May 15, 2023 (Thawhtanni) khan kum 2022-2023 chhunga MTKP Inkhawmpui 2025 dawltu tanpuina atana member tina Rs. 20 khawn tlingkhawm Rs. 7,72,440 chu MTKP Office Bearers ten Lunglawn Bial TKP hruaitu te hnenah an hlan a. Lunglawn Bial hruaitute leh TKP hruaituten an lo dawngsawng a ni.
Thawhlawm hlanna hi Lunglawn Pastor Bial Committee Room-ah neih a ni a, MTKP President Upa R. Lalrochama’n kaihruaiin, MTKP Secretary Rev. F. Zorinkhuma’n Pathian hnena inkawltirna neiin, MTKP Report leh Inkhawmpui chungchanga hmalak dan tlangpui a sawi nghal a. MTKP aiawhin Treasurer - Nl. J. Lalrintluangin pawisa hi a hlan a, Lunglawn bialtu pastor Rev. Sangliankhuma Chinzah in tawngtaiin hun a khar a ni.
MTKP chuan ram pum huap inkhawmpui atan hian ruahmanna fel tak a siam a, tuntum Inkhawmpui Dawltu tanpuina hi kum liamta 2022-23 chhung-a member tin atanga cheng 20 an khawn tlingkhawm a ni a, kum kal mek 2023-24 ah pawh a tharin member tinin Rs. 20/- hi an thawh leh dawn a, tunah hian Bial thenkhat chuan an thehlut leh tan mek a ni. MTKP Inkhawmpui hi kum 2025 a neih tur ani a, BCM Lunglawn Pastor Bialin an dawl dawn a ni.
