Tun Pathianni- October 21, 2012 hi North East India Christian Council (NEICC) Tawngtai Ni (Day of prayer) a ni a. Thupui atan ‘Inpengtawn theuh kan ni’ tih hmangin NEICC hnuaia Kohhran pawl hrang hrang 40-in he thupui hmang hian Biak in tinah hun hman a ni ang.

Kan hriat theih chinah NEICC Secretary, Rev.R. Lalnunzira chuan Shillong khawpui chhung Kohhran 2- Church of God Biak in, Qualapatty-ah (10AM) leh Presbyterian Church, Pokhseh Biak inah (1:30pm)-ah te hun a hmang dawn. BCM Hqrs. lama kan hotu, Rev. C. Ngurhnema AGS chuan Venglai Biak inah hun a hmang ang a. Rev.R. Lalbiakliana (FOD Director) chuan Lunglei Venglai Salvation Army Biak in-ah thu a sawi thung ang.

Kum tin October Pathianni vawi 3-na hi NEICC pual a hman a ni thin. Mi tam takin NEICC Day an ti mai thin a, a dik chiah lova, NEICC Day of Prayer (NEICC Tawngtai Ni) a ni zawk e.

NEICC Chanchin tlangpui

India hmarchhak rama Kohhran pawl Inzawmkhawm lian ber chu North East India Christian Council (NEICC) hi a ni. Tunah hian Kohhran 35 leh Associate member (para churches) 14,  a vaiin member 49 an awm mek.

A Lo Din Dan

NEICC a lo din hma hian Bengal Christian Council (BCC) chhungah North East pawh kan tel vek a. North East-a Kristiante hi kan rilru sukthlek, kan harsatna tawh leh nihphung te a danglam bik avangin ko a rual thei meuh lova, November 23, 1937 khan North East huam bikin NEICC chu Assam Christian Council (ACC) hming puin a lo ding ta a ni. Kum 1962 khan tuna a hming North East India Christian Council tih hian thlak a ni.

A Thil Tum

1) Kohhran hrang hrang leh Kristiante in unauna leh thawhhona siam tur leh ti chak              turin.

2) Kohhran tum thuhmun neite (common interest) thawhhona  tha siam turin.

3) Kristian zirtirna hmanga  Khawtlang nun leh rilru sukthlek dik siam tur leh Kristiante        aiawh ding turin.

4) Kohhran hrang hrangte inkara remna palai hna thawk turin.

5) Ramdanga Kristian pawlte nena inthlun zawmna tha siam turin.

6) A tul huna Kristiante aiawha sawrkar laka palai hna thawk turin.

Inrelbawlna

1) Kum tin Khawmpui rorel  (Annual Session) neih thin a ni a, kum 2012 atang chuan kum 1 danah (biennial Session) nei tawh tur a ni.

2) Office Bearers term hi kum 2 zel a ni. Secretary erawh chu full time a nih avangin kum 3 term a ni thin a, kum 2012 atang hi chuan kum 4 term zel a ni tawh ang.

3) NEICC hnuaiah hian thalai pawl (NEICC Youth Assembly) leh hmeichhe pawl (NEICC Women Assembly) lian tak North East huap an awm. Tin, NEICC hian Standing Committee lian tak tak paruk (6) a nei bawk a, chungte chu:

i) Christian Home and Stewardship Committee

ii) Church Union Committee

iii) Mission and Evangelism Committee

iv) Peace and Justice Committee

v) Theological Education Committee

vi) Land and Property Committee

4) Office:

Shillong headquarter niin Office Building thatak leh quarter a awm nghal. Office ah hian thawktu Secretary bakah, Office Assistant pakhat leh Driver-cum-peon an awm.

5) Secretary:

Tunah hian Rev. R. Lalnunzira (BCM Pastor) chu Secretary-in a thawk mek a, Secretary hi office hna zawng zawng thawktu, sum leh pai pawh enkawltu, member te tlawhtu, NEICC aiawhtu ber a ni a, tawngtaipui pawh a ngai hle.

