tih record a awm lova. Kan Missionary-te kaihhruainain kohhran din tirh tê atanga hman chhoh ve zêl ni-âwm tak a ni.
Tun hma chuan ‘Pentikos Nî’ tia lam ve mai thin a ni a; hei hi BCM Assembly chuan Juda-te kût chhawm zui zêl kan nih loh avângin dik tawk lovin a hria a, ‘Thlarau Thianghlim Thlen Nî’ tia hman turin a lo rêl ta a ni.
Thlarau Thianghlim hi Lal Isua thawhlehni atanga chhuta ni sawmnga-naah a lo thleng a. Ringtute hnêna leih a nih nî chiah a nih bawk avâng leh, kohhran din a, tiharh a, thiltihtheihnaa thuam leh a chênchilh tan nî a nih avângin, he nî hi ringtute leh hmun tina kohhrante tân ni pawimawh leh chhinchhiah tlak a ni.
‘Tin, Thlamuantu, Thlarau Thianghlim, Pain ka hminga a rawn tirh tur khan, chumi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u’ (Joh.14:26).
Tin, an awmkhawm a pâwl ve a, “Jerusalem khua kalsan suh u, Pa thiltiam ka sawi in hriat kha lo nghak rawh u” a ti tlat a (Tirh.1:4).
‘Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khawtinah te, kawlkil thleng pawhin ka thuhretute in ni ang’ (Tirh.1:8)
