March 8, 2016 (karleh Thawlehni) khi Mizoram Baptist Kohhran Nipawimawh 'Missionary Thlen Champha" a ni a. He ni hi Sap Upa leh Pu Buanga’n Baptist Missionary Society tirha Mizoram chhim lam, Tlabung kai an lo thlen ni a ni. Sap Upa leh Pu Buanga khan Mizoramah kum li lai an thawh hnu in Sap ramah an kir leh a. Chumi hnu chuan Arunachal-a Abor hnam, tuna Adi hnam zingah an thawk leh a. Chuta an thawh lai chuan Baptist Missionary Sociey chuan Mizoram chhim lamah Missioanry tirh an duha, Sap Upa leh Pu Buanga chu tawng thiam sa an nih avangin an sawm leh a. Kum 1903 March ni 8-ah Tlabung an lo thleng ta a ni. Mizoram Baptist Kohhran min dinpui tûra kan Missionary-te pahnih Sâp Upa leh Pu Buangaten Tlabung an lo thlen ni hi BCM chuan ni pawimawh bîk chhinchhiah tlâkah ngaiin he ni pawimawh tak hriat reng nân hian Kohhran Office chawlh ni atân a lo dah ta a ni. Mahni hmun theuhah he ni pawimawhna hi hriain Kohhranhoten ni bik a ni tih i vawng reng ang u.

Mizoram Baptist Kohhran hian Missionary hna lam hi a ngaipawimawh deuh deuh va, kan rama Missionary lo chhuakte ngaihhlutna pawh a nei nasa tial tial a. 1968-a Assembly chuan hei ni ah hian programme fel tak neia, Ramthim veina rilru Kohhran miten kan neih theih nana hman a duh ta a. Hun eng emaw ti chhung chu awmni kham programme te siama hman thin a ni. Amaherawhchu January ni 11 hi Ram pumin Missionary Day programme neia hman a lo ni ta bawk a. March ni 8 hi chu Kohhran nawlpuiin awmni khama hmang lovin, Kohhran hnathawktute chhuti ni atan kum 1989 atang khan hman a lo ni ta a ni.