Mizoram Baptist Mipa Pawl (MBMP) hnuaia Environment Sub-Committee buatsaihin February 25, 2024 (Pathianni) chawhnu khan BCM Hall Serkawnah Lunglei khawpui huamchhunga BMP-te pualin Environment Awareness Campaign leh Environment humhalhna kawnga Essay inziahsiak result puan leh lawmman semna neih a ni a, bial leh unit aiawh BMP Member 200 zet an kalkhawm a ni.
Nl. T. Lalrinpuii’n he hun hi kaihruai in; Rbt. R. Liankunga, Chairman, Environment Sub Committee (MBMP Vice President ni bawk) in tanna leh hunserh a hmang a; Rbt. ZD. Lalnunsanga, Secretary, Environment Sub-Committee-in report pe in Prevention of Corruption Act leh environment humhalhna kawnga sawrkar dan zamte a sawi fiah nghal a. Rev. R. Lalnunzira, AGS- Service-in environment humhalh a tulna leh pawimawhna kawng hrang hrang a sawi. Nl. Esther Vanlalpeki leh Nl. Deborah VL. Hmangaihi te bakah Serkawn Bial Zaipawl, BMP Bazar Bial Zaipawl, BMP Chanmari Unit Group Zai leh BMP Rahsiveng Bial Zaipawl te’n zaia rawngbawlna hun an hmang.
‘Ramngaw leh tuihna humhalh’ tih leh ‘Nungcha humhalh’ tih thupui hmanga Essay inziahsiak result puan a ni a, Essay ziaktu mi 30 atangin FLC. Sanga, Rahsiveng Unit chu pakhatna niin, KL. Chhawnzauva, Ramthar Unit pahnihna leh J. Lalhmangaihzuala, Kikawn Unit, Bazar veng pathumna a ni. Lawmman pakhatna hian Rs. 6,000/- leh memento, pahnihna hian Rs. 4,000/- leh memento, pathumna hian Rs. 3,000/- leh memento an dawng a, Essay ziaktu zawng zawng ten Consolation Prize Rs. 500/- theuh an dawng bawk a ni.
