May 27, 2012 Pathianni hi Thlarau Thianghlim thlen champha phak (Pentecost Ni) a ni a. He Ni hi khawvel pumah Kristian te chuan urhsun takin kan hmang thin a. Mizoram Baptist Kohhran pawhinin he ni hi Special Sunday atan kan hmang thin a ni. Kuminah pawh he ni hi Kohhran hrang hrangah urhsun taka hman a nil eh dawn a. Kumina Pentecost Ni thupui atan “Thlarau Thianghlim leh a Hnathawh” tih thu hman a ni ang. Hetiang hian Kohhran tinah hun hman a ni ang:-
Chawhma inkhawm : Thupui : “Thlarau Thianghlim leh a Hnathawh”
- Bible chhiar, BMP atangin Ezek. 36:24-27, BKHP hruaitute atangin -Tirhkohte Thiltih 2: 1-11.
- Tawngtairual a hnuai athupui angina neih nise.
- A hnuai a thuziak hi chhiarchhuah emaw thusawituin sawilan emaw nise. Thuhriltu chuan heng point te hmang hian a duh chuan thu a sawi thei ang: Thlarau Thianghlim chu min chenchilhtu Pathian a ni. Thutak- Lal Isua hnenah leh A thua min hruai luttu a ni, Lal Isua min chawimawitirtu a ni. etc.
Tawngtairual Thupui:
1) Thlarau Thianghlim kan hnena a awm avanga lawmthu sawina
2) Thlarau Thianghlim kan tihlungngaih thin leh kan tihvui thin avanga thupha chawina
3) Thlarau Thainghlim tihharhna kan chan theih nana dilna
THUCHAH
A hming awmzia leh a lo awm tan dan:
Judate kut pawimawh tak ‘Chawlhkar kut’ chu Greek tawngin ‘Pentecost’ tiin sawi a ni. Pathian malsawmna an dawn buh thar lawmna a nih avangin ‘P^wl kut’ an ti bawk (Lev. 23:15, Exodus 34:22, Deut. 16: 9-10). Thuthlung Hlui hun atangin Kalhlen Kut dawna Sabath ni hmasa ber atanga chhiara ni 50-naah he kut hi an lawm thin avangin Greek tawngin ‘penticost’ tih a ni a, chu chu ‘sawmngana’ tihna a ni. He ni hi Lal Isua thawhleh ni atanga chhuta ni sawmnga-naah a thleng ve chiah bawk a ni.
A pawimawhna:
He kut hian Judahote tan leh Kristiante tan pawimawhna tak a nei a-
1) He kut ni hi Judaho chuan Pathianin Mosia hnena Dan thu a pek ni kha niin an ngai.
2) Babulon sal t^nna atanga an chhuah hnuah Rom ram awp chhung hmun hrang hranga awm Judate tan Jerusalem-a Pathian be tura an kal khawm thinna kut a ni. Hei vang hian kum zabi khatna chhungin khawvel hmun hrang hranga Judate suihkhawmtu leh an chanchin (history) hriat thar leh thinna pawimawh tak a ni. An ngai pawimawhin an hlut em em a ni.
3) Kristiante tan he khawvela min chenchilh tura Thlarau Thianghlim a lo thlenna ni a nih avangin a hluin a pawimawh em em a, ‘Thlarau Thianghlim Thlen Ni’ tia sawi a ni bawk thin.
4) Thuthlung Thar Kohhran lo pian tanna ah ngaih a nih avangin a pawimawh hle a ni.
5) Kohhran lo thang chho zelah hun eng emaw chen chu he ni ruai nen an hmang thin a, Baptisma channa ni atan an ruat thin. Hemi nia baptisma chang zote’n kawrfual var an hak thin avangin, Whit sunday (Sunday var) tiin an vuah phah ta a ni. Anglican Kohhran chuan Penticost ni hi Whit Sunday tiin an la vuah zui zel a ni.
Khawvel history-a thil thleng pawimawh tam tak zingah hian Lal Isua pianna te, A thihna leh thawhlehna leh Thlarau Thianghlim khawvela a lo thlenna aia pawimawh an awm lo. Bible-ah Penticost ni hma lama Pathian Thlarauvin mimal a luah khah thu leh a tlukpui kan hmu nual- Josefa (Gen. 41:38), Bezalela (Exodus 35:30-31), Isarael Upa 70-te (Num.11:25), Lal Saula (1Sam.10:10-11), Baptistu Johana (Lk. 1:15), Elizabeti (Lk. 1:41), Zakaria (Lk. 1:67), Lal Isua (Lk.4:1) leh a dangte. Heng mite chunga Thlarau Thianghlim thlen dan leh an khah dan chu hun eng emaw chhung atan leh eng hna bik emaw thawh nan a ni thin. Penticost nia Thlarau Thianghlim lo thleng hi chu ‘kumkhua atan’ a ni a, an khah dan pawh an inpek dana zirin bituk chin a awm tawh lo.
A lo thlen dan:
Penticost nia Thlarau Thianghlim lo thlengin thlipui ri ang maia thawm a rawn nei leh mei anga a inlar hian awmze thuk tak a nei awm e. Thlarau, thli, leh thaw (breathe) te hi Hebrai tawngin ‘ruach’ tih a ni a. (Ezek.37:9,14) Thuthlung Hlui hunah Pathian chu meiin a inlar thin (Exodus 3:2. 13:21-22). Baptistu Johana chuan, ‘Ani chuan Thlarau Thianghlim leh meiin a baptist ang che u’ a lo ti bawk (Matt. 3:11). Penticost niah hian Thlarau Thianghlim chu tisa taksa neiin khawvelah a lo kal lo va, thlipui tleh anga ri nasa tak nena lo thlengin mihring mitin a hmuh theih turin meiin a rawn inlar ta a ni.