6) Sum :

NEICC sum hnar chu member te hi an ni a, kumtin budget leh target siam thin a ni. Member tam tak hian an pe tha lo thin hle mai a, hei hian hmalakna pawh a ti thuanawp deuh thin.

…………………………

NEICC DAY OF PRAYER  THUCHAH

- Rev. R. Lalnunzira, Secretary, NEICC

NEICC Ni-ah hian kohhrante NEICC atangin duhsakna chibai  kan buk a che u. NEICC hi India hmar chhaka Kohhran hrang hrangte kan thawhona huang awm chhun a ni a, chuvangin report tlangpui ka rawn ziak a ni e.

Report

NEICC din tura Shillonga thutkhawm hmasak ber Sept. ni 22, 1936 khan Pi Zirtiri (E.M. Chapman) chu Baptist kohhran aiawhin a lo tel ve daih tawh a.  Tichuan kum 1937 khan Assam Christian Council (ACC) tia din a ni ta a. Kum 1962 khan NEICC tia thlak a ni. India hmarchhaka kohhran hruaitu langsar leh hlun tak takin an lo kaihruai tawh thin.  BCM atanga hruaitu lo ni tawh te chu: Rev. Dr. C.L. Hminga (Vice President leh President), Rev. Dr. Raltawnga Chhakchhuak (Vice President), Rev. C. Sapruala (Secretary) an ni. Tunah ka kovah Secretary hna a lo innghat ve leh ta bawk a, kohhranhote’n min tawngtai pui zel turin ka ngen a che u.

NEICC chu kumin hi a kum 75-na a lo ni ta a, Rymbai khua Meghalaya-ah May 16-20 khan he Platinum Jubilee hi ‘Lasting Legacy, Greater Future’ (Phil. 3:12-14) thupuia hmangin lawm a ni. Kohhran hrang hrang atangin zaipawl 15 zet an rawn thawk chhuak a, hruaitu hlui la dam mi 30 hnenah chawimawina hlan a ni bawk.  Rev. Dr. C.L. Hminga  (kum 85) chu palai kal upa ber a ni a, a tawpah malsawmnain khawmpui min khar sak a ni. BCM Choir leh palai eng emaw zat kan hotute’n an rawn tir a, kan lawm hle.  He Jubilee atan hian BCM hnuaia kohhran eng emaw zatin tanpuina min pe bawk a, lawmthu kan sawi tak meuh a ni.

Thiltih leh Hmachhawpte

Tunhnaia kan thiltih tlemte chauh tarlang mai la.

1) Union Christian College (UCC) :

1952 khan a din a, tun thlengin a neitu a la ni. Kumin hi a kum 60-na (Diamond Jubilee) a ni; 14th  Aug.– 17th Oct. 2012 chhungin lawmna neih a ni. A lawmna ropui ber 17th October  khan Pu Lal Thanhawla CM pawh khuallian-atan hman a ni. Zirlai 700-800 vel an awm a, kumin hian zirlai 281 admit thar an ni a, mizo kan tam ber a, 87 zet admit kan ni.

2) Mission Partnership Consultation:

SIMNEI nen tang kawpin Mission lama thawhhona tha dap turin Mission Partnership Consultation kuminah Tripura-ah, nakumah Assam-ah, 2014-ah Arunachalah neih a ni ang. Hetah hian kohhran hrang hranga Missionary thawklaite koh khawm an ni ang.  Tripura-ah hian Dec. 13-15, 2012 ah kan nei dawn a, palai 150-200 vel beisei an ni.

3) Research Centre Programme:

Pathian thu-a Doctor zirna atan Reserach Centre Programme din tuma hmalak mek a ni. A hautak viau mai a, eng tak ang zel ang imaw le. Tawngtaipui kan tul hle.

4) Higher Secondary School din:

Nakum atanga class tan turin hma lak a ni a, UCC campus-ah dah tum a ni.

5) A Chair of Christianity:

MZU-ah Department of Christianity hawng ve tura dil leh hmalak mek a ni a, kawng a inhawng dawnin a lang a,sub-committee pawh din a ni.

