February 15 (Ningani zan) atang hian Mizoram Baptist Kohran Hmeichhe Pawl (MBKHP) Inkhawmpui vawi 51-na leh Rorel vawi 74-na chu LGSC Khelmual, Lungsen ah tan a ni dawn ta. Inkhawmpui thupui chu “Tho la, i Pathian ko rawh" (Jona 1:6) tih niin, Speaker-ah Rev. K. Lalnunsanga, Bialtu Pastor, Aizawl Central Pastor Bial a ni ang. MBKHP Inkhawmpui hi TV (LPS-5 & Zonet-Bawhbel) leh Youtube-ah te Live in en theih a ni ang.
Inkhawmpui tan zanah Inkhawmpui hawnna neih a ni ang a, Rbt Dr. Zoramthangi, MBKHP Fin.Secretary-in Inkhawm kaihruaiin, Rev. ZD Rodingliana, Director, Fellowship Department-in Inkhawmpui a hawng ang a, Rev. R. Lalbiakliana, General Secretary-in Inkhawmpui thupui sawihawnna a nei ang. MBMP aiawh palai te, Chakma Baptist hmeichhe pawl, Bru Baptist hmeichhe pawl leh Chakma baptist hmeichhe Pawl aiawh palai te hnen atangin chibaibukna ngaihthlak a ni ang a, Zaipawl panga - Bazar Bial, Buarpui North Bial, Thingfal Bial, Aizawl East Bial leh Zotlang Pastor Bial BKHP Zaipawl ten hla an rem ang.
Naktuk, Zirtawpni-ah ZIng karah Tawngai Inkhawm leh 'Mission awm zia' tih thupui hmangin Bible Study neih a ni ang a, Nl. Lalhmingmawii Chongthu, MBKHP Secretary-in a kaihruai ang. Zing dar 9:30 atangin Nilengin BCM Biak In, Lungsen Venglai-ah MBKHP Rorel Inkhawm neih a ni ang a. Rorel ve lo te tan Chawhma lamah Seminar leh chawhnu lamah zaikhawm programme Pandal-ah neih a ni thung dawn a ni.
Inrinni zingah Bible Study leh Tawngtai Inkhawm chu Nl. Lalrammawii Thangluah-in a kaihruai ang a, chawhma lamah Chhawmdawlna In pualin hun hman a ni ang a, chawhnu lamah ramthim rawngbawlna (Mission) puala hun hman a ni ang.
Inrini zan, Pathianni zing ah te Pathianni zanah te Inkhawm neih chhunzawm a ni ang a, Pathianni chawhnu ah Lalpa Zanriah sacrament an kilho ang a, Rev. R. Lalnunzira, AGS-Service -in Sacrament a buatsaih ang. Sacrament Inkhawm tih loh chu Inkhawm apiangin Speaker thuchah bakah MBKHP Secretary report leh thupuan te, Kohhran hrang hrang aiawh te hnen atang a chibaibukna te, Bial BKHP Zaipawl hla rem te ngaihthlak thin a ni ang.
YouTube Live Stream
MBKHP Inkhawmpui thlirlawkna
