October 12, 2024 (Inrinni) chawhma dar 10:30 khan, BCM Biak In, Lalnutui, Lungrang Pastor Bial ami chu Rev. Vanlalmuankima, Director, Pastoral Ministry Department-in a hawng. Biak In hawnna hi Biak In kawtah neiin, Presiding Minister-in ribbon chep chat-a a hawn hnu-ah,  Biak In chhungah lutin Biak In thar Pathian hnena hlanna leh lawmthusawi inkhawm neih chhunzawm a ni. Rev. H. Vanlalvawna, Bialtu Pastor-in Biak In hawn Inkhawm a kaihruai a, Upa M. Ramenfela, (Secretary?) BCM Lalnutui-in Kohhran dinhmun leh Biak In sak dan tlangpui report a pe bawk.  Biak In hawngtu Rev. Vanlalmuankima’n thuchah a sawi a, Lungrang Pastor Bial Zaipawl ten fakna hla an rem bawk.

Lungrang Pastor Bial hian BCM Biak In, Lalnutui-ah Bial Inkhawmpui leh Rorel an nghat a, Inkhawmpui thupui-ah Mat 6:10 - ‘I ram lo thleng rawh se” tih thu hmangin, Speaker-ah Rev. Vanlalmuankima, Director, Pastoral ministry Department hman a ni a, Biak In Hawn Progamme pawh Inkhawmpui Programe chhungah dahin Bial pum huapin hun an hmang a ni.

BCM Lalnutui hi April 4, 1994 ah din a ni a, tuna an biak in thar hi May 3, 2018 ah lungphum phumin sak tan a ni. Biak In zauh zawng hi a dung feet 60 vang feet 30 niin, a sakna senso atan hian Cheng Nuai 17, sing 1, sang 2 vel sengin, hnatlang tha 1470 an seng bawk a ni.

Tun dinhmunah chhungkaw 22 awmin member 76 an ni a, chu'ng zinga member 54 te chu Baptisma chang tawh an ni. Upa 3 leh Rawngbawltu 4-in Kohhran hi an vil mek a ni.