6) Seminar:

North East Huap Seminar  lian tham tak  nei tura hmalak mek a ni a, hetah hian hmarchhak bial tana awmze nei thil (burning issues) chai tum a ni.

7) Boro-Muslim buaina kumin July ni 19 atanga lo irh chhuak-ah khan mi 100 chuang zet an thi a, in hal leh tihchhiat a tam hle. A hmun ngei tlawhin kan zu kal a. Nunau an khawngaihthlak hle.  Refugee camp 350 chuang zet-ah an inkhungkhawm a, khua a lumin, ei a chhe bawk nen, an lainatawm khawp mai. Hemi tanpui nan hian NEICC chuan kohhran hrang hrang hnenah ngenna (appeal) a siam a,  Press release siamin, Assam Chief Minister pawh hmuh a ni. Kohhranhote hnenah tawngtai tura ngenna thawn darh a ni bawk.

8) Peace Consultation Imphal:

Manipur state hi hnam hrang inchawhpawlh tam tak awmna a ni a, an buai reng mai a. An kawngpui (highway) te pawh ni 100 chuang zet nawrh avanga khar (block) a  ni a, chu chuan thil man a tis^ng a, mipui nun a tihrehawm em em a.  A kh^t tawkin buaina tharlam-in  a chim reng bawk a. Kristiante pawh kan ngawih mai a rem lo. Remna kawng dap turin Sept. ni 18, 2012 khan Peace Consultation Imphal-ah kohhran hrang hrang tangrual Joint Peace Mission Team bul tumin neih a ni bawk. Heng hi report tlangpui tak tak a ni e.

Inngeihlohna hian  Nun a tinuam lo

Kan thupui hi Korinth kohhran fuihna a ni. Korinth kohhran hi kohhran anga nung thiam lo ve tak mai an ni. Kohhran chu Krista Taksa a ni. Korinth kohhran chu Krista taksa an ang tlat lo. An inseh tawn a, an inngeih lova, pawl pawl an ti a, an intih thlarau siak vei bawk nen. Krista taksaah chuan thenna  reng a awm si lova, anni erawh chu an inthen darh nuai mai a. Lalpa Zanriah sacrament an han kilho te pawh an buai hle mai. A nei deuhvin restaurant changkang deuh a mi an rawn pack te pawh a nih hmel. Puar >l-euh-va ei pawl an awm a, wine lo rui tawk an awm a, kham lo pawl an awm bawk a, innghakkhawm lovin  kal hmasain an ei nghal mai bawk a. A neitu Krista lu chu an tihai ngawt ang.

He Kohhran nawm loh turzia hi aw! Neuh neuh an ngah ngawt ang. Thil pawi zawk la awm fo chu, a neitu Lal Isua din chhan ang a awm lo hi a ni. An thahnemngaihnate chu awmze nei lo, an thlarau chante pawh a neitu rilru tihah tawk lek a ni si a. Anmahni lah chu dik berah an inngai tham bawk si nen.

Thil mak:

Tum leh beisei in ang, Bible in ang, Pathian in ang, hlasak in ang, inngeih hauh silote hi siamtu Pathian hian Mak  a ti ngawt ang. Taksa hmun khata peng hrang hrangte mahni duh dan dana an han khawsa theuh mai tur chuh.... Mihring taksaah han mitthla teh u, zawngsihsiamsual  kan tih hi a ni ber mai lo maw? Thil hrang daih inmil lo hi chu a hriatthiamawm. Thil thuhmun, tum thuhmun, dintu thuhmun, inmil hauh loh hi chu Pathian siam a ni tawp lo vang;  mihring atanga chhuak (human-made) a ni chiang. 

Tirhkoh Paula’n, thahnem ngai taka, “Taksaah hian inthenna reng reng a awm lova.. .. peng khatin a tuar chuan peng zawng zawngin an tuarpui thin... nangni ho hi Krista taksa chu in ni a, a pengte in ni theuh bawk a.” (1 Kor. 1225-27) tia a fuihna hi tualchhung kohhran te, bial te, kohhran hrang hrangte kan inenna tur chu a ni.