Mizoram Baptist Kohran - Mission Department-in Kohhrante Mission rawngbawlnaa hma kan sawn nan leh mission rilru kan put ngheh deuh deuh theihna atan Mission Inkhawmpui buatsaih ni se ti-a ruahmanna an siam angin Lawngtlai, Lunglei eh Aizawl-ah te Pastor Bial 2/3 huapin Mission Inkhawmpui hi neih turin ruahman a ni a. A hmasa ber atan July 19-21 khan Lawngtlai khawpui chhunga Pastor Bial pathum - Lawngtlai North, Lawngtlai South leh Lawngtlai East Pastor bial te infinin BCM Biak In, Chanmari, Lawngtlaiah Mission Inkhawmpui hi tluang takin neih a ni. Inkhawmpui thupui-ah Joshua 3:1 thu ‘Ram lak tur lah chu a la tam mai si a’ tih chu hman a ni. He Inkhawmpui-ah hian Sepaker-ah Rev. Dr. R. Lalthanmawia, AGS Mission leh Rev. Lalremsiama, Mission Director te hmangin, Resource person-ah Pu T. Nghaksanga Mission Promoter hman a ni bawk.
Zirtawp zan-ah Inkhawmpui tan a ni a, Speaker Rev. Lalremsiama Ralte-in thupui hawnna neiin thuchah a sawi a, Inrinni chhun-ah Mission pual Inpawlhona neiin, Upa T. Lalthanmawia, Secretary, Lawngtlai South Pastor bial-in inpawlhona a kaihruai a. Resource person - Pu T. Ngahksanga, Mission Promoter-in Mission field hrang hranga BCM rawngbawlna te leh an dinhmun thlirna – ‘Mission Focus’ neiin hun a hmang a. Zawhna leh chhanna hun te hman a ni bawk. Inrinni zanah Mission Director thuchah sawi lehin, Pathianni zing leh Pathianni zan Inkhawmah te Rev. Dr. R. Lalthanmawia, AGS Mission-in thuchah sawi ve thunga, Pathianni chawhnu-ah Inpawlhona neiin, AGS Mission-in Mission rawmngbawlna pawimawh zia leh ram lak tur a la tam zia te, hmasawnna tur kawng hrang hrang te tarlangin, Mission rawngbawlnaa tel ve tura chona (Mission challenge) a siam a. Thalai engemawzatin Ramthim rawngbawlna-ah a tul anga ke pen ve tura chona hi an chhang a ni.
Mission Inkhawmpui-ah hian Inkhawm apiangin Lawngtlai Area Baptist Choir te, Bial zaipawl te, Tualchhung Kohhran zaipawl ten Fakna hla remin rawngbawlna an nei thin a, Zaipawl zai bakah hian - Nl. Rebek. Lallawmzuali’n inkhawm leh inpawlhonaah te zaia rawngbawlna a nei bawk. Mission Inkhawmpui neih chhung hian thawhlawm tling khawm atangin Rs. 70,800/- hmun a ni a, hei hi BCM Zochachhuah Biak In sak nân pêk a ni ang.
Mission Inkhawmpui hi larleh August 2-4 (Zirtawp zan atanga Pathianni zan) khian BCM Biak In, Salem, Lunglei-ah neih a ni ang a, Pastor Bial pathum – Theiriat Bial, Lunglawn Bial leh Chanmari Bial te huapin he Inkhawmpui hi neih a ni ang. August 9 -11 hmang hian Serkawn leh Zotlang Pastor Bial huapin BCM Biak In, Serkawn-ah neih a ni ang a, hemi hun chhung tho hian Electric Bial, Bazar Bial leh Rahsiveng Bial huapin, BCM Biak In Rahsiveng-ah neih a ni bawk dawn a ni.
