Thalai Kristian pawl, Phawngpui West Pastor Bial chuan May 7-9, 2024 hmang khan BCM Biak In, Vartek-ah - Sam No. 103:1 thu – “Aw ka nunna Lalpa chu fak la” tih thupui hmangin Fakna Inkhawmpui an nei a. Speaker-ah Rev. Lallianmawia, Bialtu pastor an hmang. He Fakna Inkhawmpui hi Lawngtlai Area Baptist Choir te, zaithiam Nl. KC Vanlalzami (Aizawl), Tv. R. Laldinpuia (Lawngtlai), Tv. Francis HC Zorammuana (Lawngtlai) leh Nl. LP Zairimawii (Lawngtlai) ten zaia rawngbawlin an hmanpui a ni.
Zirtawp zan, Inrinni zan, Pathianni zing leh Pathianni zanah te Pathian Biak Inkhawm neiin, Speaker hnen atangin thuchah ngaihthlak a nih bakah, Bial Zaipawl te, zai-a rawngbawl tura an sawm te leh Bial Chhung Unit hrang hrang atangin Zaipawl leh Mal zai te, Group zai, Worship Dance te ngaihthla-in en thin a ni.
Inrinni chhun-ah Variety Programme hmangin Thupuan bu atangin Quiz inelna te, ‘Pathian fakna leh chawimawina’ tih thupui hmanga Pu VL Hrina Tlumang Paper Present te zihona neih a ni bawk. Heng bakah hian Group zai leh Solo te ngaihthlak a ni bawk. Inkhawm ban leh pathianni chawhnu ah Zaikhawm leh Fellowship neih thin a ni a, Zaihona bakah Special Item hrang hrang leh Unit Report te ngaihthlak a ni bawk.
